Daşdəmir Əliyev: “Təkcə son 10 ildə dünyada təbii fəlakətlərin sayı 3 dəfə, iqtisadi itkilər isə 9 dəfə artıb”
“Bakıda Xəzəryanı ölkələrin humanitar reaksiya üzrə mərkəzinin yaradılmasına başlanıb”. Bunu RF Fövqəladə Hallar Nazirliyi yanında "Emerkom" beynəlxalq humanitar əməliyyatlarında Rusiyanın iştirakının təmini və əlaqələndirilməsi üzrə agentliyinin direktoru Yuri Brajnikov 1 mart - Beynəlxalq Mülki Müdafiə Günü ilə əlaqədar deyib.
Onun sözlərinə görə, mərkəzin yaradılması iki il əvvəl Xəzəryanı ölkələrin - Rusiya, Qazaxıstan, Türkmənistan, Azərbaycan və İranın FHN-lərinin əməkdaşlığı haqqında imzalanmış sazişin məntiqi davamıdır: "Bu sənədə əsaslanaraq, biz Azərbaycanda Mülki Müdafiə Akademiyası yaratdıq, laboratoriyamızı, siniflərimizi, tədris bazamızı verdik. Bu, Xəzəryanı ölkələrin marağına cavab verən üçüncü mərkəzdir. Faktiki olaraq onun yaradılmasına başlanıb - baza artıq yaradılıb".
Belə bir mərkəzin yaradılmasının nə kimi əhəmiyyəti var?
Ekspert Daşdəmir Əliyevin sözlərinə görə, əsası qoyulmuş əməkdaşlıq formatı olduqca vacib sahəni əhatə edir: “Bilirsiniz ki, təbii fəlakətlərdən heç bir ölkə sığortalanmayıb. Hansısa ölkədə belə bir fəlakətin baş verməsində ən əsas məsuliyyət fövqəladə vəziyyətin aradan qaldırılmasına məsul olan qurumun üzərinə düşür. Onların adı müxtəlif ölkələrdə fərqli səslənə bilər, ancaq mahiyyət etibarilə hamısı eyni işi görürlər. Yəqin izləyib görübsünüz ki, hansısa təbii fəlakət baş verəndə hətta inkişaf etmiş ölkələrin belə kənardan gələn yardıma ehtiyacı olur. Bu baxımdan da eyni regionu əhatə edən ölkələrin belə bir əməkdaşlıq formatına zəruri ehtiyacı var. Bu ölkələrin aralarındakı münasibətlər onsuz da normaldır. Ancaq qarşılıqlı əməkdaşlığın olması daha məqsədəuyğundur. Mülki müdafiə elə sahədir ki, orada təcrübə mübadiləsinin aparılması da önəmli rol oynayır. Məlumdur ki, Beynəlxalq Mülki Müdafiə Təşkilatı Baş Məclisinin qərarı ilə hər il mart ayının 1-i Ümumdünya Mülki Müdafiə Günü kimi qeyd edilir. Bu günün keçirilməsində əsas məqsəd dünya ictimaiyyətinin diqqətini mülki müdafiə xidmətlərinə, insanların və onların əmlakının xilas edilməsinə, təhlükəsizliyin təmin edilməsinə və ətraf mühitin qorunmasına yönəltməkdir.
Müasir dövrdə bəşəriyyət öz təsərrüfat fəaliyyəti ilə ətraf mühitin tarazlığını pozmaqla təbii fəlakətlərin təkrarlanmasını, gücünü və miqyasını artırır. Təkcə son 10 ildə dünyada təbii fəlakətlərin sayı 3 dəfə, iqtisadi itkilər isə 9 dəfə artıb. Bu mənada, dünyanın 50-dən artıq ölkəsinin daxil olduğu Beynəlxalq Mülki Müdafiə Təşkilatı ən mürəkkəb fövqəladə hallarda cəmiyyətə yardım göstərir, əhatə etdiyi ölkələrdə mühafizə xidmətini inkişaf etdirir, mülki müdafiə təlimləri keçirir, bu sahədə tədqiqat işləri aparır və mülki müdafiə üzrə kadrlar hazırlayır. 1993-cü ildən bu nüfuzlu qurumun üzvlüyünə qəbul edilən Azərbaycan Respublikası təşkilatın keçirdiyi bütün tədbirlərdə fəal iştirak edir. Hazırda dünyanın hər yerində olduğu kimi, Azərbaycanda da mülki müdafiə sisteminin qarşısında iki mühüm məsələnin həlli durur. Birincisi, əhalini və iqtisadiyyatı təbii fəlakətlərin, habelə istehsalatda, nəqliyyatda və məişətdə baş verən dəhşətli qəzaların nəticələrindən xilas etmək, ikincisi isə müharibə dövründə dinc əhalini və imkan daxilində iqtisadiyyatı qorumaqdır. Bu sahədə lazımi təcrübə qazanan ölkəmizin Xəzəryanı dövlətlərlə də yaxından əməkdaşlıq etməsi məqsədəuyğundur”.
Məhəmmədəli QƏRİBLİ
