Rusiya prezidenti Vladimir Putinin Federal Məclisə müraciətindən sonra ekspertlər bir məsələdə ortaq mövqe nümayiş etdirir. Bu da dünya miqyasında silahlanma ilə bağlı yeni təhlükəli yarışların başlanması ilə bağlıdır. Artıq Qərb ölkələri, xüsusən də ABŞ Putinin çıxışına sərt reaksiya verərək, müvafiq cavab tədbirləri görüləcəyini bildirib.
Xatırladaq ki, Putinin çıxışının təxminən yarısı ölkənin müdafiə potensialı və beynəlxalq təhlükəsizlik məsələlərinə həsr olunub. O, çıxışında Rusiyanın yeni nüvə silahlarından danışıb, ABŞ-ın “nüvə silahı ilə bağlı təhqiqat sənədində” yer alan ifadədən narahat olduğunu bildirib.
Rusiyanın yalnız müdafiə məqsədli nüvə silahlarını inkişaf etdirdiyini deyən Putin ölkəsinə və ya müttəfiqlərinə nüvə hücumu zamanı dərhal cavab veriləcəyini vurğulayıb. Onun sözlərinə görə, Rusiya indi nüvə başlığı daşıya bilən sualtı pilotsuz üzən aparata malikdir. Təyyarədaşıyan gəmiləri və sahil mühafizə obyektlərini məhv etməyə qadir olan yüksək sürətli aparat qitələrarası məsafəni qət edə və radarlardan yayına bilir. Rusiya prezidenti, həmçinin, heç bir ölkədə analoqu olmayan raketlərin istehsalından da danışıb: “Ötən ilin payızında hava hücumundan müdafiə vasitələri tərəfindən qarşısı alınmayan və dünyanın bütün nöqtələrini vura bilən raketlərin sınağını keçirdik”. Onun sözlərinə görə, Rusiyada 2017-ci ildə nüvə başlıqlı unikal raket sistemi yaradılıb. Dövlət başçısı 200 tona qədər çəkisi olan “Sarmat” ağır raketin sınaqlarından danışıb. Raket hipersəsli döyüş başlıqları da daşıya bilir. Hərbi ekspert, istefada olan polkovnik Viktor Litovkin “Russia Today” telekanalına müsahibəsində bildirib: “Bu tam raket deyil. Bu, “Sarmat” tipli strateji raketin nüvə döyüş başlığı üçün kiçik qabaritli mühərrikdir”. Ekspertin sözlərinə görə, belə raket gözlənilməz trayektoriya üzrə uça bilər: “Bu mühərrik sayəsində raket qeyri-məhdud məsafədə uça biləcək. Putin göstərdi ki, belə raketlərlə Yer kürəsinin istənilən nöqtəsinə zərbə vura bilərik”. Başqa bir yenilik rəqibin hərbi dəniz bazaları və sahil məntəqələrinə zərbə vurmağa imkan verən sualtı pilotsuz aparatdır. Viktor Litovkin qeyd edir ki, Rusiyada böyük dərinlikdə hərəkət edə bilən pilotsuz sualtı aparatlar hazırlanıb. Onlar qitələrarası məsafəni sürətlə qət etməyə qadirdir. Bu cür aparatlar ən müasir torpedalar, sualtı gəmilərin bütün növləri və hətta ən sürətli yerüstü gəmilərin sürətini üstələyə bilər.
Putinin sözlərinə görə, belə pilotsuz aparatlar rəqib üçün praktik olaraq əlçatmazdır. Hərbi ekspert İvan Konovalov bildirib ki, daha əvvəllər “Status-6” kimi məşhur olan nüvə pilotsuz aparatı amerikalılarda böyük qorxulara səbəb olur. Ekspertin fikrincə, bu qorxular onunla bağlıdır ki, aparat hər şeydən əvvəl çox böyük dərinlikdə hərəkət edir və gözə çarpmır: “Nüvə sualtı pilotsuz aparatları strateji silahlar üzərində nəzarət haqqında bütün razılaşmalardan kənardır. Belə sistemlər razılaşmaların imzalanması zamanı nə SSRİ, nə də ABŞ-da var idi. Bundan başqa, belə silah Birləşmiş Ştatlar üçün xüsusi təhdid təşkil edir. ABŞ əhalisinin əksəriyyəti Atlantik və Sakit okeanlarının sahillərində yaşayır. Bu ərazilərdə ən böyük sənaye mərkəzləri yerləşir. Rusiyada isə böyük şəhərlərin əksəriyyəti okeandan əhəmiyyətli dərəcədə uzaqdadır”. Putin tərəfindən elan edilmiş daha bir yenilik “Kinjal” aviasiya hipersəsli raket kompleksidir. Prezident qeyd edib ki, onun sınaqları müvəffəqiyyətlə başa çatdırılıb. Rusiya liderinin sözlərinə görə, bu silah rəqibin istənilən müdafiə sistemləri üçün praktik olaraq qarşısıalınmazdır. Putin çıxışında həmçinin bildirib ki, 2017-ci ildə qoşunlara döyüş lazer sistemlərinin verilməsinə başlanıb. Ekspert Dmitri Kornev qeyd edib ki, rəqibin optik sistemini sıradan çıxara bilən lazer sistemləri artıq var. Onun sözlərinə görə, belə sistemlərə “Sokol-Eşelon” kimi kompleks aiddir. Konovalov vurğulayıb ki, Rusiya öz sərhədlərində Hava Hücumundan Müdafiənin dərin eşelonlaşdırılmış sistemini yaradır. Rusiya Hərbi Elmlər Akademiyasının müxbir üzvi Sergey Sudakov qeyd edir ki, silahın ən yeni nümunələri haqqında Putinin söylədiyi fikirlər texniki sıçrayışı göstərir: “Bu gün hər hansı qızğın silahlanmanın erası bitdi. Hər halda, bizim boynumuza qızğın silahlanmanı qoymağa çalışırdılar. O sadəcə mənasız oldu”. Onun sözlərinə görə, Rusiyanın silahların yeni görüntülərini təqdim etməsindən sonra ABŞ-ın təyyarədaşıyan gəmiləri sadəcə üzən banklara çevrildilər: “Amerikanın təyyarədaşıyanları o qədər zəif oldular ki, onları sadəcə dünyanın hər hansı nöqtəsində güllələmək olar”. Konovalov vurğulayıb ki, ABŞ-ın özü də Rusiyanın nüvə silahları sahəsində daha öndə olduğunu etiraf edir: “Təsadüfi deyil ki, Tramp ötən ilin əvvəlində ABŞ-ın strateji nüvə güclərini yoxlamağa çağırdı. Çünki amerikalılar anladılar ki, bizdən geri qalırlar. Amerikalılarda nüvə mühərrikli nüvə sualtı pilotsuz aparatlar və ya raketlər yoxdur. Hipersəsli raket sistemləri isə hazırlanma mərhələsindədir. Amerikalılarda səsdən surətli raket yoxdur. Məşhur “Tomaqavk” raketi parovoz kimi çox yavaş uçur, onu hətta bizim “Pantsir”in köməyi ilə vurmaq olar”. ABŞ Müdafiə Nazirliyinin perspektivli tədqiqat layihələrinin idarəetmə başçısı Stiven Uoker baş verənlərə cavab olaraq vurğulayır ki, ABŞ hipersəsli texnologiyalar sahəsində iş aparır. Belə tipli silahın sınaq uçuşları 2019-cu ildə başlanacaq: “Biz anlayırıq ki, Rusiya və Çin kimi ölkələrlə yarışırıq”. O qeyd edib ki, idarəsi artıq bir neçə ildir Hərbi Hava Qüvvələri, NASA, Quru Qüvvələri və Hərbi Dəniz Qüvvələri ilə birlikdə hipersəsli silahın hazırlanması ilə məşğul olur. Onun sözlərinə görə, bu, Pentaqon qarşısında dayanan prioritet məsələdir. Uoker əlavə edib ki, idarə hələ 2017-ci ilin payızında bu sahədə tədqiqatlar üçün büdcənin artırılmasını xahiş edib.
NAHİD
