Fikrət Sadıqov: “Çox istərdim ki, bir sıra aparıcı ölkələrin aparıcı analitikləri belə bir qənaətə gəlsinlər”
Əsrlər boyu öz tolerantlığı ilə dünyaya örnək olan Azərbaycan bu gün də insani dəyərlərə, hüquqlara ən yüksək səviyyədə hörmət bəslənən ölkə kimi tanınmaqdadır. Bütün bunların əsasında azərbaycanlıların hər zaman digər xalqların nümayəndələri ilə qardaşlıq, dostluq münasibətləri çərçivəsində birgə yaşaması dayanır. Xalq olaraq digər azsaylı xalqlara, onların adət-ənənələrinə, tarixinə hörmətlə yanaşmışıq. Onlara qarşı ayrıseçkilik nümayiş olunmayıb.
Müşahidələr göstərir ki, Azərbaycan təkcə bu sahədə dünyaya örnək deyil. Azərbaycan həm də sosial-iqtisadi sahədə həyata keçirilən islahatların vəziyyətinə görə dünya üçün nümunə sayıla biləcək bir dövlətdir. Ölkədə son illər həyata keçirilən məqsədyönlü sosial-iqtisadi islahatlar nəticəsində qeyri-neft sektorunun inkişafında müsbət nəticələr əldə edilir. Bu, yoxsulluğun azaldılmasında, əhalinin etibarlı sosial müdafiəsinin təmin olunmasında özünü daha çox büruzə verir.
“BMT tərəfindən qəbul edilən və 17 sahəni əhatə edən “2030: Davamlı İnkişaf Hədəfləri” strategiyası ilə bağlı Azərbaycanda görülən ciddi işlər və bu sahədəki təcrübə BMT çərçivəsində təşviq edilməlidir”. Təsadüfi deyil ki, xarici işlər naziri Elmar Məmmədyarovla görüşündə qurumun Cenevrə bölməsinin baş direktoru Maykl Muller belə bir açıqlama ilə çıxış edib. O, Azərbaycanın BMT-nin fəal üzvlərindən biri olduğunu vurğulayaraq, ölkəmizin sürətli inkişafı və sosial-iqtisadi məsələlərin həllindəki qərarlarının nümunə olduğunu bildirib. Sosial-iqtisadi inkişaf və Davamlı İnkişaf Məqsədlərinin yerinə yetirilməsi sahəsində uğurlu siyasət aparan və tərəqqiyə nail olan ölkəmiz qurumun qlobal inkişafla bağlı təşəbbüslərində yaxından iştirak edir. Azərbaycanın milli inkişaf strategiyasını Davamlı İnkişaf Məqsədləri ilə uyğunlaşdırmaq üçün bir sıra dövlət proqramları qəbul olunub.
Ümumilikdə, Azərbaycanın sürətli inkişafı və sosial-iqtisadi məsələlərin həllindəki qərarlarının nümunə olduğunu ekspertlər necə şərh edirlər?
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Maykl Mullerin Azərbaycana yönəlik yanaşması həqiqəti əks etdirir. Politoloq bunu bir sıra tutarlı arqumentlərlə əsaslandırdı: “Nəzərə almaq lazımdır ki, Azərbaycan irimiqyaslı layihələrdə iştirak edir, ölkədə geniş sistemli islahatlar aparılır və bütün bunlar davamlı xarakterlidir. Reallıq ondan ibarətdir ki, bütün bu işlər Azərbaycanda kompleks şəkildə həyata keçirilir. Azərbaycan Avropanın enerji təhlükəsizliyini təmin edir. Bununla yanaşı, həyata keçirilən böyük transnəqliyyat layihələri göz qabağındadır. Böyük dövlətlərlə münasibətlər çərçivəsində bir sıra problemli məsələlər həll olunur. Əlbəttə, bütün bunlar dünyaya nümunə sayıla biləcək səviyyədədir və deyilənlər həqiqəti əks etdirir. Azərbaycan təkcə regionda yox, eyni zamanda, dünyada aparıcı bir oyunçuya çevrilir. Bunu danmaq, inkar etmək mümkün deyil. Görünür, BMT-nin Cenevrə bölməsinin baş direktorunun əlində bununla bağlı tutarlı faktlar var. Çünki onlar müqayisə edirlər, təhlillər aparırlar və sonra belə bir qərara gəlirlər. Yəni onların bununla bağlı yanaşması ciddi əsaslara söykənir. Ona görə ki, rəqəmlər və faktlar əsasında düzgün, obyektiv nəticə ortaya qoyurlar. Çox istərdim ki, bir sıra aparıcı ölkələrin aparıcı analitikləri belə bir qənaətə gəlsinlər”.
Vidadi ORDAHALLI
