Məhəmməd Əsədullazadə: “Bu onu göstərir ki, ermənilər də artıq Qarabağın işğal altında saxlanmasından beziblər”
“Qarabağı geri qaytar, Sarkisyan. Sən terrorçusan. Qarabağı qaytarmasan, nə baş verəcək özün bilirsən”. Məlum olduğu kimi, bu sözlərlə Ermənistan prezidentinə müraciət edən Ucar sakini, 9 yaşlı Mehdi Həsənovun videosu internetdə izlənmə rekordları qırır. Sözügedən video böyük marağa səbəb olub. Serj Sarkisyana müraciət ünvanlayan azyaşlı uşaq onu Ermənistan ordusunu Qarabağdan çəkməyə səsləyir. O, Sarkisyanı işğalçı siyasət aparmaqda günahlandırıb.
Bir müddət Rusiyanın Həştərxan şəhərində yaşamalı olan Mehdi Həsənovun bu videosunun ən azı oradakı sözlər qədər böyük tarixçəsi varmış. Məlum olub ki, Mehdi Rusiya kanallarında guya azərbaycanlıların erməni uşaqlarını öldürməsi xəbərini eşidir. Bundan sonra atasından bunun səbəbini soruşur. Atası Mayis Həsənov əsl həqiqəti oğluna başa salır. Bundan sonra Mehdi məktəbdə sinif yoldaşlarına ermənilərin azərbaycanlıları öldürdüyünü izah edir və hətta rayonlarının işğal tarixlərində məktəbdə bir neçə etiraz aksiyası da təşkil edir. Ancaq Mehdinin kiçik yaşında keçirdiyi bu aksiyalara görə oradakı ermənilər müxtəlif yollarla ailəyə təzyiq göstəriblər. Vəziyyət o həddə gəlib çatıb ki, hətta ailə başçısı məktəbə dəvət olunaraq təhdid edilib. Yaxınlarının köməkliyi ilə ailə Azərbaycana qayıdıb.
Bu hadisə özü də erməni xislətini ifşa edən bariz nümunədir. 9 yaşlı uşağı belə özlərinə təhdid hesab edən bu təfəkkürün daşıyıcıları, əslində, soyqırım kimi qətliamları törətməyə qadir olduqlarını sübut edirlər.
Diqqətçəkən məqamlardan biri də ondan ibarətdir ki, “YouTube”da böyük marağa səbəb olan həmin videonu çoxlu sayda erməni istifadəçi də paylaşıb. Eyni zamanda, onların sayı artr.
Maraqlıdır, erməni istifadəçilərin sözügedən videonu paylaşmasının səbəbi nə ilə bağlıdır? Məsələyə münasibət bildirən politoloq Məhəmməd Əsədullazadənin sözlərinə görə, belə məlum olur ki, erməni ictimaiyyətində torpaqların işğal olunmasına münasibət birmənalı deyil: “Yəni bu o anlama gəlir ki, müəyyən ermənilər bu işğala qarşıdırlar. Azərbaycanın 20 faiz ərazilərini işğal altında saxlayan Ermənistan hakimiyyətinə erməni cəmiyyətində münasibət birmənalı deyil. Görünür, bu işğalı qəbul etməyən ermənilər görüntüləri paylaşırlar. Azərbaycanda da ölkəmizə qarşı işğalçılıq və düşmən siyasəti aparan bir ölkə haqqında cəmiyyətin müxtəlif üzvləri öz münasibətlərini bildirirlər. Qeyd edim ki, Ermənistanın hazırkı prezidenti Serj Sarkisyan birbaşa Azərbaycanın ərazilərinin işğal olunmasında, xalqımıza qarşı soyqırım və etnik təmizləmədə iştirak edib. Hücumlara rəhbərliyi həyata keçirib. Ona görə də xüsusi olaraq Serj Sarkisyana ölkəmizdə ayrıca nifrət var. Ucar rayonundan olan uşağın rus dilində Serj Sarkisyana qəzəb dolu çağırışı bu nifrətin bariz sübutudur. Eyni zamanda, Sarkisyanın cinayətkarlığına qarşı bir qəzəbdir. Ermənistanda bunun kütləvi olaraq paylaşılması, bir növ, bu ölkədə Sarkisyana olan mənfi münasibətin göstəricisidir. Çünki bu ölkədə seçkilər olacaq. Xalqın ciddi etirazlarına rəğmən, Sarkisyan yenidən hakimiyyətdə qalmağı planlayır. Hesab edirəm ki, erməni cəmiyyəti indiki rejimdən kifayət qədər narazıdır. Bu videomüraciətin Ermənistanda yayılması göstərir ki, ermənilər də artıq Qarabağın işğal altında saxlanmasından beziblər. Çünki bu, Ermənistan vətəndaşlarının acınacaqlı durumda yaşamasının əsas səbəbidir”.
Vidadi ORDAHALLI
