Yeganə Hacıyeva: “Ancaq demokratiya və insan haqları ilə bağlı məsələlər çox da qabardılmayacaq”
Avropa Parlamentinin Beynəlxalq ticarət komitəsində Azərbaycanla Avropa İttifaqı (Aİ) arasında yeni saziş müzakirə olunacaq. Bu barədə Avropa Parlamentinin saytında məlumat verilib. 22-23 yanvar tarixlərində keçiriləcək iclasda “Azərbaycanla Avropa İttifaqı arasında hərtərəfli saziş üzrə danışıqlarla bağlı Avropa İttifaqına, Avropa İttifaqı Şurasına və Avropa Komissiyasına tövsiyələr” üzrə hesabat müzakirə olunacaq.
Hesabat finlandiyalı parlamentari Hannu Takkul tərəfindən təqdim ediləcək. Rumıniyalı parlamentari Norika Nikolai isə hesabatını yanvarın 23-də Xarici əlaqələr komitəsində təqdim edəcək.
Bu tövsiyələr nədən ibarət ola bilər?
Politoloq Yeganə Hacıyeva qəzetimizə açıqlamasında bildirdi ki, Avropa Parlamentində olduqca fərqli profillər üzrə fəaliyyət göstərən komitələr mövcuddur: “Həmin komitələrin ən başlıca vəzifəsi Avropa Parlamentinin standartlarını qorumaqdan ibarətdir. Yəni Avropa Şurasına üzv olan ölkələr tərəfindən bu standartların qorunmasına nəzarət funksiyasını həyata keçirir. Bu komitələr heç bir halda qanunverici səlahiyyətə və ya cəzalar tətbiq etmək ixtiyarına sahib deyillər. Sadəcə tövsiyə vermək kimi hüquqları var. Onlara hansısa tapşırıqların verilməsi isə sırf direktiv xarakter daşıyır. Yəni bu, sırf Azərbaycana bağlı olan məsələ deyil. Belə hallar Avropa İttifaqı ilə bütün istiqamətlər üzrə əməkdaşlıq edən ölkələrlə bağlı yaşanır. Azərbaycanla bağlı tövsiyələrin nədən ibarət olduğuna aydınlıq gətirmək istərdim. Aİ fərqli siyasi qrupların cəmləşdiyi bir məkandır. Orada anti-Azərbaycan qrupları da az deyil. Həmin qruplar Azərbaycan ətrafında gedən proseslərdən şou düzəltməkdə xüsusilə maraqlıdırlar. Ancaq onlardan hər hansı təzyiq gözləmək lazım deyil. Çünki deyilən mexanizm yoxdur. Tövsiyələr isə Avropa Birliyinin sırf ticarətlə bağlı olan standartlarına riayət olunması istəyindən irəli gəlir. Bu başlıca tələbdir. Ancaq demokratiya, təhlükəsizlik, mübadilə və əlbəttə, enerji sahəsində də Azərbaycana veriləcək tövsiyələr olacaq. Tövsiyələr hazır sənəd formasında tərəflərin diqqətinə çatdırılacaq. Təəssüflər olsun ki, tövsiyələrlə paralel olaraq xaricdə yaşayan bəzi azərbaycanlıların da bu istiqamətdə görmək istədiyi işlər var. Onlar çox çalışırlar ki, bu tövsiyələrin içində insan haqları, demokratiya məsələləri çox qabarsın. Amma Avropa İttifaqının və Avropa Şurasının yanaşması bundan ibarətdir ki, onların Azərbaycanla münasibətləri strateji xarakter daşıdığı üçün, ticarət, təhlükəsizlik daha prioritet təşkil edir. Demokratiya və insan haqları ilə bağlı məsələlər çox da qabardılmayacaq”.
Məhəmmədəli QƏRİBLİ
