Seyid Camal Əzimbəyli: “Ermənilərin tələskənlik etməsi də təsadüfi deyil”
Türkiyə Prezidenti Rəcəb Tayyib Ərdoğan fevralın 5-də Vatikana səfər edəcək. Ərdoğan Vatikanda Roma Papası Fransisklə görüşəcək. Görüşdə əsas müzakirə mövzusu Qüds məsələsi olacaq. Ərdoğan bu görüşdə Fransiskə Qüds məsələsində tutduğu mövqeyə görə təşəkkür edəcək. Görüşdə, həmçinin, Suriya və İraq məsələləri də müzakirə olunacaq.
Vatikandan sonra Ərdoğan Latın Amerikası ölkələrinə səyahət edəcək. O, səfər çərçivəsində Venesuela, Braziliya və Paraqvayda olacaq. Qeyd edək ki, Ərdoğanın Vatikan səfəri 59 il sonra prezident səviyyəsində ilk səfər olacaq.
Erməni təbliğatı isə belə məlumatlar tirajlayır ki, guya Ərdoğanın səfərinin başlıca məqsədi Papadan onları ermənilərlə barışdırmaq xahişi olacaq. Bu versiyanı nə dərəcədə əsaslı saymaq olar?
Şərqşünas Seyid Camal Əzimbəyli qəzetimizə açıqlamasında bildirdi ki, ermənilərin apardığı bu təbliğatın kökündə açıq türk düşmənçiliyi durur: “Ərdoğanın Vatikana səfəri tarixi addımdır. Bu səbəbdən də həmin səfərə böyük diqqət ayrılıb. Bu normaldır. Səfərlə bağlı indidən hansısa nəticənin çıxarılması düzgün olmazdı. Hesab edirəm ki, səfərdən sonra bu istiqamətdə dəqiq nələrisə söyləmək olar. Ermənilərin tələskənlik etməsi də təsadüfi deyil. Ürəklərindən keçənləri dilə gətirirlər. Ərdoğanın Papadan belə bir xahişi etməsinə zərurət varmı? Əvvəlcə bu suala cavab verməliyik. Təbii ki, yox! Çünki Ərdoğan bütün çıxışlarında bildirib ki, sərhədlərin açılması, Ermənistanla əlaqələrin qurulması yalnız Dağlıq Qarabağ probleminin həllindən sonra mümkün ola bilər. Sərhədlərin açılmasının intizarında daha çox ermənilərin olduğu nəzərə çarpır. Çünki onların vəziyyəti həddən artıq ağırdır. Ancaq qardaş ölkə olsaq da, etiraf etməliyik ki, Türkiyənin özündə də bu fikirdə olan adamlar var. Onlardan hətta hakimiyyətin daxilinə kimi gedib çıxanlar da mövcuddur. Həmin kateqoriya adamlar hesab edirlər ki, Türkiyənin Ermənistanla sərhədlərinin bağlı saxlanmasından Ankara uduzur. Buna baxmayaraq, istənilən hakimiyyət sərhəd mövzusu ilə ehtiyatlı davranır. Hesab edirəm ki, Ərdoğanın Papadan onları ermənilərlə barışdırmaqla bağlı xahiş edəcəyini iddia etmək tam yersizdir. Ağlıma belə gətirmirəm ki, xüsusilə də inanclı olan bir ölkə başçısı belə bir addım atsın. Hətta zənn etsək ki, o belə bir müzakirə aparmaq fikrinə düşə bilər, bu onun hakimiyyətdən getməsilə nəticələnə bilər”.
Məhəmmədəli QƏRİBLİ
