Elşən Həsənov: “ABŞ Ermənistanı kimdən qorumağa kömək edəcək?”
Ermənistan KİV-lərinin yaydığı məlumata görə, 16 yanvar tarixdə müdafiə naziri Vigen Sarkisyan ABŞ-ın həmin ölkədə akkreditə olunan səfiri Ricard Milsi qəbul edib. Bildirilir ki, görüş zamanı 2017-ci ildə Ermənistan-ABŞ arasında müdafiə sahəsində olan əməkdaşlıq müzakirə olunub və 2018-ci il üçün bu əməkdaşlığın əsas vektorları cızılıb.
Ermənistan müdafiə naziri qısa olaraq ABŞ-la gələcək əməkdaşlıq üçün nəzərdə tutulan və ordunun modernləşməsi ilə bağlı hazırlanan 7 illik planı səfirin diqqətinə çatdırıb. ABŞ səfiri də, öz növbəsində, ölkəsinin müdafiə qurumunun Ermənistanın Müdafiə Nazirliyilə əməkdaşlıqda maraqlı olduğunu bildirib. Onun sözlərinə görə, bu, hər iki tərəfin marağında olan məsələdir. 2018-ci ildə İrəvanda ikitərəfli ABŞ-Ermənistan müdafiə məsləhətləşmələrinin aparılmasına dair də razılaşma və gələcək münasibətlərin perspektivi istiqamətində razılıq əldə edilib.
Qeyd edilir ki, görüş zamanı regional problemlər ətrafında da müzakirə aparılıb.
ABŞ səfiri ilə Ermənistan müdafiə naziri arasında aparılan müzakirələrin mahiyyəti sual doğurmaya bilməz. Ermənistanı hansı təhlükə gözləyir ki, onlar ABŞ-la bundan qorunmağı müzakirə edir, gələcəkdə də müzakirə etməyi planlaşdırırlar?
Təhlükəsizlik məsələləri üzrə ekspert Elşən Həsənov qəzetimizə bildirdi ki, Ermənistanın son zamanlar atdığı addımların mahiyyətini anlamaq o qədər də çətin deyil: “ABŞ Cənubi Qafqazda möhkəmlənmək istəyir. Bu onun prioritetləri sırasındadır. Obama administrasiyasından fərqli olaraq, Tramp hökuməti bu istiqamətdə ciddi fəallıq nümayiş etdirir. Ancaq o da məlumdur ki, bu regionda Rusiyanın təsiri və marağı böyükdür. Ermənistan tam Rusiyanın nəzarətindədir. Digər iki Cənubi Qafqaz ölkəsi olan Gürcüstan və Azərbaycan haqda biz bunu deyə bilmərik. Bu iki ölkəyə Rusiyanın birbaşa təsir gücü zəifdir. Bilirsiniz ki, Ermənistanın iqtisadiyyatından tutmuş, müdafiəsinə kimi hamısı Rusiyanın əlindədir. Hazırda Ermənistan ərazisində Rusiyanın hərbi bazaları mövcuddur. Bununla yanaşı, Ermənistan KTMT deyilən bir hərbi quruma üzvdür. Həmin qurumda Rusiya da təmsil edilir. KTMT-nin başlıca amalı ora üzv olan ölkələrin müdafiəsini təmin etməkdir. Adından görünür bu. Ermənistanın ABŞ-la da bu istiqamətdə əməkdaşlıq etməsi olduqca maraqlı görünür. Belə çıxır ki, qızın iki adaxlısı var? Sual oluna bilər ki, ABŞ Ermənistanı kimdən qorumağa kömək edəcək? Bəllidir ki, ABŞ-ın bu istiqamətdə bir hədəfi var. O da Rusiyadır. ABŞ maksimum dərəcədə çalışır ki, xırda ölkələri Rusiyanın caynağından çıxarsın. Bu siyasət onun üçün bütün istiqamətlər üzrə prioritet təşkil edir. Ən maraqlısı isə Ermənistanın bu sevdaya niyə düşməsilə bağlıdır. Təbii ki, bu amil Rusiyanı narahat etməyə bilməz. Çünki Ermənistanın özünə başqa bir havadar axtarması xüsusən müdafiə sahəsində Rusiyanın birbaşa olaraq maraqlarına ziddir. Yəqin ki, yaxın vaxtda biz Rusiyanın bu məsələyə reaksiyasının şahidi olacağıq”.
Məhəmmədəli QƏRİBLİ
