Sarkisyanın baş nazirliyə hazırlaşdığı bir dövrdə Ermənistanda hakimiyyət əleyhinə qiyam olacağına dair edilən xəbərdarlıqların sayının çoxaldığı müşahidə olunmaqdadır. İddialardan belə bəlli olur ki, yaxın günlərdə düşmən ölkədə sosial zəmində yeni etiraz aksiyaları başlayacaq və bu, mövcud hakimiyyətin dəyişməsi ilə nəticələnəcək siyasi proseslərə çevriləcək.
Real vəziyyət göstərir ki, həqiqətən işğalçı ölkədə iqtisadi vəziyyət, belə demək olarsa, dalana dirənib. Bunu şərtləndirən səbəb odur ki, Ermənistan qonşuları ilə əməkdaşlıq etmir və bütün regional layihələrdən təcrid olunub. Eyni zamanda ölkəyə xaricdən göndərilən pul vəsaiti azalıb. Yerli istehsal yox dərəcəsindədir, yoxsulluq həddi durmadan yüksəlir. Bütün bunlar isə cəmiyyətin, müəyyən siyasi qüvvələrin və ictimai dairələrin narahatlığına səbəb olmaqdadır. Bu fonda xüsusi vurğulanır ki, ölkədəki acınacaqlı durum hər an sosial partlayışlarla nəticələnə bilər.
Erməni politoloq Levon Şirinyan isə “Lragir.am” saytına müsahibəsində qeyd edir ki, 10 gün sonra Ermənistanda qiyam ola bilər: “Biz kataklizmlərin istənilən an gələ biləcəyi situasiyada yaşayırıq. İnsanlar hələlik bahalaşmanı hiss etmir, hələlik yeni il ehtiyatları bitməyib, amma hökumət artıq indidən müzakirələrə başlayıb. 10 gün sonra hər şeyi hiss edəcəklər və o zaman qiyam olacaq. Bizim ölkə institutsional formada inkişaf etmir, onu oliqarxlar, psevdointilligentlər və hərbçilər idarə edir. Müxalif parlament partiyası olan "Yelk" aksiyaları təşkil edə bilsə, proseslər artan xətt üzrə gedə bilər”. Erməni eksperti əmindir ki, Ermənistanda istənilən sosial hərəkət və hərəkat hər an siyasi müstəviyə keçə bilər. Eyni mövqeni erməni iqtisadçı Artak Manukyan da bölüşür. O qeyd edib ki, Ermənistanda əhali 2018-ci ildə yaxşı heç nə gözləməsin: “Maksimum dərəcədə qənaət etmək lazımdır. Çünki ölkənin valyuta ehtiyatları tükənir”. Artak Manukyan onu da bildirib ki, Ermənistanda yoxsulluq pik həddədir, miqrasiya tempi isə əvvəlkindən də yüksəkdir: “Əhali iş tapa bilmir. Həyat səviyyəsi ildən-ilə aşağı düşür. Hökumət vətəndaşların rifahı üçün heç bir cəhd göstərmir. Perspektivi olmayan Ermənistanda insanlar çıxılmaz vəziyyətdə qalıb. İldən-ilə hökumətin xarici borcları da artır. Hakimiyyət xərclərini ört-basdır etmək, büdcədəki kəsirin qarşısını almaq üçün yeni kreditlər almaq niyyətindədir. Bununla isə Ermənistanın dövlət borcu 7 milyard dolları keçə bilər”. Artak Manukyan götürülən növbəti kreditlərdən də əhaliyə xeyir gəlməyəcəyini deyib: “Statistika xidmətinin son məlumatına görə, hazırda Ermənistanın xarici borcu 5,1 milyard dollar təşkil edir. Bu isə ümumi daxili məhsulun 58,8 faizi deməkdir. Ümumiyyətlə, xarici borc son 10 ildə 3,5 dəfə artıb. Hökumət büdcə kəsirini doldurmaq üçün dövlətin qızıl ehtiyatını satışa çıxarmaq məcburiyyətində qalıb”. İqtisadçılar bütün bunların Ermənistana yaxşı heç nə vəd etmədiyini deyir. Artak Manukyan isə belə vəziyyətdə sosial partlayışını olacağını açıq şəkildə vurğulayır.
Avropa Erməni Assosiasiyası Forumunun rəhbəri Aşot Qriqoryan da bildirir ki, Ermənistanda partlayış həddinə çatacaq situasiya yaranıb. Onun sözlərinə görə, bu situasiyanın hansı nəticələrə gətirəcəyi qeyri-müəyyəndir: “Qiyam realdır. Qan tökülməsinə izn vermək olmaz. Biz buradan hər şeyi diqqətlə izləyirik. Gərginlik mart-aprel aylarında kulminasiya həddinə çatacaq. Partlayış mütləq baş verəcək. Serj Sarkisyanın bunu öncədən dərk etməsi daha yaxşı olardı”. Xatırladaq ki, bundan öncə ölkədə qiyam olacağına dair erməni politoloq Manvel Sarkisyan da xəbərdarlıqla çıxış edib. O qeyd edib ki, yanacağın bahalaşması, nəqliyyatda gediş haqlarının artması qiyama gətirib çıxara bilər. Onun sözlərinə görə, yanacağın bahalaşması təkcə nəqliyyatda tariflərin artması ilə yekunlaşmır: “Bu, yük daşımalarının, eləcə də qida məhsulları da daxil olmaqla, bütün malların qiymətinin artması ilə nəticələnəcək. Qiyam özlüyündə neqativdir və bu, siyasi proseslərin yoxluğunun meyvəsidir. Xalq ayağa qalxır, qarşısına çıxanı süpürüb aparır, istədiyini edir. Onun qarşısını almaq mümkün olmur”. “İrs” partiyasının sədr müavini Armen Martirosyan da bundan öncə xəbərdarlıq edib ki, Ermənistanı bu il də çox ağır vəziyyət gözləyir və bu, qiyamla nəticələnə bilər: Beləliklə, edilən xəbərdarlıqlardan bu qənaətə gəlmək olur ki, Ermənistanı yaxın günlərdə müsbət heç nə gözləmir. Ölkədə qiyamın baş verməsi tamamilə gözləniləndir və yeni aksiyalara start verilməsi fonunda etiraz dalğasının miqyasının daha da genişlənməsi gözlənir. Bu isə hakimiyyətdə olan qüvvələrin devrilməsi ilə nəticələnmək iqtidarındadır.
Nahid SALAYEV
