Məhəmməd Əsədullazadə: “Bunun nəticəsində erməni işğalçıları mülki əhaliyə qarşı minalardan geniş istifadə edib”
Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) ötənilki fəaliyyətinin yekunlarına dair statistikanı açıqlayıb.
Sözügedən statistikadan məlum olub ki, ötən il agentlik tərəfindən hərbi əməliyyatların aparıldığı və işğaldan azad olunan torpaqlarımızda, habelə keçmiş hərbi sursat anbarlarının, hərbi poliqonların ərazilərində mina və partlamamış hərbi sursatların zərərsizləşdirilməsi əməliyyatları həyata keçirilib. Nəticədə ümumilikdə 92 milyon 843 min 672 kvadratmetr ərazi təmizlənib, 35 min 117 partlamamış hərbi sursat, tank əleyhinə 204 və piyada əleyhinə 35 mina aşkarlanıb. Əməliyyatlar zamanı 35 min 356 mina və partlamamış hərbi sursat beynəlxalq minatəmizləmə standartlarına uyğun qaydada zərərsizləşdirilib.
Agentlik tərəfindən 2017-ci il yanvarın 25-dən iyulun 3-dək Cəbrayıl rayonunun Cocuq Mərcanlı kəndində aparılan təmizləmə əməliyyatları uğurla başa çatdırılıb. Bu müddətdə ümumilikdə 4 milyon 590 min 878 kvadratmetr ərazi müxtəlif üsullarla yoxlanıb. Nəticədə 74 partlamamış hərbi sursat, piyada əleyhinə 26 mina və tank əleyhinə 140 mina aşkar olunaraq zərərsizləşdirilib. Agentlik tərəfindən Cəbrayıl rayonunun Cocuq Mərcanlı kəndinə çəkilməsi nəzərdə tutulan suvarma kanalının keçəcəyi ərazinin mina və partlamamış hərbi sursatlardan təmizlənməsi əməliyyatlarına ötən il noyabrın 17-də başlanıb. Otuz iki gündə 11 partlamamış hərbi sursat və piyada əleyhinə iki mina aşkarlanıb.
Bütün hallarda, təkcə ötən il 35 mindən artıq mina və partlamamış hərbi sursatın aşkar olunaraq zərərsizləşdirilməsi böyük rəqəmdir. Bu həm də minlərlə insanın xilas edilməsi deməkdir. Ən qəribəsi odur ki, indiyəcən beynəlxalq təşkilatlar buna hansısa münasibət bildirməyib. Halbuki, Azərbaycan ərazilərini mina və partlayıcı maddələrlə çirkləndirən işğalçı Ermənistandır. Belə olan halda, beynəlxalq qurumların bunu görməzdən gəlməsi təəssüf doğurur.
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bunu beynəlxalq qurumların ikili siyasət yeritməsi ilə əlaqələndirdi: “Ermənistanın Azərbaycana qarşı işğalçılıq siyasəti nəticəsində təkcə ərazilərimiz işğal olunmayıb. Bunun nəticəsində həm də mülki əhaliyə qarşı minalardan geniş istifadə edilib. Məhz ANAMA-nın bu illər ərzində mina təmizləmə əməliyyatı nəticəsində minlərlə partlayıcı və minanın zərərsizləşdirilməsi buna sübutdur. Qeyd edim ki, bu, Ermənistanın siyasi-hərbi rəhbərliyinin təkcə hərbçilərə qarşı deyil, ümumi olaraq Azərbaycan xalqına qarşı hərbi cinayətlərinin əyani sübutudur. Çünki Qarabağ müharibəsində Ermənistanın minalardan istifadə etməsi, bunu mülki yaşayış yerlərində yerləşdirməsi birbaşa müharibə cinayətidir. Təəssüf ki, beynəlxalq təşkilatlar səviyyəsində bu problemə ikili standartlardan baxılır. Halbuki, bu, humanitar böhranın yaranmasının əsas ilkin səbəbidir. Azərbaycanın minlərlə mülki sakini hələ də Ermənistan silahlı qüvvələrinin bu kimi təxribatlarına məruz qalır. Müxtəlif vasitələrlə Azərbaycan tərəfinə göndərilən partlayıcı mərmilər bu problemin aktuallığını saxlayır. Bunda Ermənistanın hədəfi cəbhə və sərhəd boyu yaşayış yerlərində yaşayan insanlarda qorxu yaratmaqdan ibarətdir. Hesab edirəm ki, ANAMA cəbhə bölgəsində yaşayan vətəndaşların təhlükəsizliyi üçün bütün zəruri işlərin öhdəsindən gəlir və düşmənin təxribatlarının qarşısını ala bilir. Atəşkəsə baxmayaraq, işğalçı ölkə öz çirkin əməllərindən əl çəkməyib. Ona görə də Azərbaycan beynəlxalq təşkilatlarda Ermənistanın davam etdirdiyi bu terror siyasətini qaldırmalı və bunu tutarlı arqumentlərlə əsaslandırmalıdır. Bəlkə o zaman beynəlxalq qurumlar buna lazım olan qiyməti versinlər”.
Vidadi ORDAHALLI
