Qabil Hüseynli: “Bizim də istəyimiz budur ki, BMT qərarlarının icra mexanizmində bir tərpənişə nail olaq”
Moldova hökuməti 2018-ci ildə GUAM-a sədrliyi müddətində prioritetlərini açıqayıb. Rəsmi Kişinyov bu il sədrlik çərçivəsində GUAM-ın azad ticarət zonasının fəaliyyətinin təmin edilməsi, Sahə əməkdaşlığının inkişafı üzrə Fəaliyyət Planına uyğun olaraq, iqtisadiyyat, nəqliyyat, energetika, enerji təhlükəsizliyi, turizm kimi sahələrdə sektoral qarşılıqlı fəaliyyətin aktivləşdirilməsi, təhsil, elm, tədqiqat və innovasiyalar sahələrində əməkdaşlığın və informasiya mübadiləsinin keyfiyyətinin təkmilləşdirilməsi, Kişinyovda yüksək səviyyəli görüşlərin təşkili yolu ilə siyasi dialoqun gücləndirilməsi və BMT-nin Baş Assambleyasının növbəti sessiyasında GUAM regionunda dondurulmuş münaqişələrin kollektiv həllinin təşviq edilməsi, GUAM+ formatında beynəlxalq əməkdaşlığın gücləndirilməsi və genişləndirilməsi kimi məsələlərə diqqət ayıracaq.
Eyni zamanda yayda Kişinyovda GUAM-a üzv ölkələrin hökumət başçılarının görüşünün və ilin ikinci yarısında GUAM Xarici İşlər Nazirləri Şurasının iclasının keçirilməsi planlaşdırılır.
Göründüyü kimi, Moldova GUAM-a sədrliyi dönəmində Dağlıq Qarabağ problemini BMT səviyyəsinə çıxarmaq niyyətini açıqlayıb. Əslində, bu, erməniləri çox narahat edən faktordur. Çünki onlar münaqişənin nizamlanma prosesinin ATƏT-in inhisarında qalmasını istəyirlər. Belə olan təqdirdə, Moldovanın səyləri hansı nəticəni verə bilər?
Politoloq Qabil Hüseynlinin fikrincə, Azərbaycan daim münaqişənin alternativ təsisatlarda da müzakirəsində maraqlı olub: “Bundan qorxan Ermənistandır. Çünki biz danışıqlar prosesindən substantivlik və intensivlik gözləyirik. Məzmunlu müzakirələrin aparılmasının tərəfdarıyıq. Ölkə başçısının da qeyd etdiyi kimi, görüş xatirinə danışıqları istəmirik. Ermənistan isə status-kvonu saxlamaqda maraqlıdır. Buna görə də hərdən bir bəhanə uyduraraq prosesdə qeyri-konstruktivlik ortaya qoyur. Bu baxımdan da Moldovanın GUAM sədri kimi səylərini alqışlayıram. BMT-nin məsələdə aktivliyinin artması yaxşıdır. Yadınızdadrsa, bir müddət əvvəl BMT Baş Assambleyasının 72-ci sessiyasının “Azərbaycanın işğal olunmuş ərazilərində vəziyyət”, “GUAM ərazisində həlli uzadılmış münaqişələr və onların beynəlxalq sülh, təhlükəsizlik və inkişafa təsiri”, “Milli və beynəlxalq səviyyədə qanunun aliliyi” və digər gündəlik mövzularına uyğun olaraq, Azərbaycanın BMT yanında Daimi Nümayəndəliyi tərəfindən BMT-nin baş katibi Antoniu Quttereşə Ermənistan-Azərbaycan Dağlıq Qarabağ münaqişəsi ilə əlaqədar məktub ünvanlandı. Həmin məktubda Ermənistanın Azərbaycana qarşı təcavüz və işğalının nəticələri, Ermənistanın beynəlxalq hüquqi məsuliyyəti, münaqişə ilə əlaqədar BMT Təhlükəsizlik Şurası və digər beynəlxalq təşkilatların qəbul etdiyi qətnamə və qərarlar, münaqişənin humanitar və başqa aspektləri, işğal olunmuş ərazilərdə qanunsuz əməllər və buna görə üçüncü tərəflərin məsuliyyəti və digər məsələlər müfəssəl şəkildə fundamental faktlarla izah olunub. Bundan əlavə BMT Təhlükəsizlik Şurasının qəbul etdiyi 4 qətnamə var ki, onların icrasına nail olunsa, Ermənistanın işğal siyasətinə son qoyular. Bu baxımdan da hesab edirəm ki, Moldovanın səyləri Dağlıq Qarabağ problemində kardinal dəyişikliyə səbəb olmasa da, BMT-nin fəallığını artıra bilər. Bizim də istəyimiz budur ki, BMT qərarlarının icra mexanizmində bir tərpənişə nail olaq”.
Məhəmmədəli QƏRİBLİ
