Qulu İsmayılov: “Bu halın baş verməsi Gürcüstanın öz suverenliyinə olan bir hörmətsizlik anlamına gələcək”
Gürcüstanla Rusiya arasında alternativ nəqliyyat dəhlizinin açılması ilə bağlı məlumatlar intensiv yayılmağa başlayıb. Təbii ki, bu hal Azərbaycanda narahatlıqla qarşılanır. Qeyd edək ki, Gürcüstanla Rusiya arasında gömrük məsələləri ilə bağlı müqavilə imzalanıb.
Sənəddə Yuxarı Lars nəqliyyat dəhlizinə alternativ olan Abxaziya və Cənubi Osetiyadan keçən yolların bərpası və istifadəsi nəzərdə tutulur. Yüklərin monitorinqi isə İsveçrə şirkətlərindən birinə tapşırılıb. Artıq Gürcüstan tərəfi ötən il dekabrın 19-da həmin şirkətlə nəzərdə tutulan müqaviləni bağlayıb. Rusiyanın da belə müqavilə bağlayacağı gözlənir. Gürcüstanın baş naziri Georgi Kvirikaşvili həmin marşrutdan yalnız fors-major hallarda istifadə ediləcəyini bildirib.
Hazırda Yuxarı Lars yolunda vəziyyətin olduqca acınacaqlı olduğuna dair məlumatlar yayılır. Bu isə həmin yolda fors-major vəziyyətin yarandığı anlamına gəlir ki, belə vəziyyət Ermənistana və Rusiyaya xüsusilə sərf edir. Belə qənaətə gəlmək olarmı ki, Yuxarı Lars yolundakı gərginliyin yaradılmasında bəzi qüvvələr xüsusilə maraqlıdır ki, Ermənistana nəfəslik verə biləcək digər iki alternativ yol açılsın?
Ekspert Qulu İsmayılovun sözlərinə görə, bu ideyanın üzərində uzun müddətdir iş aparılır: “Gürcüstan tərəfinin vəziyyəti aydındır. Onlar hər vəchlə alternativ yolların açılmasını istəməyib. Yalnız ötən ilin sonlarında bu məsələdə bir qədər yumşalma nəzərə çarpdı. Qeyd edildi ki, sözügedən yollardan yalnız fors-major hallarda istifadə oluna bilər. Ermənilərə və ruslara elə bu boşluq lazım idi ki, hərəkətə keçsinlər. Rusiya ilə Ermənistanı birləşdirən yeganə dəhliz olan Yuxarı Lars yolunda elə vəziyyət yaradılacaq ki, fors-major ortaya çıxsın. Təbii ki, Gürcüstan bunda maraqlı deyil. Onlara elə Yuxarı Lars yolunun işləməsi sərf edir ki, Ermənistan və Rusiyanın xahiş, bəzən isə tələblərindən yaxa qurtara bilsinlər. Lars yolundakı vəziyyətin gərginləşməsində maraqlı olan tərəflərdən biri də Ermənistandır. Məqsəd də bəllidir. Özlərinə əlavə nəfəsliklər açmaqla blokadanı yara bilsinlər.
Gürcüstan hökuməti birmənalı olaraq Azərbaycanın ərazi bütövlüyünü dəstəkləyir. Onların bizimlə strateji müttəfiqlik münasibəti də var. Amma bir faktı da unutmayaq ki, Ermənistan Gürcüstan üçün düşmən ölkə deyil. Onların yaxın qonşuluqdan irəli gələn mehriban münasibətləri var. Bu səbəbdən də bəzi məsələlərdə onların da razılığını qazanmaq istəyir. Ancaq həmin dəhlizlərin Ermənistanın üzünə açılması Gürcüstanın özü üçün də başucalığı gətirmir. Çünki söhbət Gürcüstanın işğal olunmuş Abxaziya və Cənubi Osetiya kimi ərazilərindən gedir. Bu halın baş verməsi Gürcüstanın öz suverenliyinə olan bir hörmətsizlik anlamına gələcək. Gürcüstan həmin hərəkəti ilə separatçı rejimlərlə münasibətləri bərpa etmək kimi addım atmış olar. Təbii ki, bu da ölkədə və Azərbaycanda birmənalı qarşılanmaz. Hesab edirəm ki, Yuxarı Larsda vəziyyətin necə olmasından asılı olmayaraq, Gürcüstan öz milli maraqlarını tapdalayıb Ermənistana əlavə nəfəslik açmamalıdır”.
Məhəmmədəli QƏRİBLİ
