Fikrət Sadıqov: “Etnik separatizmi kənardan qızışdırmaq istəyən qüvvələrə qarşı qətiyyətli mövqe sərgilənməlidir”
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov İsrailin “The Jerusalem Post” qəzetinə müsahibə verib. O, müsahibəsində bir sıra məqamlara toxunub.
Ə.Həsanov qeyd edib ki, etnik separatizm heç bir halda xalqların daxili ehtiyacından deyil, müəyyən siyasi qüvvələrin məhdud mənafelərindən və beynəlxalq dairələrin mövqeyindən qaynaqlanır: “Soyuq müharibə”nin başa çatmasından sonra keçmiş SSRİ məkanında etnik separatizm meyllərinin yeni dalğası meydana gəldi. Azərbaycanda Dağlıq Qarabağ, Gürcüstanda Abxaziya və Cənubi Osetiya, Moldovada Dnestryanı münaqişələr regionun sabitliyini hər an sarsıda biləcək potensial təhlükə mənbəyidir. Bu münaqişələr beynəlxalq hüququn prinsiplərinin kobud şəkildə pozulmasına, dövlətlərin ərazi bütövlüyü və suverenliyinin ciddi təhlükəyə məruz qalmasına gətirib çıxarır. Əgər beynəlxalq birlik, aparıcı dövlətlər etnik separatizmə qarşı qətiyyətli mübarizə aparmasa, proses daha geniş xarakter alaraq planetimizin böyük hissəsini irqi, milli və dini münaqişələr meydanına çevirə bilər”.
Ə.Həsənovun fikrincə, hazırda dini-irqi və milli dözümsüzlük, dağıdıcı separatizm kimi hallar insanları kütləvi şəkildə qaçqın və miqrant həyatı yaşamağa məcbur edir: “Qeyd edək ki, bu sahədə mövcud olan problemlərin çətinliyini Ermənistanın etnik təmizləmə və işğalçılıq siyasətinə məruz qalmış Azərbaycan daha yaxından anlayır. Azərbaycanın məruz qaldığı etnik təmizləmə və işğalçılıq siyasətinin nəticələrinin və dünyanın müxtəlif regionlarında milli zəmində cərəyan edən qarşıdurmaların təhlilinə əsasən əminliklə demək olar ki, etnik separatizm heç bir halda xalqların daxili ehtiyacından deyil, müəyyən siyasi qüvvələrin məhdud mənafelərindən və beynəlxalq dairələrin mövqeyindən qaynaqlanır”.
Həqiqətən də müşahidələr göstərir ki, dünyada separatizm meyllərini körükləyən müəyyən siyasi qüvvələrdir. Öz siyasi maraqlarını diqtə etməkdən ötrü separatizmdən bir təhdid vasitəsi kimi istifadə edirlər.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Əli müəllimin bununla bağlı səsləndirdiyi fikirlər reallığa söykənir: “Belə bir qənaətə gəlməyə tam əsas var. Ona görə ki, Azərbaycan uzun illərdir erməni separatizmindən əziyyət çəkir. Bizə qarşı separatçııq artıq bir müharibəyə dönüb. Nəticədə ölkə ərazisinin 20 faizi işğal olunub. Görünən odur ki, müəyyən xarici qüvvələr separatizmi qızışdırır və bundan istifadə edirlər. Ümumilikdə, separatçılıq bir sıra dövlətlərdə artıq bir xəstəlik kimi yayılır. Bunu həm Avropa dövlətləri, regiondakı digər dövlətlər anlayır, dərk edirlər. Separatizm, faktiki olaraq, dağıdıcı xarakter daşıyan bir hərəkətdir. Çünki separatizm hallarının arxasında adətən xarici qüvvələr dayanır. Onların içərisində ölkəyə qarşı dağıdıcı qüvvələr, ünsürlər var. Bütün bunlar özlüyündə artıq dərəcədə mənfi münasibətlərin dinc yolla həll olunmasında heç vaxt müsbət rol oynamayıb. Ona görə də separatizmə qarşı bütün səviyyələrdə ciddi mübarizə aparılmalıdır. Hesab edirəm ki, Avropa və digər regionlarda bunu dərk ediblərsə, o zaman belə hallara qarşı ortaya konkret mövqe qoyulmalıdır. Eyni zamanda, onlar Azərbaycanı anlamalı və bizə müəyyən dəstək verməlidirlər. Nəzərə almaq lazımdır ki, separatizmin qarşısı alınmayanda bu, digər ölkələrə də yayılır. Bu zaman daha ciddi problemlərin ortaya çıxmasına zəmin yaranır. Ona görə də istənilən separatizm hallarına qarşı güclü beynəlxalq iradə olmalıdır. Etnik separatizmi kənardan qızışdırmaq istəyən qüvvələrə qarşı qətiyyətli mövqe sərgilənməlidir. Yalnız o zaman bu məsələdə ciddi nəticələr əldə etmək olar”.
Vidadi ORDAHALLI
