Arzu Nağıyev: “İşğalçının beynəlxalq hüququn yanında yer alması cəfəngiyyatdır” İlqar Vəlizadə: “Bu addımlar İrəvanın siyasi kursunun nə dərəcədə zəif, qüsurlu olduğunun göstəricisidir”
BMT Baş Məclisində ötən cümə axşamı Qüdsün statusu ilə bağlı keçirilən kritik səsvermə bəzi mühüm nəticələri ortaya çıxardı. Məlum oldu ki, dünyanın 1 nömrəli superdövləti ABŞ-ın iradəsi heç də mütləqdir anlamına gəlmir.
Təsadüfi deyil ki, ABŞ prezidenti Donald Trampın Qüdslə bağlı naşı qərarını, Ağ Evin açıq-aşkar hədələrinə rəğmən, İsraildən savayı, cəmi bir neçə xırda ölkə - Honduras, Qvatemala, Marşal adaları, Mikroneziya, Nauru, Palaqo və Toqo (cəmi 9 ölkə) müdafiə edib. 35 dövlət, o cümlədən qonşu Gürcüstan bitərəf qalıb. 128 dövlət, yəni mütləq əksəriyyət, o sırada Azərbaycan, Avropa Birliyi ölkələrinin əksəriyyəti, Rusiya isə sənədi dəstəkləyib. Yəni Amerika faktiki şəkildə məsələdə tək qalıb.
Maraqlı məqamlardan biri də Qüdslə bağlı İstanbul zirvəsinin ardınca Türkiyənin müəllifi olduğu bu qətnamə layihəsinə işğalçı Ermənistanın da səs verməsi, beləliklə, beynəlxalq hüquqa özü də bilmədən sayğı sərgiləməsi olub. Ermənistanın bu davranışını necə izah etmək olar?
Ekspert Arzu Nağıyevin fikrincə də Ermənistanın BMT-də Qüdsü dəstəkləməsi və bununla da beynəlxalq qanunlara hörmət etdiyini göstərməyə çalışması işğalçının biabırçı siyasətini ortaya qoyub: “Azərbaycan BMT-də Trampın sözügedən qərarının əleyhinə səs verməklə və müttəfiqi Türkiyənin Qüds təşəbbüsünü dəstəkləməklə beynəlxalq hüquqa hörmətini bir daha nümayiş etdirdi. Bakı, bununla bərabər, Rusiya, İsraillə əlaqələrində də balansı qoruyur. Ancaq Ermənistan Qüds məsələsindən, sadəcə, bir vasitə kimi yararlandı. İşğalçının beynəlxalq hüququn yanında yer alması cəfəngiyyatdır. Ermənistan BMT-nin Dağlıq Qarabağa dair qətnamələrinə bu günədək məhəl qoymayıb və hələ də qoşunlarını Azərbaycan torpaqlarından çıxarmayıb. İrəvanın biabırçı siyasətini faş etmək üçün təkcə bu fakt yetərlidir. Fikir verin, işğalçı Trampın məlum qərarına qarşı çıxmaqla açıq-aşkar Qarabağa dair illərdir tutduğu mövqeyinin əleyhinə getdi”.
Politoloq İlqar Vəlizadə isə hesab edir ki, Avropa Birliyi, AŞPA və ATƏT çərçivəsində qəbul olunan müxtəlif bəyannamələrdə sözügedən qurumlara üzv olan ölkələrin ərazi bütövlüyü tanınır: “Ermənistanın imzası isə həmin sənədlərin altında var. Bəs onda Ermənistan necə olur ki, Azərbaycanın ərazi bütövlüyünü tanımır?! İrəvan beynəlxalq hüquq normlarını çox yaxşı bilir, ancaq bununla yanaşı, müxtəlif bəhanələrlə beynəlxalq hüququn aliliyini pozur. Erməni siyasi liderləri Qarabağ, Qüds və digər məsələlərdə öz addımlarını doğruldan əsaslar tapmağa çalışırlar. Bu addımlar İrəvanın siyasi kursunun nə dərəcədə zəif, qüsurlu olduğunun göstəricisidir”.
Məhəmmədəli QƏRİBLİ
