Ramil Hüseynov: “Çox təəssüflər olsun ki, aparıcı dövlətlər Dağlıq Qarabağdakı erməni separatizminə biganə yanaşırlar”
“Ermənilər bir çox ölkələrdə yaşayırlar. İndi əgər onlar yaşadıqları bütün ölkələrdə Azərbaycandakı kimi öz müqəddəratını təyin etmək arzusuna düşərlərsə və aqressiv separatizmə əl atarlarsa, onda baxarıq o ölkələrin siyasəti necə olacaq”. Bunu Prezident İlham Əliyev “2017 - İslam Həmrəyliyi İli: Dinlər və mədəniyyətlərarası dialoq” mövzusunda beynəlxalq konfransda çıxışı zamanı deyib.
Onun sözlərinə görə, xalqların öz müqəddəratını təyin etməsi məsələsi ölkələrin ərazi bütövlüyü çərçivəsində öz həllini tapa bilər: “Dünyanın əksər ölkələri çoxmillətli, çoxkonfessiyalı ölkələrdir. Ermənistan xalqı öz müqəddəratını təyin edib, onların öz dövlətləri var. İkinci erməni dövlətinin tarixi Azərbaycan torpaqlarında yaradılmasına Azərbaycan heç vaxt imkan verməyəcək. Bu, əslində, çox zərərli, təhlükəli və xəstə bir məntiqdir”.
Prezidentin çıxışından o da məlum olub ki, bu gün dünyada gedən proseslər bizim mövqeyimizi dəstəkləyir və gücləndirir: “Həm beynəlxalq hüquq, həm tarix, həm potensial baxımından bizim mövqeyimiz kifayət qədər güclüdür. Ancaq bu gün Avropa da separatizmlə üzləşir. Görün, Avropa ölkələrində separatizmə qarşı hansı addımlar atılır. Bizim problemimiz aqressiv separatizmdir. Əli silahlı erməni quldur dəstələri soyqırımı törətmişlər, zor gücü ilə torpaqlarımızı işğal etmişlər, günahsız insanları bu torpaqlardan qovmuşlar və bu gün bu torpaqlarda qanunsuz fəaliyyətlə məşğuldurlar”.
Prezidentin toxunduğu məqamlardan bir daha aydın oldu ki, dünyanın aparıcı dövlətlərində separatizmə yanaşmada ikili standartlar var. Çünki bənzər addımı ermənilər digər ölkələrdə atsalar, o zaman onlara qarşı daha sərt mövqe sərgilənəcək. Həm də Prezident erməni separatizminə qarşı Azərbaycanın ən sərt mövqe göstərmək haqqına malik olduğunu bu separatizmə dözümlü yanaşan bəzi dövlətlərin elitasına ən sərt və məntiqli bir mesaj formasında çatdırır.
Məsələyə münasibət bildirən VİP-in sədr müavini Ramil Hüseynovun sözlərinə görə, bu gün aparıcı dövlətlərin Dağlıq Qarabağdakı separatizmə sərgilədikləri biganə münasibət qəbuledilməzdir: “Vaxt gələcək bu, həmin dövlətlərin özləri üçün müəyyən problemlər yaradacaq. Nəinki böyük dövlətlər üçün, eyni zamanda dünya üçün təhdid mənbəyinə çevriləcək. Görünür, yaxın tarixdə Yuqoslaviyada baş verən dəhşətli hadisələr Avropa üçün dərs olmayıb. Bu gün bəzi Avropa dövlətlərində separatizm potensial təhlükə mənbəyinə çevrilməkdədir. İspaniyada baş verənlər deyilənlərə əyani sübutdur. Təkcə İspaniyada deyil, digər Avropa dövlətlərində də belə meyllər var. Bəzi dövlətlərdə bu, gizli səviyyədədir, amma potensial təhlükə mənbəyi olaraq qalır. Elə dövlətlər var ki, orada bu, süni formada dondurulub. Ermənilərə gəldikdə isə, onlar hansı ölkədə zəmin yaransa, buna cəhd edəcəklər. Çünki separatizm onların xislətinə xas olan xüsusiyyətdir. Sadəcə, buna zəmin yoxdur. Məsələn, Şimali Qafqazda xeyli sayda erməni yaşayır. Stavropol, Krasnodar şəhərlərində yüz minlərlə erməni yaşayır. Sadəcə, Rusiyadan qorxduqları üçün bu addımı atmırlar. Gürcüstanın Cavaxetiya bölgəsində zaman-zaman yaşananlar onların separatizmə nə qədər meylli olmalarının bariz göstəricilərindən biridir. Çox təəssüflər olsun ki, dünyada Ermənistan adda dövlət ola-ola aparıcı dövlətlər Dağlıq Qarabağdakı erməni separatizminə biganə yanaşırlar. Halbuki, bu, Cənubi Qafqazdakı sabitliyi ciddi şəkildə təhdid edir. Ona görə də dünya dövlətləri buna qarşı sərt mövqe ortaya qoymalıdırlar. Hansısa formal bəyanatların verilməsi, ümumi ifadələrin işlədilməsi yetərli deyil. Çünki bununla bağlı ortaya konkret mövqe qoyulmasa, sonra gec olacaq”.
Vidadi ORDAHALLI
