Vüqar Qədirov: “Ümid edirik ki, Avropanın fərqli təsisatlarının qəbul etdiyi qərarların icra mexanizmlərinin də şahidi olacağıq”
Avropa İttifaqı (Aİ) Azərbaycanın suverenliyini, müstəqilliyini, ərazi bütövlüyünü dəstəkləyir və Azərbaycanı özünə vacib tərəfdaş hesab edir. Bu barədə Avropa Xarici Əməliyyatlar Xidmətinin Avropa Komissiyası ilə birgə yaydığı Azərbaycana dair hesabatında deyilir.
Sənəddə bildirilir ki, Aİ 1994-cü ildə atəşkəs razılaşmasının imzalanmasından bu yana insan itkilərinin 2016-cı ildə ən yüksək həddə çatdığı Dağlıq Qarabağ münaqişəsi ilə bağlı ATƏT-in Minsk Qrupu həmsədrlərini, habelə sülh, etimad və münaqişənin qarşısını almaq tədbirlərini dəstəkləyir.
Daha bir Avropa təsisatının Azərbaycanın ərazi bütövlüyünü dəstəkləməsinə necə yanaşmaq olar?
Politoloq Vüqar Qədirov qəzetimizə bildirdi ki, Azərbaycanın bu məsələdə ən çox diqqətini çəkən Dağlıq Qarabağ məsələsində təşkilatın tutduğu mövqedir: “Avropa institutlarının dalbadal Azərbaycanın ərazi bütövlüyünü dəstəkləməsi təqdirəlayiqdır. Avropa İttifaqının qəbul etdiyi hesabat mühüm əhəmiyyət kəsb edir, amma qurumun bu istiqamətdə konkret addımlar atmasına ehtiyac var. Avropa Birliyi problemin beynəlxalq hüquq normaları çərçivəsində, sülh yolu ilə həllinə tərəfdar çıxdığını bəyan edib. Amma Azərbaycan hesab edir ki, bu mövqe bugünkü reallıq üçün azdır. Söhbət Ermənistanın Azərbaycan torpaqlarının bir hissəsini işğal etməsindən, orada silahlı qüvvələrini saxlamasından, ölkəmizin ərazi bütövlüyünü tanımamasından, onun suverenliyini qəbul etməməsindən gedir. Nədənsə Avropa Birliyi Ermənistana qarşı hər hansı bir ciddi mövqe göstərmir. Ermənistanın bu məsələdə ikili standartlar göstərməsi, özünü cəzasız hiss etməsi beynəlxalq hüquq normalarını saymamasına gətirib çıxarır”.
Politoloqun sözlərinə görə, Avropa Xarici Əməliyyatlar Xidmətinin Avropa Komissiyası ilə birgə yaydığı Azərbaycana dair hesabatında Azərbaycanın ərazi bütövlüyünün tanınması təqdirəlayiqdir: “Ancaq biz bir qədər də əməli fəaliyyət görmək istəyirik. Hazırda Avropa İttifaqının həm icraçı, həm də Avropa Parlamentinin qəbul etdiyi icbari sayılan sənədlərində bütün qonşu dövlətlərin ərazi bütövlüyü, sərhədlərinin toxunulmazlığı prinsipi əsasında dəstəklənməsi əks olunub. Bu, Avropa İttifaqının faktiki olaraq qonşuluqda baş verən münaqişələrə dair yeni vahid mövqeyinin formalaşmasını göstərir.
Avropa Parlamentinin qəbul etdiyi “Xarici işlər və təhlükəsizlik siyasətinə dair illik hesabat” mühüm sənəd hesab olunur. Məhz bu sənəd əsasında Avropa Komissiyasının vitse-prezidenti Federika Moqerini parlamentdə ildə iki dəfə olmaqla onun icrasına dair açıqlama verir. Bu baxımdan da ümid edirik ki, Avropanın fərqli təsisatlarının qəbul etdiyi qərarların icra mexanizmlərinin də şahidi olacağıq”.
Məhəmmədəli QƏRİBLİ
