Vəfa Heydərli: “Azərbaycandakı stabillik və insan haqları ilə bağlı real vəziyyət digər ölkələrə örnək kimi göstərilməlidir”
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov “The Financial Times” nəşrində Azərbaycanla bağlı irəli sürülən bir sıra iddialara münasibət bildirib.
Ə.Həsənov “Trend”ə açıqlamasında deyib: “The Financial Times” (FT) nəşrində “Avropa Şurası insan haqlarından imtina edir?” başlıqlı məqalədə Azərbaycanla bağlı irəli sürülən iddialar subyektiv xarakter daşıyır, qərəzlidir və müəyyən xarici anti-Azərbaycan dairələrin çirkin maraqlarına xidmət edir. FT və digər bu kimi tanınmış nəşrlərin bəlli dairələr tərəfindən süni şəkildə təşkil edilmiş qarayaxma kampaniyasına qoşularaq Azərbaycanı hədəf götürməsi, ardıcıl olaraq əsassız ittihamlarla çıxış etməsi yalnız təəssüf doğura bilər”.
Prezidentin köməkçisi qeyd edib ki, Azərbaycan dünyada demokratiya yolu ilə inkişaf edən, güclü iqtisadiyyata, yüksək beynəlxalq nüfuza malik, bütün azadlıqların təmin olunduğu ölkə, stabillik, təhlükəsizlik, tolerantlıq məkanı kimi tanınır: “Azərbaycan Respublikasının Prezidenti cənab İlham Əliyevin həyata keçirdiyi siyasət Azərbaycan xalqının milli maraqlarına xidmət edir və cəmiyyət tərəfindən hərtərəfli dəstək qazanıb. Azərbaycanda həm yerli, həm də Avropa İttifaqı ölkələrinə aid şirkətlərin apardıqları araşdırma bu faktı bir daha təsdiqləyir. Təsadüfi deyil ki, Hollandiyanın ACT LLC humanitar tərəfdaşlıq təşkilatı tərəfindən Avropa İttifaqının “Şərq Tərəfdaşlığı” proqramının sifarişi ilə keçirilən sorğunun nəticəsinə əsasən, Azərbaycan vətəndaşlarının 81 faizi hakimiyyətin həyata keçirdiyi siyasətə öz dəstəyini ifadə edib. Təbii ki, bu amil Ermənistan və erməni lobbisini, onların xaricdəki havadarlarını ciddi narahat edir. Bu qüvvələr bütün mümkün vasitələrdən istifadə edərək Azərbaycanın nüfuzunu ləkələməyə, beynəlxalq ictimaiyyətdə onun haqqında mənfi rəy formalaşdırmağa cəhd göstərirlər. FT kimi nəşrlərin bu dairələrin əlində vasitəyə çevrilməsi ciddi nöqsan, transmilli medianın müstəqilliyinə xələl gətirən haldır”.
Eyni arqumentləri Azərbaycan Prezidentinin xarici siyasət məsələləri üzrə köməkçisi - şöbə müdiri Novruz Məmmədov da “Twitter”dəki səhifəsində yazıb. N.Məmmədov qeyd edib: "Təəssüflər olsun ki, Qərbdə bir sıra mətbuat orqanları son 2-3 onillikdə özlərini beynəlxalq münasibətlərin aktorları kimi aparmağa başladılar. Özü də çox məkrli və qərəzli aktor kimi. Onlardan biri də "Financial Times"dır.
Amma bir həqiqəti anlamağın vaxtı çatıb ki, yalan, böhtan, qərəzli məlumatlar yaymaqla məşğul olan mətbu orqan artıq mətbu orqan olmaq missiyasını itirir. "Financial Times", şübhəsiz ki, bu sıradadır və bu gün beynəlxalq aləmdə yaranan gərginlikdə onun da məsuliyyəti var.
Əgər həqiqətən də sizin haqq-ədalətlə bağlı iddialarınız varsa, son 20-30 ildə dünyanın müxtəlif ölkələrində yüz minlərlə günahsız insanın həlak olması ilə bağlı obyektiv araşdırmaları ortaya qoyun! Gücünüz çatmır, yoxsa... illərlə problemi ilə məşğul olduğunuz Yaxın Şərqi "xoşbəxt etdiniz"?
Azərbaycana bir dəfə də olsun səfər etməyən, reallıqlardan xəbəri olmayan, Yaqland haqqında onun ölkəsində yayılmış məlumatlara göz yuman bu iki üzdəniraq müəllif özlərini hələ utanmadan professor, müstəqil ekspert hesab edirlər".
“The Financial Times” nəşrində Azərbaycanla bağlı səslənən fikirlərə ekspertlərin münasibəti necədir?
Ekspert Vəfa Heydərli qəzetimizə bildirdi ki, çox təəssüf ki, bəzi dünya KİV-ləri Azərbaycana qarşı qərəzli münasibətini davam etdirir: “Azərbaycan rəsmilərinin “The Financial Times” nəşrində dərc olunan yazıya reaksiyası ilə tanış oldum. Məsələnin gercək mahiyyəti çox sərrast şəkildə izah olunub. Gəlin bir detala nəzər yetirək. Bu hallar nə vaxt intensivləşməyə başlayır? Azərbaycan mövzusu gündəmdə olanda, ölkəmizdə mühüm yarışmalar və tədbirlər keçiriləndə. Artıq ölkəmizdə bu cür qarayaxmalarla bağlı imunitet yaranıb. Təcrübəmizdə bu cür halları görmüşük və bütün qarayaxmaların cavabı verilib. “Eurovision”, Avropa və İslam Oyunlarına evsahibliyi etdiyimiz dönəmlərdə də analoji böhtanlarla üz-üzə qaldıq. Ancaq bu cür çirkli kampaniyaların heç biri istədikləri nəticəni verməyib. Çox təəssüflə qeyd edirəm ki, əksər hallarda biz bu cür qarayaxmalarda dünyanın nüfuzlu nəşrlərinin də iştirakına şahid oluruq. Belə media quruluşları təbii ki, nüfuzlarını itirmiş olurlar. Çünki onların apardığı təbliğat sifarişə əsaslanır və heç bir peşəkar jurnalistika prinsiplərinə cavab vermir. Son yazıda iddia olunur ki, guya Azərbaycanda insan haqları kobud şəkildə pozulur və acınacaqlı durumdadır. Tamamilə absurd olan bir iddiadır. Hesab edirəm ki, Azərbaycandakı stabillik və insan haqları ilə bağlı real vəziyyət digər ölkələrə örnək kimi göstərilməlidir. Yaxşı olardı ki, həmin nəşr bu istiqamətdə araşdırma aparardı və ölkəmizdəki insan haqları ilə bağlı real vəziyyəti obyektiv təhlil edərdi. Bu qarayaxmanın indiki zamana təsadüf etməsi də aydındır. Cünki son iki ay ərzində Avropa institutları ard-arda Azərbaycanın ərazi bütövlüyünü dəstəkləyən bəyanatlar verirlər. Həmin dinamikanı aşağı salmaq üçün diqqəti kənara yönəldirlər”.
Məhəmmədəli QƏRİBLİ
