Yeganə Hacıyeva: “Kimsə bunu etsə, ya onun mövqeyinə düzəliş olunmalı, ya da həmin diplomat cəzalandırılmalıdır”
Məlum olduğu kimi, bir neçə gün əvvəl Avropa İttifaqının iki qurumunun Azərbaycanla bağlı məsələdə ziddiyyətli mövqeyi ortaya çıxdı. Qeyd edək ki, Aİ-nin Parlament Assambleyasının mövqeyindən fərqli olaraq, qurumun ATƏT-dəki daimi nümayəndəsi fərqli mövqe sərgiləmişdi. Artıq məsələyə aydınlıq gətirilib. Aİ-nin sözçüsü təşkilatın ATƏT-dəki nümayəndəliyinin fərqli mövqeyi ilə bağlı deyib ki, Azərbaycan Avropa İttifaqı üçün mühüm tərəfdaşdır və biz onun müstəqilliyini, suverenliyini və ərazi bütövlüyünu dəstəkləyirik.
Aİ-nin sözçüsü qeyd edib ki, təşkilat Azərbaycanın müstəqilliyinə, suverenliyinə və ərazi bütövlüyünə verdiyi dəstəyi Prezident Donald Tusk Prezident İlham Əliyevin 2017-ci ilin fevral ayında Brüsselə etdiyi səfər zamanı da ifadə edib.
Dağlıq Qarabağ münaqişəsinə gəldikdə isə, Aİ rəsmisinin sözlərinə görə, münaqişənin sülh yolu ilə həlli üçün Aİ-nin hərtərəfli və fəal iştirakı şübhəsizdir: "Biz bu fəaliyyətimizi əsasən Cənubi Qafqaz üzrə xüsusi nümayəndəmiz vasitəsilə, ATƏT-in Minsk Qrupunun həmsədrlərinin münaqişənin həlli üçün göstərdikləri səyləri dəstəkləməklə və öz əlavələrimizi etməklə yerinə yetiririk".
Təşkilatın sözçüsü qeyd edib ki, Aİ münaqişənin həlli yolunda etimad və sülhün bərqərar olmasına kömək edir və bu istiqamətdə Dağlıq Qarabağ münaqişəsinin sülh yolu ilə həlli naminə Avropa Tərəfdaşlığı Proqramını həyata keçirir.
Təşkilatın daxilində ziddiyyətli mövqenin ortaya çıxması və sonradan ona düzəliş olunması nə ilə bağlıdır?
Politoloq Yeganə Hacıyeva qəzetimizə bildirdi ki, belə vəziyyətin yaranmasını təxribat kimi dəyərləndirmək olar: “Gəlin məsələyə bir qədər obyektiv yanaşaq. Avropa İttifaqının ali orqanı bir qərarı qəbul edirsə, o qurumun bütün nümayəndəlikləri üçün də qəbul olunması məcburi xarakter daşıyır. Yəni ola bilməz ki, Aİ-nin ali orqanı Azərbaycanın ərazi bütövlüyünü tanıdığını rəsmən bəyan etsin, ancaq onun ATƏT-dəki nümayəndəsi fərqli mövqe söyləsin. Hətta kimsə bunu etsə belə, ya onun mövqeyinə düzəliş olunmalı, ya da həmin diplomat cəzalandırılmalıdır. Bunun başqa yolu da yoxdur. Hüquqi baxımdan bu mümkün deyil. Ancaq baş verən hadisədə mütləq təxribat izi axtarılmalıdır. Buna başqa ad vermək olmaz. Gördünüz ki, Aİ öz mövqeyini bir daha ifadə etdi. Görünür, qurumun ATƏT-dəki nümayəndəsi bu addımı erməni lobbisinin təsiri altına düşərək edib.
Son aylar ərzində biz doğrudan da Avropa institutlarının Azərbaycanla bağlı olduqca obyektiv qərarlar qəbul etdiyinin şahidi olduq. Bunun nümunəsi kimi “Şərq Tərəşdaşlığı” Sammitinin yekun qətnaməsi və Avropa Birliyinin qəbul etdiyi sənəddə Azərbaycanın ərazi bütövlüyünün tanınmasını göstərmək olar. ATƏT münaqişələrin həllində ümumilikdə fəaliyyətinin dövlətlərin ərazi bütövlüyünün dəstəklənməsinə xidmət etməsinin vacibliyini əsas götürür. Ancaq Azərbaycan nümayəndə heyətinin yaydığı bəyanatdan göründü ki, ATƏT-in daxilində heç də bütün nümayəndəliklər qurumun ortaya qoyduğu mövqeyə uyğun hərəkət etmir. Hesab edirəm ki, Azərbaycan nümayəndə heyətinin məlum narazılığı tam haqlı idi. Onlar bir faktı da nəzərə almalıdırlar ki, Dağlıq Qarabağ münaqişəsinin həlli ilə məhz ATƏT yaxından məşğul olur”.
Məhəmmədəli QƏRİBLİ
