“Azərbaycan problemin nizamlanması ilə bağlı öz mövqeyini konkret ifadə edib və çox haqlı olaraq bu istiqamətdə prinsipiallıq göstərir”
Əli Əliyev: “Yaxşı olar ki, Nalbandyan problemin kökünü özlərində axtarsın”
Ermənistanın xarici işlər naziri Edvard Nalbandyan Yunanıstanın “Etnos” qəzetinə müsahibə verib. Xarici işlər nazirinin müsahibəsinin mətni Ermənistan mətbuatında da tirajlanıb. Nalbandyan danışıqlar prosesinin dalana dirənməsinin günahını Azərbaycanın üstünə atmağa çalışıb. O qeyd edib ki, dəfələrlə beynəlxalq tribunalardan söylədiyi fikirlərin üzərində durur: “Mən danışıqlar prosesinə mane olan 9 başlıca səbəbi sadalamışam”.
Ermənistanın baş diplomatı bu səbəblər sırasına başlıca olaraq rəsmi Bakının guya Vyana və Sankt-Peterburq razılaşmalarına əməl etmədiyini aid edir. Əsasən də müşahidəçilərin sayının çoxaldılmasına Bakının etirazını qabardır. Nalbandyan sadaladığı səbəblər sırasına rəsmi Bakının guya atəşkəs rejimini tez-tez pozmasını da əlavə edir. Ermənistanın XİN rəhbəri utanmadan bəyan edir ki, Ermənistan danışıqlar və sülh prosesinə sadiqdir.
Nalbandyanın sadaladığı səbəblərlə bağlı biz Azərbaycan Xarici İşlər Nazirliyinin mövqeyini öyrənməyə çalışacağıq.
Vətəndaş və İnkşaf Partiyasının sədri Əli Əliyev qəzetimizə açıqlamasında bildirdi ki, Ermənistan tərəfi substantiv danışıqlardan yayınmaq üçün şərtlər və bəhanələr irəli sürür, cəbhədə gərginlik yaradır və açıq şəkildə sülh prosesini pozmaq siyasəti yürüdür: “Ermənistan Azərbaycanın işğal olunmuş ərazilərində hərbi mövcudluğunu möhkəmləndirmək istəyir. Bir sözlə, mövcud status-kvonu saxlamaq üçün müşahidəçilərin sayını artırmaqda maraqlıdır. Azərbaycan haqlı olaraq bununla razılaşmır. Ancaq, istənilən halda, Azərbaycanın danışıqlar prosesində mövqeyi daha konstruktiv təsir bağışlayır. Mən bunu bir müxalifət partiyasının rəhbəri kimi deyirəm. Azərbaycanın danışıqlardakı prinsipiallığını dəstəkləyirəm. Azərbaycan mərhələli həll planını qəbul edir, ancaq Ermənistan onu özü istədiyi formada həyata keçirmək istəyir. Dağlıq Qarabağın ətrafında olan Kəlbəcər və Laçın rayonlarından ümumiyyətlə söhbət açmaq istəmirlər. Nalbandyanın nəsə deməsində biz sensasiya axtarmalı deyilik. Çünki o, öz mövqeyindən danışmalıdır. Səhv olsa belə, özlərinə haqq qazandırmağa çalışacaq. Onlar bu mövqeyi uzun illərdir sərgiləyirlər. Atəşkəsin pozulması ilə bağlı aparılan monitorinqlərdən də görünür ki, bu istiqamətdə Ermənistan daha fəaldır. Azərbaycan problemin nizamlanması ilə bağlı öz mövqeyini konkret ifadə edib və çox haqlı olaraq bu istiqamətdə prinsipiallıq göstərir. Çünki Ermənistan işğal etdiyi ərazilərin bir hissəsini öz adına rəsmiləşdirməyə, sonra isə Qarabağın müstəqilliyini əldə etməyə çalışır. Bir sözlə, yaxşı olar ki, Nalbandyan problemin kökünü özlərində axtarsın”.
Məhəmmədəli QƏRİBLİ
