Vüqar Qədirov: “Avropa Parlamentinin yaratdığı komissiya Azərbaycanın ərazi bütövlüyünün təminatına mane olan faktorların nə ilə bağlı olduğuna dair hesabat hazırlamalıdır”
Aİ-nin ilk dəfə "Şərq Tərəfdaşlığı"nın bütün ölkələrinin ərazi bütövlüyünün onların beynəlxalq səviyyədə tanınmış sərhədləri çərçivəsində dəstəklənməsi üzrə öhdəliklərinə sadiqliyini təsdiq edən "Avropa İttifaqının xarici siyasət və təhlükəsizlik üzrə qətnaməsi"ni şərh edən Fransa Senatının Xarici İşlər Komitəsinin sədr müavini, senator Natali Qule deyib ki, Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Federika Mogerini Ermənistan-Azərbaycan Dağlıq Qarabağ münaqişəsinin nizamlanmasında daha da maraqlı olmalıdır.
N.Qule qeyd edib ki, nəhayət, Aİ "Şərq Tərəfdaşlığı" ölkələrinin ərazi bütövlüyünü dəstəkləyən bəyanat verdi.
Senator əlavə edib ki, indi bu bəyanatın konkretləşdirilməsini gözləmək qalır: "Mən fəaliyyətə üstünlük verirəm. Hesab edirəm ki, parlament diplomatiyası əsas alətdir. Biz Avropa Parlamenti ilə və bu məsələyə cəlb olunmuş və məlumatlı parlamentarilərlə birgə işləməliyik".
Göründüyü kimi, fransalı senator konkret addımlıarın atılmasını istəyir. Konkret fəaliyyət deyəndə senator Aİ-dən nəyi tələb edir?
Politoloq Vüqar Qədirov qəzetimizə bildirdi ki, Qulenin yanaşmasında böyük məntiq var: “İlk növbədə mən Avropa institutları tərəfindən qəbul olunan iki mühüm sənədin əhəmiyyətini yüksək dəyərləndirirəm və bunu Azərbaycan diplomatiyasının növbəti uğurları sırasına aid edirəm. Çox təəssüflər olsun ki, biz bu münaqişə boyu belə halları müşahidə etmişik. Biz bir çox mötəbər sənədlərə əməl olunmadığının şahidi olmuşuq. Buna misal olaraq ən ali sənəd kimi BMT Təhlükəsizlik Şurasının qəbul etdiyi 4 qətnaməni misal göstərə bilərik. Əsrin dördə biri qədər tarix keçməsinə baxmayaraq, hələ də həmin sənəd kağız üzərində qalıb. Bu baxımdan da Qulenin konkretlik tələb etməsi tam əsaslıdır. Avropa Parlamenti geniş səlahiyyətlərə malikdir. Özü qəbul etdiyi sənədə hörmətini ortaya qoymalıdır. İlk növbətə maraqlanmalıdır görək ölkələrin ərazi bütövlüyünün təmin olunmasına nə dərəcədə əməl olunur? Bu faktorun təminatı ilə bağlı özləri qərar qəbul edib. Qule parlamentarilərin konkret iş görməsini təklif edir. Hesab edirəm ki, ilk addım elə bununla bağlı olmalıdır. Avropa Parlamentinin yaratdığı komissiya Azərbaycanın ərazi bütövlüyünün təminatına mane olan faktorların nə ilə bağlı olduğuna dair hesabat hazırlamalıdır. Sonra həmin hesabat Aİ-də müzakirə olunub Ermənistanın qarşısına konkret şərtlər qoyulmalıdır. Bunun da nəticəsində Ermənistana vaxt verilməlidir ki, işğal faktını aradan qaldırsın. Əməl etmədiyi təqdirdə, Aİ həmin ölkəyə qarşı sanksiyaların tətbiqi tələbini ortaya qoyub bu barədə qərar çıxarmalıdır. Bax, bu olar konkret əməli fəaliyyət”.
Məhəmmədəli QƏRİBLİ
