Qabil Hüseynli: “Bizim üçün təhlükəsizliyin ən böyük təminatı Ermənistanın yerində oturdulmasıdır”
Tehranda Naxçıvan Muxtar Respublikasının Ali Məclisinin sədri Vasif Talıbovla görüşən İran parlamentinin spikeri Əli Laricani deyib ki, İran və Azərbaycan həmişə dost olacaqlar.
Ə.Laricani qeyd edib ki, İran-Azərbaycan əlaqələrinin tarixi çox qədimdir və bu iki ölkə həmişə bir-birini dəstəkləyib: "İran Azərbaycanla dostluqda ciddidir və biz həmişə dostlarımızın yanında olacağıq".
Spiker əlavə edib ki, iki ölkə arasında mədəni əlaqələrin yüksək səviyyəsi siyasi və iqtisadi əlaqələri də genişləndirməyə imkan verir: "Regionun hazırkı vəziyyəti elədir ki, biz siyasi və təhlükəsizlik sahəsində əməkdaşlığımızı genişləndirməli, regionda sülh və əminamanlığın bərqərar olmasına kömək etməliyik".
Xəzərin statusu məsələsinə də toxunan Ə.Laricani bildirib ki, bununla bağlı iki ölkənin rəhbərliyi arasında səmərəli danışıqlar olub: "Ümid edirik ki, Xəzər dənizi sabitlik və əməkdaşlıq üçün bir zəmin yaradacaq".
Öz növbəsində, V.Talıbov iki ölkənin dostluq münasibətlərindən danışıb və əlavə edib ki, Azərbaycan və İran arasında turist axınının artması da bu dostluğun göstəricisidir.
Laricaninin bəyanatında diqqətçəkən məqamlardan biri onun iki ölkə arasında siyasi və təhlükəsizlik sahəsində əməkdaşlığın genişləndirilməsi ilə bağlı işlətdiyi fikirlərdir. İran rəsmisinin bu yanaşmasını necə şərh etmək olar?
Politoloq Qabil Hüseynli qəzetimizə bildirdi ki, təhlükəsizlik böyük mənanı kəsb edir: “Çox güman ki, Laricani regional təhlükəsizliyi nəzərdə tutur. Çünki biz İranla eyni regionda yerləşirik. Bu regionda Suriya və Dağlıq Qarabağ kimi münaqişələr var. Bizi əhatə edən Qarabağ münaqişəsi digərindən qədimdir. Biz bu münaqişədə daha çox haqsızlığa uğramışıq. Bu yaxınlarda Qüdslə bağlı islam ölkələrinin qatıldığı zirvə toplantısında İlham Əliyev müsəlman ölkələrinə üstörtülü bir mesaj verdi. Bildirdi ki, məscidləri dağıdan, müsəlmanları qətlə yetirən Ermənistan kimi bir ölkə ilə heç bir islam ölkəsinin dostluq, hətta əməkdaşlıq etməyə haqqı yoxdur. Ancaq təəssüflə qeyd etməliyik ki, Ermənistana nəfəslik verən müsəlman ölkələri var. Azərbaycan İranın bu istiqamətdə Ermənistanla əməkdaşlıq etməsindən də narahatdır. Hər dəfə də bizim rəsmilər tərəfindən bu, İrana çatdırılır. Çox güman ki, Vasif Talıbovla keçirilən görüşdə də bu məsələyə toxunulub. Bu baxımdan da Laricaninin bəyanatının ruhundan hiss edilir ki, İlham Əliyevin ifadə etdiyi eyham onlara da çatıb. Onun bəyanatından bunu aydın görmək olur. Bizim üçün təhlükəsizliyin ən böyük təminatı Ermənistanın yerində oturdulmasıdır. İran ilk növbədə bu istiqamətdə addımlar atmalıdır. Bundan sonra əminliklə deyə bilərik ki, Laricaninin bəyanatının arxasında konkret addımlar da durur. Ümumən Vasif Talıbovla keçirilən görüşü, orada müzakirə edilən məsələləri və əldə olunan razılaşmaları müsbət dəyərləndirə bilərik”.
Məhəmmədəli QƏRİBLİ
