Yeganə Hacıyeva: “Avropa dövlət və qurumlarında təmsil olunan Azərbaycanın səfirlik, konsulluq, nümayəndəliklərində fəaliyyət göstərən diplomatların uğurlu xidmətidir”
Son iki ay ərzində Avropa institutları Azərbaycanla bağlı olduqca obyektiv qərarlar qəbul edir. Bunun bariz nümunəsi kimi Şərq Tərəşdaşlığı Sammitinin yekun qətnaməsi və Avropa Birliyinin qəbul etdiyi sənəddə Azərbaycanın ərazi bütövlüyünün tanınmasını göstərmək olar. Bunları Azərbaycanın diplomatiyasının uğurlu fəaliyyətinin nəticəsi saymaq olarmı?
Politoloq Yeganə Hacıyeva qəzetimizə bildirdi ki, Azərbaycan diplomatiyasının uğurlu fəaliyyətini danmaq olmaz: “Cənubi Qafqaz kimi geostrateji əhəmiyyətli regionun mühüm geoiqtisadi üstünlüklərə malik Azərbaycan dövləti, Avropa Birliyi, Avropa Şurası da daxil olmaqla, Avropa təhlükəsizlik və əməkdaşlıq strukturlarına siyasi və iqtisadi inteqrasiyanı , xarici siyasət strategiyasının əsas prioritetlərindən elan edib. Bütün addımlarında beynəlxalq hüquq norma və prinsiplərinə hörmət edən Azərbaycan məhz bu norma və prinsiplərdən çıxış edərək Dağlıq Qarabağ münaqişəsinin ölkəmizin ərazi bütövlüyü çərçivəsində və sülh yolu ilə həll edilməsinə çalışır.
Son bir neçə ildə Avropa təşkilatları və bu təşkilatlarda təmsil olunan müxtəlif siyasi, iqtisadi dairələrə bağlı lobbi qruplarının Azərbaycana qarşı sistemli fəaliyyətinin şahidi olmuşduq və misal kimi Avropa Şurası, AŞPA və sairə kimi qurumlardan 47 üzv dövlət arasında məhz ölkəmizə qarşı müstəsna ayrıseçkiliyi göstərə bilərik.
Sirr deyil ki, məhz bu prosesin arxasında Azərbaycanın siyasi rəhbərliyinin ölkənin ərazi bütövlüyü, suverenliyi, sərhədlərinin toxunulmazlığının təmin olunmasında, ölkənin iqtisadi resurs və ricaqlarının işlənməində dövlətin və xalqın milli maraqlarının nəzərə alınmasında prinsipial mövqeyi, həmçinin Ermənistanın Azərbaycana qarşı təcavüzü və Azərbaycan haqqında həqiqətlərin dünya miqyasında yayılmasının daha da gücləndirilməsi, erməni yalanlarının ifşa olunması, Azərbaycana qarşı bəzi məqsədyönlü əks-təbliğat əməllərinin qarşısının alınması istiqamətində prinsipial mövqeyinə qarşı olan bir fəaliyyət durur.
Ancaq 2017 ci il Avropa qrumlarında Azərbaycana qarşı fəaliyyət göstərən bu qrupların həmin fəaliyyətlərinin iflası və Azərbaycan diplomatiyasının qələbəsi ili kimi yadda qalacaq. Bu ilin qələbələrini sadalasaq, keçən ay Brüsseldə keçirilmiş və Prezident İlham Əliyevin Azərbaycanın diplomatik uğuru adlandırdığı Şərq Tərəfdaşlığı sammitinin birgə bəyannaməsi göstərə bilərik. Bu sənəddə, Avropa Birliyinin Xarici siyasət və Təhlükəsizlik üzrə Qlobal strategiyasının da müəyyənləşdirdiyi kimi, Azərbaycanın ərazi bütövlüyü, müstəqilliyi və suverenliyi birmənalı olaraq dəstəklənib.
Avropa Birliyinin Xarici siyasət və Təhlükəsizlik üzrə Qlobal strategiyasında qeyd edilir ki, Avropa İttifaqı gələcəkdə də Şərq Tərəfdaşlığı ölkələrində mövcud münaqişələrin həllində iştirak edəcək, ölkələrin suverenliyi, müstəqilliyi və ərazi bütövlüyü, sərhədlərin toxunulmazlığı və münaqişələrin sülh yolu ilə həlli Avropa təhlükəsizliyinin aparıcı elementləri olacaq.
Ardınca isə Avropa Ticarət Komissiyasının qurumun baş direktorluğu səviyyəsində Avropa Birliyi şirkətlərinin Azərbaycanın işğal olunmuş Dağlıq Qarabağ ərazilərində kommersiya fəaliyyətinin yaradacağı məsuliyyətlə, mümkün sanksiyaların tətbiqi ilə bağlı xəbərdarlığı xatırlada bilərik. Bu xəbərdarlığın mühümlüyü ondadır ki, bu prosesin məntiqi davamı kimi ikinci pillə məhz Azərbaycanın işğal altında olan ərazilərinə qanunsuz səfər edən avropalı deputat və məmurlara da xəbərdarlıq prosesi start götürəcək.
Qeyd etmək istədiyim digər uğurlu məqam isə, yuxarıda haqqında danışdığımız, ölkəmizə qarşı fəaliyyət göstərən qüvvələrin nisbətən güclü olduğu qurum olan Avropa Parlamentinın „Şərq Tərəfdaşlığı ölkələrində yer almış bütün münaqişələrin nizamlanması kontekstində istifadə olundu sadiq olduğunu təsdiqləyən sənədi - "Avropa Birliyi xarici siyasət və təhlükəsizliklə bağlı qətnamə"sinin qəbulu oldu. Bu sənəddə ən vacib məqam isə, əlbəttə, AP nin Avropa Birliyi xarici siyasət və təhlükəsizliklə bağlı doğan bütün öhdəliklərin Şərq Tərəfdaşlığı ölkələrində yer almış bütün münaqişələrin nizamlanması kontekstində istifadə olunacağı ilə bağlıdır.
Digər uğurlu məqam ATƏT Parlament Assambleyasının sərgilədiyi yeni yanaşma ilə bağlıdır. Yeni yanaşma ondan ibarətdir ki, ATƏT Parlament Assambleyası Azərbaycan, Ukrayna, Gürcüstan, Moldova ərazi münaqişələrlə bağlı yeni mövqeyi, münaqişlərin müzakirəsi və beynəlxalq hüquqla tanınmış ərazilərin işğalı faktının müzakirəsinin vacibliyini və ATƏT münaqişələrin həllində ümümlikdə fəaliyyətinin dövlətlərinin ərazi bütövlüyün dəstəklənməsinə xidmət etməsinin vacibliyi haqqındadır.
Yuxarıda sadaladığımız uğurlar, əlbəttə, Prezident İlham Əliyev və onun rəhbərliyi ilə uğurlu xarici strategiya işləyib hazırlayan komandası və bu strategiyanı uğurla həyata keçirən Avropa dövlət və qurumlarında təmsil olunan Azərbaycanın səfirlik, konsulluq, nümayəndəliklərində fəaliyyət göstərən diplomatların uğurlu xidmətidir”.
Məhəmmədəli QƏRİBLİ
