Vüqar Qədirov: “İstərdik ki, səfirin bəyan etdiyi istiqamət üzrə ölkəsindən əməli hərəkətlər görək”
Fransanın Ermənistandakı səfiri Conatan Lakot mətbuat konfransında deyib ki, Dağlıq Qarabağ münaqişəsinin dondurulmuş münaqişələr kateqoriyasına aid etmək çətindir. Səfir deyib: “Münaqişənin cəmiyyətə hansı dərəcədə yansıdığını görmək məni təəccübləndirdi. Təmas xəttində bir çox hərbçi həlak olur. Əgər mənə məlumatı düz veriblərsə, bu il ərzində 57 əsgər ölüb”. Səfir qeyd edib ki, münaqişə dondurulmuş yox, real münaqişədir və iqtisadiyyata, insanlara təsir edir. “Bu bizi narahat edir” - deyə səfir əlavə edib. Onun sözlərinə əsasən, Fransa ATƏT-in Minsk Qrupunun həmsədri kimi öhdəliklərini yerinə yetirməkdə qətiyyətlidir. Bununla yanaşı, diplomat bildirib ki, münaqişə hərb yolu ilə həll edilə bilməz: “Danışıqlar prosesinin mərkəzində 3 prinsip var - güc tətbiq edilməməsi, ərazi bütövlüyü və xalqların müqəddəratını həll etməsi. Fransa Cenevrədə prezidentlərin və XİN rəhbərlərinin Vyana görüşünün nəticələrini təqdir edir, növbəti ildə də görüşlərin keçiriləcəyini gözləyir. Fransa münaqişəni yüksək səviyyədə izləyir. Vasitəçilik roluna sadiqdir. Problemin həlli isə ancaq tərəflər arasında ola bilər”.
Fransanın Ermənistandakı səfirinin Qarabağ münaqişəsini dondurulmuş deyil, real adlandırması hansı anlama gəlir?
Ekspert Vüqar Qədirovun sözlərinə görə, Fransanın Ermənistandakı səfiri çox doğru olaraq bu faktı qeyd edib: “Ermənilər çalışırlar ki, status-kvonu belə də qoruyub saxlasınlar. Münaqişəni dondurulmuş kimi qələmə vermək onların marağına uyğundur. Biz dəfələrlə bəyan etmişik ki, Ermənistan tərəfi qoşunların təmas xəttində əldə olunmuş atəşkəs rejiminə əməl etmir. Səfir çox doğru olaraq qeyd edib ki, cəbhədə insanlar ölürsə, münaqişəni necə dondurulmuş saymaq olar? Səfir ölkəsinin münaqişə ilə məşğul olan formatda təmsil olunduğunu dilə gətirib. Ancaq səfirin fikirlərində təzad da görünür. O deyir ki, münaqişə hərbi yolla həll edilə bilməz və Fransa bunun həllində qətiyyətlidir. Onda bir yol qalır ki, o da Ermənistanı sülh yolu ilə işğaldan əl çəkməyə vadar etmək. Çox təəssüflər olsun ki, Fransa da daxil olmaqla, həmsədrlər bunu etmirlər. Yalnız bəyanatlar verməklə iş düzəlmir. Biz uzun illərdir belə çeşidli bəyanatların verildiyinin şahidi oluruq. İstərdik ki, səfirin bəyan etdiyi istiqamət üzrə ölkəsindən əməli hərəkətlər görək. Bax onda bir irəliləyiş olar. İstənilən halda, bu açıqlamanı normal qarşılayıram. Çünki həqiqət etiraf olunub”.
Məhəmmədəli QƏRİBLİ
