Zaur İbrahimov: "Bu baxımdan ABŞ-ın İranla konfrantasiyaya gedəcəyi inandırıcı görünmür"
Trampın ABŞ-ın yeni prezidenti seçilməsindən sonra həmin ölkənin bəzi dövlətlərlə münasibətlərinin korlanacağına dair fikirlər səsləndirilir. Bu sırada İranla əldə olunan nüvə razılaşması da qeyd edilir. Qeyd edək ki, bu razılaşma Obamanın prezidentliyi dönəmində əldə olunub.
Tramp həmin sənədi əldə olunan razılaşmanın ən pisi adlandırıb. Bildirilir ki, Tramp üçün İranla əldə edilən razılaşmadan imtina prioritet olacaq. Çünki bu barədə onun özü məlumat verib. Analitiklərin fikrincə, belə bir addımın atılması ABŞ üçün Yaxın Şərqdə ciddi problemlər yarada bilər.
İranın xarici işlər naziri Trampı bu məsələdə diqqətli olmağa çağırıb və həmin sənəddə olan imzalara hörmətlə yanaşmağı tələb etdib.
Trampın İranla ABŞ arasında əldə olunan razılaşmanı pozacağı nə dərəcədə real görünür?
Ekspert Zaur İbrahimovun sözlərinə görə, Trampın ABŞ prezidenti seçilməsi ABŞ-ın xarici siyasətində də əhəmiyyətli dəyişikliklərə səbəb olacaq. Ola bilsin ki, bu tədricən baş verəcək, amma ABŞ xarici siyasətində dəyişikliklər qaçılmazdır.
Oturuşmuş sistemlərdə belə, liderin şəxsiyyəti, baxışları böyük rol oynayır. Bu baxımdan ABŞ xarici siyasətində də yaxın 4 il ərzində dəyişikliklər gözləməyə dəyər.
Trampın seçkiqabağı kampaniya zamanı söylədiklərini xatırlasaq, ehtimal etmək olar ki, Vaşinqton bundan sonra öz tərəfdaşlarını daha çox məsuliyyət götürməyə dəvət edəcək. ABŞ-Çin rəqabəti daha da güclənə bilər. Avropa İttifaqı xarici siyasət məsələlərinə daha çox diqqət yetirməli və risqlərin önlənməsində ABŞ-a daha çox yardım etməli olacaq. İran İslam Respublikasının prezidenti Həsən Ruhani bildirib ki, ABŞ-da prezident seçkilərinin nəticəsi İranın siyasətinə təsir etməyəcək. Yaxın Şərqdə ABŞ-ın siyasətindən imtina edəcəyini gözləmək sadəlövhlük olar. Çünki Suriya məsələsi hələ tam çözülməyib. Bu baxımdan da ABŞ-ın İranla konfrantasiyaya gedəcəyi inandırıcı görünmür".
Məhəmmədəli QƏRİBLİ
