Qardaş Türkiyə üçün böyük təhdid mənbəyi sayılan FETÖ terror təşkilatının rəhbəri Fətullah Gülənlə bağlı məsələ yaxın tezlikdə Ankaranın maraqları çərçivəsində çözülə bilər. Söhbət Gülənin Ankaraya təhvil verilməsindən gedir.
ABŞ-da məlum hakimiyyət dəyişiklyindən sonra Ankaranın buna ümidləri artıb. ABŞ-ın yeni seçilən prezidenti Donald Trampı qələbə münasibətilə təbrik edən Türkiyənin baş naziri Binəli Yıldırım da artıq Gülənin onlara təhvil veriləcəyinə ümidlərini gizlətməyib. Yıldırım təbrikində Türkiyədə iyulun 15-də uğursuz dövlət çevrilişinə cəhdin başında duran və hazırda ABŞ-da yaşayan Fətullah Gülənin tezliklə ölkəsinə ekstradisiya edilməsinə çağırıb: "Əminəm ki, ABŞ-la əlaqələri pozan dövlət çevrilişinin səbəbkarını tez bir zamanda ölkəmizə ekstradisiya etsəniz, bu, iki ölkə üçün yeni başlanğıc olacaq". Onun sözlərinə görə, Gülən və onun hərəkatı Ankara-Vaşinqton münasibətlərinə mənfi təsir göstərir: "Mən əminəm ki, ABŞ qısa müddətdə Güləni ekstradisiya etsə, münasibətlərdə yeni səhifə açılacaq".
Maraqlıdır ki, məhz belə bir vaxtda Donald Trampın təhlükəsizlik və kəşfiyyat üzrə sözçüsü, general-leytenant Maykl Flayn Türkiyə ilə əməkdaşlıq münasibətlərini bərpa etmək üçün xarici siyasətdə bəzi tənzimləmələrə ehtiyac olduğunu deyib. Trampın quracağı yeni kabinetdə vəzifə alacağı iddia edilən Flaynın ABŞ-ın "Hill" saytında "Müttəfiqimiz Türkiyə böhran içindədir, dəstəyimizə ehtiyacı var" başlıqlı məqaləsi dərc olunub. Barak Obamanın Ankaranı kifayət qədər anlamadığını qeyd edən Flayn Türkiyənin Amerikanın maraqları baxımından önəmli bir ölkə, eləcə də İraq və Suriyada İŞİD-lə mübarizədə ən güclü müttəfiq olduğunu bildirib. FETÖ terror təşkilatının rəhbəri Fətullah Gülənlə bağlı məsələlərə də toxunan sözçü onu Bin Ladenə bənzədib: "Biz Fətullah Gülənə sığınacaq verməklə ən böyük müttəfiqimizi itiririk. 11 Sentyabr hadisələrindən sonra Türkiyənin Üsamə bin Ladenə sığınacaq verdiyini öyrənsəydik, nə edərdik? ABŞ terrorçuları Türkiyəyə verməlidir".
ABŞ-ın Ankaradakı səfiri Con Bass isə Donald Trampın bu istiqamətdə hansı addımlar atacağının hələ qətiləşmədiyini qeyd edir. Səfir Trampın qələbəsini sürpriz adlandıraraq, bu xüsusda bildirir: "Bu, sürpriz nəticədir. Trampın FETÖ siyasətinin necə olacağını indidən demək çox çətindir. Nə olacağını biz də bilmirik". Amma son məlumatlar göstərir ki, Trapmın fəaliyyəti ABŞ-a da ciddi zərər vurur. Özü də təkcə Türkiyə ilə münasibətlərin korlanması baxımından yox, həm də iqtisadi müstəvidə. Belə ki, məlumatlara görə, FETÖ təşkilatının üzvü olan müəllimlər maaşlarının bir hissəsini hər ay Fətullah Gülənə verir. "Amsterdam və Partners" hüquq qurumunun idarəçisi Robert Amsterdam ABŞ-ın Miçiqan Universitetində təşkil olunan konfrans zamanı Gülənin bu il ABŞ-dan yarım milyard pul oğurladığını bildirib: "Gülən ABŞ-ın 26 ştatında yerləşən 140-dan çox təhsil ocağında 60 min şagirdə təhsil verir. Bu yolla da ölkə iqtisadiyyatından təxminən yarım milyard dollar çəkir. FETÖ, həmçinin, Türkiyənin gələcəyi, azadlığı üçün ən böyük təhlükədir".
Bununla yanaşı, Fətullah Gülənin Türkiyəyə ekstradisiya edilməsi ilə bağlı bəzi iddialar ortaya çıxıb. Türkiyəli jurnalist Tolqa Tanış qeyd edir ki, Türkiyənin ədliyyə naziri Bəkir Bozdağ ABŞ-dan həmkarı ilə görüşüb. Görüşdə Fətullah Gülənin Türkiyəyə qaytarılması müzakirə edilib. Tolqa Tanışa türk və amerikalı mənbələrin verdiyi məlumata görə, Fətullah Gülənin ölkəsinə təhvil verilməsi Barak Obamanın prezidentlikdən getməsindən sonra baş tuta bilər. Qeyd edək ki, 2017-ci ilin yanvar ayında Obamın prezidentlik dönəmi başa çatır. Bütün bunlar Gülən probleminin gələn ilin əvvəlində Türkiyə üçün həll olunacağını göstərir.
Xatırladaq ki, Gülən hazırda yaşadığı Pensilvaniya ştatından köçməyə qərar verib. İddialara görə, Gülən Vaşinqton yaxınlığında yerləşən Virciniya bölgəsinə köçəcək.
ABŞ-ın Virciniya əyaləti isə Gülən məktəblərinin, dərnəklərinin və fondlarının geniş fəaliyyət göstərdiyi bölgələrdən biridir. Həmçinin, Virciniyada Gülənə bağlı olan Amerika Türk Dostluq Dərnəyi (ATFA), Türk İslam Araşdırmaları İnstitutu, Şimali Virciniya Təhsil Vəqfi, Türk Amerikan Alimləri Cəmiyyəti, Turkuvaz Vəqfi, Vaşinqton Təhsil Vəqfi kimi təşkilatlar fəaliyyət göstərir. Hazırda Türkiyə hökumətinin 15 iyul hadisələrinə görə casusluq ittihamı ilə axtardığı FETÖ rəhbərlərindən biri Emre Uslu da ən son Virciniyada görünüb.
Tahir TAĞIYEV
