Günel Fərhadqızı: "Borcun artıq ümumdaxili məhsulun yarısına çatması isə Ermənistanda defoltu qaçılmaz edir"
Ermənistanda hökumət üzvlərinin böyük əksəriyyətinin yeni şəxslərlə əvəz edilməsindən sonra belə bu ölkədə sosial-iqtisadi vəziyyətin yaxşılaşacağına yenə də heç bir ümid yoxdur. Ermənistan KİV-i vəziyyətin çox kritik olması, hətta defoltun gözlənildiyi barədə həyəcan təbili çalır. Bildirilir ki, dövlətin borcu ÜDM-in yarısına bərabərdir.
Belə vəziyyətdə Ermənistan iqtisadiyyatını nə gözləyir?
İqtisadçı Günel Fərhadqızı qəzetimizə açıqlamasında bildirdi ki, dövlət borclarını bağlamaq üçün Ermənistanda müvafiq iqtisadiyyat yoxdur: "Ekspertlər təkcə dövlət borcunun sürətli artımından deyil, həm də borcun iqtisadi artımı üstələdiyindən narahatdır. Dövlət borcu hər ay, demək olar, 40-50 milyon dollar çoxalır və ilin axırında təxminən 6 milyard dolları keçəcək. İqtisadi inkişaf proqramının olmadığı, iqtisadiyyatda durğunluq, investisiyaların önəmli azalması kimi amillərin birgə fonunda hesab olunur ki, Ermənistanın dövlət borcu ölkənin iqtisadi durumunu təhlükə altında qoyur
Əslində, borc öhdəlikləri başqa borclar hesabına yerinə yetirildiyindən, ölkənin xaricdən iqtisadi asılılığı da sürətlə artır. Əsas səbəb isə odur ki, Ermənistanda dövlət adına heç nə qalmayıb, sanballı dövlət müəssisələrinin əksəriyyəti xarici şirkətlərə satılıb. Amma hazırda onlar da işlək vəziyyətdə deyil. Qeyd edək ki, Ermənistanın ümumi dövlət borcu ilin əvvəlindən 5,3 faiz və yaxud 267,5 milyon dollar artaraq ilk yarımillikdə 5 milyard 345,2 milyon dollar təşkil edib. Ekspertlərin proqnozlarına görə, 2016-cı ilin yekunlarına əsasən dövlət borcunun həcmi 5,569 milyard dollar təşkil edəcək. Bu həcmdə borcu isə Ermənistan sadəcə ödəmək iqtidarında deyil, çünki ölkədə iqtisadi inkişaf üzrə heç bir ciddi proqram həyata keçirilmir. Borcun artıq ümumdaxili məhsulun yarısına çatması isə Ermənistanda defoltu qaçılmaz edir".
Məhəmmədəli QƏRİBLİ
