Aqşin Əliyev: "Hətta terror cəhdlərinin artacağı da istisna deyil"
Xəbər verdiyimiz kimi, bu günlərdə Türkiyə Xalqların Demokratik Partiyasının (HDP) millət vəkillərinə qarşı əməliyyat keçirilib. HDP həmsədrləri Səlahəddin Dəmirtaş və Figen Yüksəkdağ da daxil olmaqla 11 deputat həbs olunub.
Onlara qarşı "terror təşkilatı PKK-nın təbliğatını aparmaq", "cinayəti və cinayətkarı tərifləmək", "xalqı kin və düşmənçiliyə təhrik", "silahlı terror təşkilatına üzv olmaq" və "dövlətin birliyi və bütövlüyünü pozmağa təşəbbüs" maddələri ilə ittihamlar irəli sürülüb.
Bu hadisələrdən sonra Türkiyədə bir neçə terror aktı həyata keçirilib, bəzilərinin qarşısı isə təhlükəsizlik qüvvələri tərəfindən alınıb.
Qeyd edək ki, Türkiyə prezidenti Rəcəb Tayyib Ərdoğan terror fəaliyyətinə dəstəklə bağlı Xalqların Demokratik Partiyasının (HDP) deputatlarının həbsinə münasibət bildirib. O deyib ki, Qərbin nə dediyinin onun üçün əhəmiyyəti yoxdur: "53 il Avropa İttifaqının qapısında bizi gözlədən Qərbdən xeyirli nə gördük?
İfadə vermək üçün prokurorluğa dəvət edilənlər bu dəvəti qəbul etmirsə, "bacarırsınızsa, gəlin bizi aparın" deyirsə, hüquq onların zorla ifadə verməyə gətirilməsini tələb edir. Heç kim özünü hüququn üzərində görə bilməz. Məhkəmənin qərarından razı olmaya bilərsiniz, mənim də məhkəmə ilə bağlı narazı qaldığım məqamlar olub. Ancaq heç vaxt prokurorluğu, məhkəməni tanımadığımı bildirmədim. Bir zaman İstanbulun bələdiyyə sədri idim, məni də ifadəyə çağırdılar, məni həbs etdilər. Heç bir şou da göstərmədim, sakitcə getdim. Millət isə nə dedi? Bu məhkumluğu qəbul etmədi. Dedi ki, get, partiyanı qur. Partiyamızı qurduq, millət bizə səs verdi".
Hadisələrin bu cür davamı Türkiyədə terror törədilmə risqini artırırmı?
Ekspert Aqşin Əliyev qəzetimizə açıqlamasında bildirdi ki, PPK-nın siyasi qanadı olan HDP-ni təmsil edənlərin parlamentdə olması, bir növ, onların qanunsuz fəaliyyətini leqallaşdırırdı: "Bunun özü əslində yanlış bir addım idi. Bu səbəbdən HDP açıq şəkildə PPK-nı və terror təşkilatlarını müdafiə edən, onların haqqında bir dəfə də olsun mənfi söz deməyən, gücünü xalqdan yox, PKK-dan alan bir siyasi görümlü terror təşkilatıdır. Təbii ki, bu həbslərdən sonra Türkiyəyə Avropa və ABŞ-dan təzyiqlər olacaq. Hətta terror cəhdlərinin artacağı da istisna deyil. Böyük güclərin bu hadisədən istifadə edərək Türkiyədə yeni təzyiq rıçaqlarını işə salacağı da mümkündür.
Bu baxımdan hesab edirəm ki, PKK-dan xüsusilə əziyyət çəkən dövlətlər Türkiyə ilə bərabər olub həmrəylik göstərməlidir".
Məhəmmədəli QƏRİBLİ
