Fazil Mustafa: "Onsuz da Avropa Birliyi Türkiyənin atdığı addımları müəyyən dərəcədə qaralayır"
Türkiyədə terrorla mübarizə çərçivəsində aparılan əməliyyatlarda Xalqların Demokratik Partiyasının (HDP) həmsədrləri Səlahəddin Demirtaş və Figen Yüksekdağ saxlanıb.
Həmsədrlərlə yanaşı, Şırnak millət vəkili Ferhat Encü, Leyla Birlik, Hakkari millət vəkilləri Selma Irmak, Abdullah Zeydan, Diyarbəkir millət vəkilləri İdris Baluken, Nursel Aydoğan, Ziya Pir, Ankara millət vəkili Sırrı Süreyya Önder ilə Mardin millət vəkili Gülser Yıldırım barəsindəki saxlanma qərarı da icra olunub.
Barəsində saxlanma qərarı olan HDP Şırnak millət vəkili Faysal Sarıyıldız və Van millət vəkili Tuğba Hezer Öztürkün xaricdə olduğu müəyyənləşdirilib. Eyni zamanda Diyarbəkir millət vəkili İmam Taşçıer və Hakkari millət vəkili Nihat Akdoğanla bağlı prosesin davam etdiyi bildirilib.
Bu həbslər Türkiyə üçün nə vəd edir?
Millət vəkili Fazil Mustafanın fikrincə, Türkiyə dövləti bu istiqamətdə çox doğru addım atıb. Deputat hesab edir ki, bu məsələ ilə bağlı beynəlxalq reaksiyanın necə olacağı önəmli deyil, əsas budur ki, qanunsuz siyasi fəaliyyət qadağan olunmalıdır: "Mən deyərdim ki, əməliyyatın miqyasını bir qədər də genişləndirmək olardı. HDP, əməlli-başlı, terrorçularla bağlı olan bir partiyadır. Dövlət onlara şans vermişdi ki, siyasətlə, sivil yollarla müəyyən məsələlərin həllinə çalışsınlar. Ancaq biri gedir terrorçunun dəfnində iştirak edir, biri terrorçu ilə şəkil çəkdirir. Aşkar şəkildə Türkiyə dövlətinin ərazi bütövlüyünü təhdid edirlər. Belə vəziyyətdə də dövlət müəyyən addımlar atmalı idi. Hesab edirəm ki, Ərdoğanın PKK-ya qarşı sərt siyasəti tamamilə yerindədir. Terrorun kökünü qazımaq üçün birinci növbədə onun siyasi qanadını məhv etmək lazımdır. Çünki şansdan doğru istifadə etmədilər. PKK HDP formasında niyə görə Məclisdə idi? Silahı buraxıb Məclis altında siyasət həyata keçirmək üçün. Bunlar həm problemlərini qaldırır, həm də türk əsgərinə atəş açıb öldürürlər. Hökumət nə cavab verməli idi? Bu istiqamətdə daha sərt işlər görülməlidir. Onsuz da Avropa Birliyi Türkiyənin atdığı addımları müəyyən dərəcədə qaralayır. Qaralayırsa, qaralasın, indi ona görə Türkiyə öz ərazi bütövlüyünü qurban verməyəcək ki?"
Məhəmmədəli QƏRİBLİ
