Sirr deyil ki, son illərdə bir çox ölkələrdə, o cümlədən MDB məkanında bəzi ölkələrdə hakimiyyət dəyişikliklərinin yaşanmasında ABŞ-ın birbaşa rolu və müdaxiləsi olub. Bununla ABŞ həmin ölkədə, onu yerləşdiyi coğrafi məkanda öz maraqlarını təmin etməyə çalışıb. Qeyd olunan xüsusda isə Respublikaçılardan prezidentliyə namizəd Donald Tramp olduqca maraqlı açıqlamalar verib.
Bu barədə danışmazdan öncə qeyd edək ki, ekspertlərə görə, Demokratlardan Hillari Klinton hakimiyyətə gəlsə, ABŞ bu siyasətini davam etdirəcək. Tramp isə əksinə, qeyd olunan xüsusda siyasətə son qoyacağını iddia edir.
Belə ki, Tramp Şimali Karolina ştatındakı çıxışında prezident seçiləcəyi halda ABŞ-ın başqa ölkələrdə hakimiyyətləri devirmək praktikasına son qoyacağını deyib. Onun sözlərinə görə, ABŞ silahlı qüvvələrindən xaricdə istifadə ancaq o zaman baş verəcək ki, bu, ölkənin milli təhlükəsizlik maraqları baxımından vacib olsun: "Biz xaricdə demokratiya qurmağa, rejimləri devirməyə və düşüncəsizcəsinə müdaxiləyə cəhd etməyəcəyik. Bunun əvəzində Amerikanın təhlükəsiziyinə diqqət ayırmaq, İŞİD-i məhv etmək və radikal islamçı terror üzərində qələbə qazanmaq lazımdır".
Rusiyanı "qorxunc" hesab edən Klintondan isə amerikalılar radikal hərəkətlər gözləyir. "Politonline.ru" saytına danışan Respublikaçılar Partiyasının yüksək vəzifəli nümayəndəsi adının açıqlanmaması şərtilə deyib ki, Klinton MDB-də "narıncı inqilablar"ı dəstəkləyərək qarşıdurma yaradacaq. O qeyd edir ki, keçmiş dövlət katibi, prezident olacağı halda Ukraynaya silah verər, bu ölkəyə NATO kontingentinin daxil edilməsində təkid edər, məhkəmə və istintaqsız Rusiya biznesinin aktivlərini dondurar. Amerikalı siyasətçinin sözlərinə görə, bu, xanım Klintonun xarici siyasət ritorikasında aydın görünür: "O, "Vaşinqton qırğısı"dır, eynilə müharibənin Ağ Evdəki lobbisi kimi". Beləliklə bəlli olur ki, ABŞ-dakı seçkilərin nəticələri dünyaya də təsirsiz ötüşməyəcək. Hazırda ABŞ prezidentliyinə namizədlər diqqətlərini noyabrın 8-də keçiriləcək seçkilərdə həlledici rol oynayacaq iki ştata - Şimali Karolina və Floridaya yönəldib. Donald Tramp Pensilvaniya və Şimali Karolinaya yola düşməzdən əvvəl Floridanın Ceksonvill şəhərində seçiciləri ilə görüşüb. Burada o, bir daha Klintonu milli təhlükəsizlik məlumatlarını şəxsi elektron poçtu ilə göndərməklə etməklə kriminal əməllərdə günahlandırıb: "O, hələ bir neçə il öncə istintaqa cəlb edilməli idi".
ABŞ Konqresinin Nümayəndələr Palatasının milli təhlükəsizlik üzrə komitəsinin sədri Maykl Makkol isə bu fonda Hillari Klintonu dövlətə xəyanətdə ittiham edib. Makkolun fikrincə, ABŞ dövlət katibi vəzifəsində işlədiyi vaxtda şəxsi elektron poçtundan xidməti yazışmalar üçün istifadə etmiş Hillari Klintonun əməli dövlətə xəyanətdir: "İndi öyrənirik ki, mənə əvvəllər Federal Təhqiqatlar Bürosunun direktoru Ceyms Kominin çatdırdığı kimi, çox güman, ABŞ-a düşmən olan ölkələr Klintonun özəl serverinə daxil ola bilib". Onun sözlərinə görə, özəl serverindən istifadə etməklə Hillari Klinton dövlət sirlərini xarici ölkələrə açıb: "Zənnimcə, tamamilə səmimi olsaq, bu, dövlətə xəyanətdir".
"Vikiliks" saytının yaradıcısı Culian Assanc da Klintonla bağlı şok məqamlar açıqlayıb. O bildirir ki, Hillari Klintonun yazışmalarında İŞİD-in Səudiyyə Ərəbistanı və Qətər tərəfindən maliyyələşdirilməsi haqqında faktlar var. Onun sözlərinə görə, Klintonun 2014-cü ildə özünün seçki kampaniyasının rəhbəri Con Podestaya yazdığı məktubda bu faktlar yer alıb: "Klintonun məktubunda, həmçinin, Səudiyyə Ərəbistanına 80 milyard dollar dəyərində silah-sursat satılmasından da söhbət gedir. Klintonun fonduna pul verən şəxslər İŞİD-i maliyyələşdirən adamlardır. Onlar Trampı prezident seçilməyə qoymayacaq".
Hələlik isə hər iki namizəd seçkilərdə özünün qələbə çalacağından əminlik ifadə edir. Belə ki, Donald Tramp seçkilərdə şübhə etmədiyi qələbəsini Nyu-Yorkda bayram etməyə hazırlaşır. Trampın seçki qərargahı tədbirin noyabrın 8-də axşam saatlarında Manhetten rayonunun mərkəzində yerləşən "Hilton" otelində təşkil olunacağını bildirib. Giriş "yalnız Tramp-Pens kompaniyasının dostları və tərəfdarları üçün dəvətnamələr" əsasında olacaq.
Bir qədər əvvəl Hillari Klintonun da qərargahı keçmiş dövlət katibinin seçkiqabağı yarışın başa çatmasını təntənə ilə qeyd edəcəyi barədə məlumat yayıb. Xanım Klinton tədbiri Manhetten rayonunda - "Jacob Javits" konfrans zalında keçirməyi planlaşdırır.
Nahid SALAYEV
