Rusiyanın Avropa sərhədlərindəki əsgərlərinin sayını artırmasına cavab olaraq NATO Baltikyanı ölkələrə əlavə qüvvə göndərir. Rusiya isə təkcə hərbçilərini deyil, Avropadakı hərbi avadanlığını da artırmaqdadır.
Britaniyanın «The Mirror» qəzeti Rusiyanın yeganə təyyarədaşıyan gəmisinin Pa-de-Kale boğazından keçməsindən 10 gün sonra, nəhayət, Britaniya nazirinin müharibəyə hazırlıqdan danışdığını yazır. Müdafiə naziri Maykl Fallon parlamentdə çıxışı zamanı deyib ki, NATO Kremldən gələn təcavüz təhlükəsinin mahiyyətini anlayır və Putinin qüvvələrinə qarşı dayana bilər. Amma M.Fallon 2017-ci ildə Britaniyanın Rusiya ilə savaşa başlayacağı barədə deyilənlərin «həddən artıq fövqəladə» olduğunu bildirib. O, Rusiyanın aqressiyasının 2015-ci ildə də artdığını, amma hələ müharibə ilə sonuclanmadığını vurğulayır.
Nazir bu cür proqnozları şərh edərkən deyib: «Biz həm bu il, həm də ötən il Rusiya tərəfdən çox böyük aqressiyanın şahidi olmuşuq. Uzaq məsafəli aviasiya, sualtı qayıqların fəaliyyəti, sularımızdan keçən təyyarə gəmisi, Rusiyanın Suriyada və başqa yerlərdə rolu və s. Mən bunun açıq münaqişənin gələn il baş verəcəyinə işarə olduğunu düşünmürəm».
«The Independent» diqqəti M.Fallonun gələcək münaqişəni istisna etməməsinə çəkir.
Britaniya ordusunun 2018, yaxud 2019-cu ildə Rusiya ilə müharibəyə hazır olub-olmaması ilə bağlı sualları cavablandırarkən nazir bildirib ki, onlar bu cür situasiyada tempi artırmağa hazır olarlar. M.Fallon Rusiya ilə savaş baş verərsə, Britaniyanın təkbaşına deyil, NATO-nun fəal üzvü kimi davranacağını, NATO-nun ssenarisi üzrə hərəkət edəcəyini vurğulayıb.
Britaniyanın müdafiə naziri ölkəsinin gələn il Estoniyaya 800 əsgər göndərəcəyini, bunun da Baltikyanı ölkələrdə təcavüzün qarşısını almağa xidmət etdiyini, NATO-nun potensial təcavüzkara cavab vermək qabiliyyətini vurğuladığını bildirib.
Britaniyanın maliyyə naziri Filip Hemmond isə Rusiyanın adını çəkməsə də, bəzi «yaramaz ölkələr»in Britaniyanın elektrik şəbəkəsi və hava məkanına nəzarət sistemini hədəfə almağa çalışdığını deyib. Nazir Fransanın «TV5 Monde» saytına hücumu, Ukraynanın bütün elektrik şəbəkəsinin hakerlər tərəfindən söndürüldüyünü xatırladıb. Təhlükəsizlik məsələləri üzrə ekspertlər hər iki hücumun arxasında rus hakerlərin durduğunu deyirlər. F.Hemmond ölkəsinin təkcə kiber-müdafiəyə deyil, lazım olarsa, kiber-hücuma keçəcəyini bildirib.
