Dünyanın böyük diqqətlə izlədiyi məsələlərdən biri də ABŞ-da bu ay baş tutacaq prezident seçkiləridir. Qeyd edək ki, ABŞ-da prezident seçkiləri kampaniyasının sonuncu həftəsinə daxil olduğu bir vaxtda Demokratların namizədi Hillari Klintonun Respublikaçılardan olan rəqibi Donald Trampdan az fərqlə öndə olduğu bəlli olub. Ancaq Klintonun dövlət katibi olarkən şəxsi elektron poçt serverindən istifadəsinə dair təhqiqatın yenidən başlaması Ağ Ev uğrunda mübarizəyə yenidən qeyri-müəyyənlik əlavə edib.
ABŞ-da keçirilən bir neçə sorğu Klintonun Trampdan 1-3 faiz öndə olduğunu göstərir. Ağ Evdə əyləşəcək yeni şəxsin müəyyən olunmasına bir həftə qalmış mühüm ştatlarda artıq bərabər səviyyədə olan mübarizə daha kəskin xarakter alır.
Onu da xatırladaq ki, Tramp ilk dəfədir seçkili vəzifə uğrunda mübarizə aparır. Klinton isə, seçiləcəyi təqdirdə, ABŞ-ın ilk qadın prezidenti olacaq. Artıq ABŞ-ın 37 ştatında erkən səsvermə keçirilir və beləliklə milyonlarla amerikalı noyabrın 8-də keçiriləcək seçki günündən öncə istədiyi namizədə indidən səs verir. Seçkidə mühüm rol oynayan Şimali Karolina ştatında seçicilər də artıq seçimini edir və namizədlər burada kampaniyaya son qoyub. Bu arada onu da xatırladaq ki, kampaniya ərzində müxtəlif hadisələr bəzən hər iki namizədin seçici reytinqini aşağı salıb. Onlardan biri də ötən həftə Federal Təhqiqat Bürosunun direktoru Ceyms Kominin Klintonun elektron poçtuna dair yeni istintaqın başlamasını açıqlamasından sonra yaşanıb. İstintaq Klintonun köməkçilərindən biri olan Huma Abedinin keçmiş ərinin kompyuterində tapılan sabiq dövlət katibinin minlərlə elektron poçtunu araşdıracaq. Bununla yanaşı Donald Tramp da diqqətini bir il əvvəl kampaniyasına başlayandan bəri Klintona problem yaradan elektron poçt məsələsinə yönəldib. O, Nyu-Meksiko ştatının cənub-qərbində keçirdiyi təbliğat kampaniyası zamanı bildirib: "Hillari Klinton qurban deyil, Siz, Amerika xalqı, korrupsiyaya uğramış sistemin qurbanı sizsiniz. Biz noyabrın 8-də qalib gələndən sonra Vaşinqtona gedəcəyik və bu bataqlığı qurudacağıq".
Dünyaya demokratiya dərsi keçməyə cəhd edən ABŞ-da prezident seçkiləri yaxınlaşdıqca mümkün seçki saxtakarlıqları barədə iddiaların daha da güclənməsi isə vəziyyəti getdikcə qəlizləşdirir. Donald Trampın iddiasına görə, Hillari Klintonun qələbəsini təmin etmək üçün saxta bülletenlər hazırlanıb. ABŞ-ın yerli qəzetlərindən olan "Christian Times Newspaper" də seçkidən əvvəl hazırlanmış bülletenlərin üzərində Hillari Klintonun adının işarələndiyini yazıb. Qəzet bildirir ki, Ohayo ştatında yerli elektrik işçilərindən biri Hillari Klintonun adının yazıldığı bir neçə min bülleten tapıb. Tramp da bildirir ki, Klintonun qələbəsi saxtakarlıq hesabına baş tutacaq. Trampın bu sözləri dünyanı "seçki ittihamlarına" boğan Amerikanın özündəki seçkilərə diqqəti daha da artırır. Öz maraqlarına uyğun şəkildə istənilən ölkədə keçirilən seçkiləri pisləmək, yaxud tərifləmək hüququnu yalnız öz-özünə tanıyan və bunu demokratiya ilə bağlayan ABŞ beləliklə öz reallığı ilə üz-üzə qalıb. Özü də ilk dəfədir ki, bu ölkənin prezident postuna iddialı namizəd seçki saxtakarlığını açıq şəkildə dilə gətirir.
Trampın ittihamları təkcə qeyd olunanlarla məhdudlaşmır. O vurğulayır ki, Hillari Klinton Vaşinqtonu Suriyada Moskva ilə hərbi münaqişəyə çəkməyə çalışır ki, bu da üçüncü dünya müharibəsinin başlamasına gətirib çıxara bilər: "Hillari və onun müvəffəqiyyətsizliyə uğramış Vaşinqton elitası Yaxın Şərqdə müharibələrə 6 trilyon dollar vəsait sərf edib və indi orada vəziyyət əvvəlkindən də pisdir. İndi keçmişin xatırlanmadığı Vaşinqton kisəciyində ilişib qalan Hillari nüvə silahı olan Rusiya ilə münaqişəyə girərək Suriyada həqiqi müharibəyə başlamaq istəyir ki, bu da bizi üçüncü dünya müharibəsinə çəkə bilər. Siyasi dairələrin təkəbbürlü nümayəndələri heç vaxt heç nədən dərs almırlar. Onlar eyni səhvləri təkrar edir, həmin yalan sözləri danışır, onlar sonda müvəffəqiyyətsizliyə uğrayırlar. Hillari öz elektron poçt qutusuna yiyə dura bilmədiyi halda, ölkəni necə idarə edə bilər? Fəlakət, qalmaqal və satqınlıqlar bir-birini əvəz edir". Bütün bunlar isə, istənilən halda, ABŞ-da budəfəki seçkilərdə demokratiyanın ciddi ittihamlara hədəf olacağını deməyə əsas verir.
Tahir TAĞIYEV
