Arzuxan Əlizadə: "İnanmıram proseslər Rusiya ilə ABŞ-ın toqquşmasına və nəticədə üçüncü dünya müharibəsinə gətirib çıxarsın"
Suriyada ABŞ və Rusiyanın geosiyasi maraqları yenidən kəskin şəkildə toqquşdu. Məlum olduğu kimi, bir neçə gün əvvəl ABŞ Suriya probleminin həlli ətrafında Rusiya ilə danışıqları dayandırdığını bildirdi.
Danışıqların dayandırılmasının əsas səbəbi isə Suriyada döyüşən tərəflər arasında atəşkəs elan olunduqdan sonra BMT-nin humanitar karvanının böyük ehtimalla Suriya və yaxud da Rusiya təyyarələri tərəfindən bombalanması oldu. Bombardman nəticəsində 20 nəfər mülki şəxsin öldüyü bildirildi. Suriya probleminin həlli ilə bağlı danışıqlar dayandırıldıqdan sonra isə bu ölkədə savaş öz axarı ilə davam etməkdədir. Danışıqlar dayandırıldıqdan sonra Rusiya tərəfi havadan müdafiə sistemi olan "S-300" raketlərini Suriyada yerləşdirdiyini bəyan etdi.
Suriyada maraqların toqquşduğu əsas məkanlardan biri də Hələb şəhəridir. Son aylarda Hələb şəhərində vəziyyət olduqca gərginləşib, şəhər və onun ətrafında ağır döyüşlər gedir. Rusiya təyyarələri Hələb şəhərinin üsyançıların nəzarətində olan ərazisinə hücumları davam etdirir və fəalların dediyinə görə, bu, son günlərin ən ağır bombalanmasıdır. ABŞ və Rusiya arasında atəşkəslə bağlı əldə olunan razılığın ötən ay pozulmasından sonra hücumlar daha intensivləşib. Atəşkəsi yenidən bərpa etmək üçün diplomatik səylər bu günə qədər nəticə verməyib. BMT xəbərdarlıq edib ki, hazırda 275 min insanın yaşadığı Hələb şəhərinin şərqi yaxın iki ay ərzində tamamilə məhv ola bilər. Hələb Suriyada ikinci böyük şəhər olmaqla yanaşı, mühüm strateji əhəmiyyətə malikdir. O üzdən, sözügedən şəhər dünya güclərinin geosiyasi savaş mərkəzinə çevrilib. Tərəflərdən heç biri Hələb məsələsində güzəştə getmək istəmir. Bu da tərəflərin qarşı-qarşıya gəlmə ehtimalını yaradar.
Maraqlıdır, Hələb ətrafında baş verənlər üçüncü dünya müharibəsinə gətirib çıxara bilərmi?
Məsələyə münasibət bildirən AMİP-in baş katibi Arzuxan Əlizadənin fikrincə, üçüncü dünya müharibəsinin başvermə ehtimalı yoxdur: "Baxmayaraq ki, Suriya böhranı ilə əlaqədar tərəflər arasında çox ciddi ziddiyyətlər var, düşünmürəm ki, Hələb ətrafında baş verənlər ABŞ-la Rusiyanın birbaşa üz-üzə gəlməsinə gətirib çıxarsın. Görünən odur ki, Rusiya Yaxın Şərqdəki sonuncu qalasını itirmək istəmir. Çünki bu ölkə region üçün mühüm strateji əhəmiyyət kəsb edir. Bütün bunlara rəğmən, inanmıram proseslər Rusiya ilə ABŞ-ın toqquşmasına və nəticədə üçüncü dünya müharibəsinə gətirib çıxarsın. Ona görə ki, hər iki dövlət nüvə silahına malikdir. Nüvə silahlarının işə salınması isə dünyanın məhv olmasına gətirib çıxaracaq. Ancaq, bundan fərqli olaraq, hər iki dövlət dəstəklədiyi tərəflərə etdiyi yardımları bir az da artıracaq. Belə ki, artıq bu tendensiya müşahidə olunur. Rusiya Əsəd rejiminə ən müasir raket komplekslərini verməyə başlayıb. Qərb isə müxalif qüvvələri "Qrad" qurğuları ilə təmin edir. Gözlənir ki, tərəflərə göstərilən hərbi yardım yaxın vaxtlarda bir az da artırılsın".
Vidadi ORDAHALLI
