Cari ilin aprelində cəbhədə Ermənistanın uğradığı məğlubiyyət düşmən ölkədə hakim komandaya da ciddi zərbə oldu. Elə bunun nəticəsi olaraq həmin vaxtdan hakim komandanın, demək olar ki, bütün əsas postlarında yer tutan məmurlar başqaları ilə əvəz olundu. Amma Serj Sarkisyanın postunu qorumaq üçün qurban verdiyi məmurların ona ciddi problem yaratması da qaçılmaz sayılır.
Son proseslər sabiq məmurların Sarkisyana qarşı təşkilatlanmaqda olduğunu göstərir. Bu xüsusda Ermənistan Prezident Administrasiyası rəhbərinin müavini və prezidentin parlamentdə daimi nümayəndəsi vəzifəsindən istefa verdiyini bildirən Viktor Dallakyanın addımları hazırda geniş müzakirə predmetinə çevrilib. Dallakyan bəyan edib ki, onun, yaxud ailə üzvlərinin başına hər hansı hadisə gələrsə, buna görə Ermənistan prezidenti Serj Sarkisyan məsuliyyət daşıyır. Dallakyan artıq istefa ərizəsini təqdim etdiyini və hakim Ermənistan Respublikaçılar Partiyasının üzvlüyündən çıxıb, fəal siyasətə qayıdaraq 2017-ci il parlament seçkilərində iştirak edəcəyini bildirib: "Bəyanatımdan sonra mənim, yaxud ailə üzvlərimin başına hər hansı hadisə gələrsə, bunun üçün Serj Sarkisyan məsuliyyət daşıyır". "Aykakan jamanak" qəzeti Dallakyanın "Şırcadats" ("Dönüş") adlı yeni, müxalif məkanda fəaliyyət göstərən partiya təsis edəcəyi və partiyaya ötən həftə istefaya göndərilən müdafiə naziri Seyran Ohanyanın sədrlik edəcəyini yazır. Qəzetdə sabiq müdafiə nazirinin prezident Sarkisyandan "küsülü" olduğu və istefadan sonra ona təklif edilən Ermənistan Silahlı Qüvvələrinin baş qərargah rəisi və Milli Təhlükəsizlik Şurasının katibi vəzifələrindən imtina etdiyi bildirilir. "Jamanak" qəzeti isə yazır ki, partiya İrəvanın mərkəzində ofis icarə edib və informasiya saytını açıb. O da iddia olunur ki, bunların hamısı Rusiyadan maliyyələşdirilir. Bu arada onu da xatırladaq ki, illər öncə Viktor Dallakyan prezident Sarkisyana müxalif mövqedə olub və onun Ermənistanın büdcəsini Monte Karlo kazinolarında israf etməsi haqqında bəyanatlar yayıb. Lakin 2012-ci ildə müxalif ritorikasına son qoyaraq prezident Serj Sarkisyanın başçılıq etdiyi Ermənistan Respublikaçılar Partiyasının üzvü olub, Prezident Administrasiyası rəhbərinin müavini və prezidentin parlamentdə daimi nümayəndəsi təyin edilib. İndi isə Dallakyanın bu postlardan imtina etməsi daha çox Sarksiyanın mövqelərinin zəifləməsi və sabiq məmrurların ona qarşı birləşməsi ilə izah olunur.
Hazırda Sarkisyan üçün əsas təhdid vəzifədən qovulan generallardan, o cümlədən də keçmiş müdafiə naziri Seyran Ohanyandan gəlir. "Joxovurd" qəzeti yazır ki, Ermənistanın müdafiə nazirinin müavini, Maddi-Texniki Təchizat Departamentinin rəisi Movses Akopyanın Silahlı Qüvvələrin Baş Qərargah rəisi təyin olunmasından sonra Müdafiə Nazirliyinin rəhbərliyində general qalmayıb.
Hazırda Errmənistan müdafiə nazirinin bütün müavinləri - David Tonoyan, Ara Nazaryan və David Paxçanyan mülki şəxslərdir. Qəzetin məlumatına görə, nazirliyin daxili strukturlarında daha bir neçə yüksək rütbəli hərbçi vəzifəsindən kənarlaşdırılacaq. Qəzet iddia edir ki, gənc kadrlar bölməsi Baş Qərargahın tabeliyinə köçürüləcək, yaşlılar isə təqaüdə göndəriləcək. Ehtimal olunur ki, Müdafiə Nazirliyi tədricən ordunun inkişaf strategiyasını işləyib hazırlayan, həmçinin maddi təminatı ilə bağlı vəzifələri yerinə yetirən quruma çevriləcək. Hərbi funksiyaları isə Silahlı Qüvvələrin Baş Qərargahı və onun bölmələri yerinə yetirəcək. Ermənistanın Müdafiə Nazirliyinin dağıdılması isə yenə də aprel döyüşlərindəki sarsıdıcı məğlubiyyətlə əlaqələndirilir. Amma generallar bütün bunlara görə Sarkisyanı bağışlamaq niyyətində deyil və Ohanyanın başçılığı ilə yeni komanda yaradırlar. Digər sabiq məmurların da bura qoşulması Sarkisyana qarşı yeni güclü ittifaq yaranması anlamına gəlir. Bu ittifaqdan imtina edənlər isə ölkədən qaçmağa üstünlük verir. Məsələn, Ermənistanın keçmiş maliyyə naziri Qagik Xaçatryan bu günlərdə özü ilə bir neçə milyard dram götürərərk ölkəni tərk edib. Hələ Q.Xaçatryanın istefasından öncə vergi yoxlamaları zamanı məlum olub ki, Dilicandakı Maliyyə Nazirliyinin tədris binasının tikintisi zamanı dövlət büdcəsindən 6 milyard dram, təxminən 12 milyon dollar oğurlanıb. Bundan sonra vergi xidməti nazirdən itkiləri kompensasiya etməyi tələb etmişdi. İndi isə sabiq maliyyə nazirinin Ermənistanı tərk etdiyi məlum olub. Xatırladaq ki, bir neçə ay öncə Q.Xaçatryanın adı daha bir korrupsiya qalmaqalında hallanıb. Belə ki, onun övladlarının ABŞ-da 15 milyon dollardan artıq dəyərdə mülkləri olduğu aşkarlanıb.
Nahid SALAYEV
