Təbriz Musayev: “Kılıçdaroğlu bundan sonra heç vaxt əvvəlki kimi ana müxalifət lideri ola bilməyəcək”
Xəbər verildiyi kimi, Türkiyədə polis Cümhuriyyət Xalq Partiyasının (CHP) ofisinə daxil olaraq Özgür Özəli və tərəfdarlarını oradan çıxarıb. Bu hadisə məhkəmə qərarı ilə Kamal Kılıçdaroğlunun partiya sədrliyinə qaytarılmasından bir neçə gün sonra baş verib. Özəl ona təqdim edilən sənədi cırıb və indi çıxsalar da geri qayıdacaqlarını deyib.
Özəl və Kılıçdaroğlu tərəfdarları arasında ixtilaf yarandığı vaxtda Türkiyənin siyasi mənzərəsinin necə olacağı, proseslərin ölkəni hara aparacağı maraq doğurur. Maraqlıdır, Kamal Kılıçdaroğlu ana müxalifət rolunu və gücünü göstərə biləcəkmi? Türkiyədə ana müxalifətsiz siyasət dövrünün başlandığını düşünmək olarmı?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev bunu istisna etdi: “Əvvəla, Türkiyə qardaş ölkə olduğu üçün orada gedən proseslər ölkəmizdə maraqla izlənilir. Proseslərin bu cür inkişafı təəssüf doğurur. Ən azından ona görə ki, bu, Türkiyə kimi böyük dövlətin imicinə mənfi təsir edir. Kılıçdaroğlu bundan sonra heç vaxt əvvəlki kimi ana müxalifət lideri ola bilməyəcək. Olsa belə, bu, sadəcə formal xarakterli olacaq. Bu, danılmaz bir reallıqdır. Məsələ ondadır ki, elə faktlar var onu danmaq mümkün deyil. Çünki Kılıçdaroğlu 13 il (2010-2023) CHP-nin lideri olub. Həmin müddət ərzində partiyanı hakimiyyətə gətirə bilmədi. Düzdür, onun liderliyi dövründə CHP İstanbul və Ankarada keçirilən bələdiyyə seçkilərini udub, amma bu, partiyanın hakimiyyətə gəlməsi ilə nəticələnmədi. CHP-nin ən böyük uğuru 2024-cü ilin martında keçirilən bələdiyyə seçkilərində olub. Onda da partiyaya Özgür Özəl rəhbərlik edirdi. Yəni deməyim odur ki, Kılıçdaroğlu yaşına görə, bir müddət partiyaya rəhbərlik etdiyinə görə, yeni heç nə təklif etmək, partiyanı hakimiyyətə gətirmək gücündə deyil. Onun qayıdışı CHP-ni zəiflədəcək, partiya tərəfdarları arasında qarşıdurmanı gücləndirəcək. Belə olan halda onun sədr olmasının heç bir əhəmiyyəti yoxdur. O baxımdan düşünmürəm ki, Kamal bəy bundan sonra müsbətə doğru nəyisə dəyişə bilsin”.
Vidadi ORDAHALLI
