Məlum olduğu kimi, Türkiyədə polis Cümhuriyyət Xalq Partiyasının (CHP) ofisinə daxil olaraq Özgür Özəli və tərəfdarlarını oradan çıxarıb. Bu hadisə məhkəmə qərarı ilə Kamal Kılıçdaroğlunun partiya sədrliyinə qaytarılmasından bir neçə gün sonra baş verib. Ankara meri Mənsur Yavaş Türkiyənin yeganə əsas müxalifət qüvvəsinin son liderini müəyyən etmək üçün 45 gün ərzində Cümhuriyyət Xalq Partiyasının qurultayının keçirilməsini tələb edib.
Yavaş təkcə Türkiyədə ən məşhur müxalifət fiqurlarından biri deyil. Onun adı həm də Ankara meri seçkilərində qalib gəlməsi ilə xatırlanır. O dövrdə həm ölkə daxilində, həm də xaricində bir çoxları bunun Türkiyədə indiki hakimiyyətin sonunun başlanğıcı olacağını proqnozlaşdırırdı. Bu proqnozlar, ən azı indiyə qədər, özünü doğrultmayıb. Bunun əvəzinə, ən populyar müxalifət siyasətçisi olan Əkrəm İmamoğlu həbsxanaya düşüb. Həbsxanaya salındıqdan sonra İmamoğlu partiyaya rəhbərlik etmək hüququnu itirdi. O, müttəfiqi Özgür Özeli partiya sədri vəzifəsinə namizəd göstərdi. Onun həmçinin nə vaxt keçiriləcəyi hələ məlum olmayan qarşıdan gələn prezident seçkilərində CHP-nin namizədi olacağı gözlənilir. Prezident Rəcəb Tayyib Ərdoğanın hazırkı səlahiyyət müddəti 2028-ci ilin may ayında başa çatır və o, artıq rəsmi olaraq namizədliyini irəli sürmək hüququna malik deyil. Lakin Türkiyədə tez-tez erkən seçkilər keçirilir və parlamentdə çoxluğu olan hakim Ədalət və İnkişaf Partiyası qanunvericilikdə asanlıqla dəyişiklik edə bilər. Bu fonda CHP-nin keçmiş lideri Kamal Kılıçdaroğlu Özelin lider seçilməsini rədd etdiyini açıqlayıb. Məhkəmə isə Kılıçdaroğlunu partiyanın rəhbərliyində saxlamaq qərarına gəldi. Onun vəzifələrini yerinə yetirməsi üçün polis Özel tərəfdarlarının müqavimətini dəf etməli və qərargahı ələ keçirməli idi. Hadisənin baş verdiyi 25 may gününü "Türkiyə müxalifəti üçün qara gün" adlandırırlar.
Türkiyəli siyasi şərhçi Fatih Attik bildirib ki, partiya artıq üç qrupa parçalanmaq təhlükəsi ilə üzləşir. Birincisi, ən kiçik qrup, Kılıçdaroğlunun tərəfdarlarından ibarət olacaq. İkincisi Özel ilə, amma əslində həbsdə olan İmamoğlu ilə birləşəcək: "Və nəhayət, üçüncüsü isə yalnız Ərdoğanın getməsini istədiyi üçün partiyaya qoşulan "yoldaşlar"dan ibarət olacaq. Hər üç qrup eyni seçici uğrunda mübarizə aparacaq. Bu, Ərdoğana uyğun olacaq. Onun rəqibləri müxalifəti birliyi qorumağa çağırırlar. Bunun mümkün olub-olmayacağı böyük sualdır". Türkiyəli siyasi şərhçi Turqut Tuncel Kərəm bildirir ki, ana müxalifət partiyası olan CHP-də xaos yaranıb, daxili çəkişmələr alovlanır və partiya idarəolunmaz vəziyyətə düşür: "Amma CHP-də yaranan xaos AKP-nin hesablamadığı yeni problemlərə yol aça bilər. Ən vacib məqam isə odur ki, cəmiyyətdəki etiraz enerjisi daha real və güclü bir müxalifəti ortaya çıxaracaq şəkildə böyüyə bilər".
Tahir TAĞIYEV
