ABŞ dövlət katibi Marko Rubionun Ermənistana səfəri onun İran sərhədinə nəzarəti ələ keçirmək və Rusiyaya növbəti dəfə zərər vurmaq məqsədi daşıyan seçki kampaniyasının bir hissəsidir.
Bu fikri Ermənistanın ikinci prezidenti və "Hayastan" blokunun lideri Robert Köçəryan Ermənistanın Vayots Dzor vilayətində seçki kampaniyası zamanı jurnalistlərə verdiyi müsahibədə bildirib.
Rubionun İrəvana səfəri ilə bağlı şərh vermək istənildikdə, Köçəryan səfərin bir məqsədinin olduğunu bildirdi: Rusiyaya bir daha zərər vermək. Bunun seçkilərə müdaxilə cəhdi olub-olmadığı soruşulduqda, siyasətçi bunun belə olduğuna əminliyini bildirib: “Son iki aydır ki, bu cür cəhdlərin daim şahidi oluruq. Vitse-prezident Vens Macarıstana gedib Viktor Orbanın son mitinqində çıxış edərək Orbana səs verməyə çağırdı. Hər şey pozulub. 15-20 il əvvəl pis hesab edilən şey indi, nədənsə, fərqli şəkildə qəbul edilir”. Lakin Ermənistanın ikinci prezidenti Rubionun İrəvana səfərindən sonra hansı sənədlərin imzalanacağından əmin deyil: “Mənim təəssüratım budur ki, ABŞ dövlət katibinin Ermənistana səfəri bu seçki kampaniyasının bir hissəsidir. Mənim təəssüratım belədir. Onlar Nikol Paşinyanın bu seçkilərdə uduzmaması üçün əllərindən gələni etmək istəyirlər. ABŞ-ın Ermənistanda ciddi maraqları yoxdur. Onların yeganə marağı İranla sərhədi nəzarətə götürmək və Rusiyaya zərər verməkdir. Onlar Türkiyənin bölgəmizdə Rusiyanın yerini tutmasını təmin etmək üçün əllərindən gələni etmək istəyirlər. Bu, bizim maraqlarımıza uyğundurmu? Əlbəttə ki, yox”.
Maraqlıdır ki, bundan əvvəl Rusiya Təhlükəsizlik Şurasının sədr müavini Dmitri Medvedyev iddia edib ki, Ermənistanın baş naziri Nikol Paşinyan ölkəsini Ukraynanın məhvi yoluna itələyir: "Paşinyanın öz vətənini “banderovçu” Ukrayna yoluna fəal şəkildə itələməsi xüsusilə təhlükəlidir". Onun sözlərinə görə, Paşinyan Rusiyanın çoxsaylı qardaşlıq yardımı və dəstəyini qiymətləndirməyib, bunun əvəzinə Moskva ilə münasibətləri kəsməyi seçib: "Paşinyan Avrasiya İqtisadi İttifaqının sammitlərində iştirakdan imtina edib və İrəvanda Rusiyanın mənfur düşmənlərini toplayıb". Ermənistanın xarici işlər naziri Ararat Mirzoyan Gümrüdə jurnalistlərlə söhbətində Dmitri Medvedyevin Ermənistan-Rusiya münasibətləri ilə bağlı açıqlamalarına cavab verib. Mirzoyan Medvedevin təqdim etdiyi məlumatların həqiqətə uyğun olmadığını qeyd edərək, Ermənistanın Rusiya ilə siyasi, iqtisadi və ya digər sahələrdə münasibətləri kəsməkdə maraqlı olmadığını vurğulayıb. Onun sözlərinə görə, rəsmi İrəvanın mövqeyi tam əksidir: Ermənistan Rusiya ilə normal münasibətləri qorumağa və mümkün olduqda onları inkişaf etdirməyə və dərinləşdirməyə çalışır.
Tahir TAĞIYEV
