Facebook istifadəçisi Ayşən Mustafa hazırda Türkiyədə baş verənlər və ana müxalifət partiyası Cümhuriyyət Xalq Partiyasının (CHP) hazırkı sədri Özgür Özelin vəzifəsindən uzaqlaşdırılaraq yerinə Kamal Kılıçdaroğlunun gətirilməsi ilə bağlı paylaşım edərək sensasiyalı faktlar açıqlayıb…
Statusu olduğu kimi təqdim edirik:
Kılıçdaroğlunun CHP-nin başına qayıtması məsələsi ilə birlikdə Kaşif Kozinoğlunun onunla bağlı yazdığı iddia edilən sensasion məktub da yenidən gündəmə gəldi.
Bəs Kaşif Kozinoğlu kim idi?
Hazırda bəlkə də ölkədə çox adam onu tanımır. Kozinoğlu Türkiyə kəşfiyyatının ən kilid adlarından biri olub. Fərqli bölgələrdə kəşfiyyat əməliyyatları aparıb. Bosniya savaşında bosniyalılara təlim verir, döyüşmələri, özlərini müdafiə etmələri üçün onları təşkilatlandırır, Kardak böhranı zamanı xüsusi tapşırıq yerinə yetirir, Əfqanıstanda, Türküstan coğrafiyasında MİT-in əməliyyatlarını icra edir. Getdiyi yerlərdə bir çox ləqəblərlə tanınır.
Kozinoğlunun həmçinin 1990-cı illərdə bir qrup türk vətənpərvərlə (MİT mənsubları da sayılır) Azərbaycana gəldiyi, Birinci Qarabağ savaşında azərbaycanlıları təşkilatlandırdığı, müxtəlif silahlı qrupların formalaşması və ermənilərə qarşı dirənməsində ciddi rol oynadığına dair iddialar var. Həmçinin o dövrdə müstəqilliyini yeni qazanan Azərbaycanın rəsmi şəxslərinin mühafizə olunmasında da yaxından iştirak etdiyi deyilir. Yenə iddialara görə, o zaman Kozinoğluna ölkəmizdə "Koroğlu" ləqəbi verilib.
Bəs belə bir şəxs Kamal Kılıçdaroğlu ilə bağlı nə deyib?
Kozinoğlunun araşdırdığı məsələlərdən biri də 2007-2008-ci illərdə Türkiyə və Almaniyada "əsrin yolsuzluğu", "siyasi savaş" adlandırılan "Deniz Feneri" işi idi. Kozinoğlu bu proseslə bağlı bir çox məlumatları toplayıb MİT-ə ötürür. Sözügedən iş çərçivəsində Türkiyənin o dövrdə bir sıra siyasi-tanınmış simalarının da adı çəkilir. Kaşif Kozinoğlunun sonradan üzə çıxan məktubunda Kamal Kılıçdaroğlunun Almaniya kəşfiyyatı (BND) ilə görüş keçirdiyi, onun CHP-yə sədrliyinin birbaşa BND tərəfindən dəstəkləndiyini vurğulayır. Məktubda başqa məsələlərə də toxunulur. Belə məsələlər çox olub. Müxtəlif ölkələrdə partiya rəhbərləri, yeni prezidentlər, baş nazirlər seçilmədən öncə fərqli dövlətlərin gizli xidmətləri ilə görüşlər keçiriblər və hələ də keçirirlər. Məsələn, Türkiyədə 2002-ci ildə belə şəxslərdən birinin ABŞ-da CİA ilə gizli görüş keçirdiyinə dair məlumatlar da mövcuddur.
K.Kozinoğlu sonralar məşhur "Ergenekon" davası çərçivəsində "vətənə xəyanətdə" ittiham edilərək saxlanılan MİT və ordu üzvlərindən biri olur. O, məhkəmə işi üzrə ifadə verməsinə az qalmış həbsxanada ürək tutmasından vəfat etdiyi xəbəri yayılır. Lakin bu, hələ də ən müəmmalı ölümlərdən biri kimi müzakirə olunur.
İndi isə CHP-nin qurultayının keçərsiz sayılması və Özgür Özəlin sədrliyinin ləğvi, yerinə Kılıçdaroğlunun qaytarılması ilə bağlı fərqli iddialar var. Artıq cəmiyyətdə növbəti seçkilərdə yenə Kılıçdaroğlunun partiyanın namizədi olacağı, bunun CHP-nin məğlubiyyətini qarantiləyən plan olduğuna dair narahatedici fikir formalaşıb. Bəs həqiqət nədir? Onu zaman göstərəcək.
ZÜMRÜD
