Azər Həsrət: “Avropa Parlamentinin qərəzli yanaşmasını tam olaraq dayandırmaq indiki şəraitdə mümkün görünmür”
Avropa Parlamentində keçirilən plenar iclas zamanı deputatların bir hissəsi qurumun Azərbaycana qarşı fəaliyyətinə etiraz edib. Kristian Terheş bəyan edib ki, Avropa Parlamenti Azərbaycana hücum etmək üçün Ermənistanla bağlı 2024-cü ilin aprel qətnaməsindən istifadə edib.
Qurumun bu cür davranışı digər ölkələrin də ondan uzaqlaşmasına səbəb olur. Burada söhbət xüsusilə Gürcüstandan gedir. Anjelin Füre isə hesab edir ki, Avropa bir tərəfdən Bakı ilə enerji əməkdaşlığını qorumağa çalışır, digər tərəfdən isə paralel olaraq Azərbaycana təzyiq göstərmək xəttini yürüdür. Tyeri Mariani isə əmindir ki, Azərbaycan Avropa Parlamenti ilə konstruktiv dialoq istəyirdi, lakin “öz qanuni narahatlıqları səbəbindən qapıları bağladı”.Tomas Frölix Bakının Avropa Parlamentinin mənəvi qiymətləndirmələrindən yorulduğu məsələsində Azərbaycanı dəstəklədiyini bildirib.
Göründüyü kimi, qərəzçilik o həddə çatıb ki, hətta Avropa Parlamentinin müəyyən deputatları dilə gələrək buna etiraz edir. Maraqlıdır, bütün bunlar Avroparlamentin Qarabağda suverenliyimiz təmin ediləndən sonra Azərbaycana qarşı apardığı qərəzli kampaniyanı, qəbul etdiyi ədalətsiz qətnamələrin bundan sonra da davam etdirilməsini dayandıracaqmı?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında bildirdi ki, Avropa Parlamentinin qərəzli yanaşmasını tam olaraq dayandırmaq əlbəttə, indiki şəraitdə mümkün görünmür: “Ancaq bu cür təşəbbüslərin olması sevindiricidir. Nəhayət ki, Avropada Azərbaycanın haqlı mövqeyini düzgün dəyərləndirən deputatlar peyda olub. Əslində qalanda o deputatlar çoxdan var. Sadəcə Azərbaycan həmin deputatlarla davamlı işləməlidir. Tək-tək gedib o deputatlarla görüşməliyik, daimi əlaqədə olmalıyıq. Onlara nəyin nə olmasını izah etməliyik. Avroparlament qətnamə qəbul edir ki, Azərbsaycan “hərbi əsirləri” azad etməlidir. Avropalılar ağlı başında olan adamlardır. Onlara vaxtında normal şəkildə izah etsək ki, Azərbaycanda həqiqətən də hərbi əsir yoxdur, onlar nə deyib elə bir qətnamə qəbul edə bilərlər? Əlbəttə, edə bilməzlər. Ən azından utanarlar, çəkinərlər. Yaxud da sabah buna görə cavab verməli olacaqlarını düşünərlər. Yəni biz təbliğatımızı yetərincə dərin qura bilmirik deyə, Avropada bizə qarşı bu cür addımlar atılır. İndi Avropa Parlamentinin bu çıxışları, yanaşması digər deputatlara da təsir edəcək. Sadəcə biz bununla arxayınlaşmamalıyıq, nəyisə gözləməməliyik. Əksinə, bu yöndə fəaliyyətimizi intensivləşdirməliyik. Avroparlamentin 700-ə yaxın deputat üzvü var. Onların böyük hissəsi ilə əlaqələr qurmalıyıq. Mövcud olan əlaqələrdən istifadə etməliyik. Onlara yeri gələndə yumuşaq güc vasitəsi ilə təzyiq etməliyik. İzah etməli və hətta başa salmalıyıq ki, Avropanın bizə ciddi ehtiyacı var. Əgər onların bizə ehtiyacı varsa, bizim maraqlarımızı nəzərə almağa borcludular. Bir sözlə, sözügedən məsələləri etmək üçün özümüz öndə olmalıyıq, hərəkət etməliyik. Ardından da bizim ədalətli mövqeyimizi dəstəkləyən deputatlar işlər görəcəklər. Bir sözlə, vəziyyəti dəyişmək üçün Avropa Parlamenti ilə intensiv iş aparmalıyıq”.
Vidadi ORDAHALLI
