Təbriz Musayev: “Bu, CHP-də parçalamanı dərinləşdirəcək və ana müxalifətin mövqeləri zəifləyəcək”
Türkiyədə məhkəmənin qərarına əsasən müxalifət partiyasının sədri dəyişdirilib. Cumhuriyet Halk Partisinin (CHP) sədri Özgür Özel vəzifədən uzaqlaşdırılıb və onun yerinə partiyanın əvvəlki sədri Kemal Kılıçdaroğlu gətirilib. Məhkəmə Kılıçdaroğlunun iddiasını təmin edib və onun qanunsuz olaraq vəzifədən uzaqlaşdırıldığını qərara alıb.
Özgür Özel və tərəfdarları hesab edir ki, məhkəmənin qərarı hakimiyyətin sifarişidir və hazırkı hakimiyyət Kılıçdaroğlunun vasitəsilə “oyuncaq müxalifət” düzəldir.
Bütün bunlar Türkiyənin daxili siyasətinə nə vəd edir, nə gözlənilir? Siyasi qüvvələr arasında iqtidar-müxalifət münasibətlərinə necə təsir göstərəcək? Türkiyə cəmiyyətində bu qərara uyğun nə kimi dəyişiklik baş verə biləcək? Cəmiyyətdə kəskin parçalanmalar mümkündürmü?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, bunun bir sıra təsirləri özünü mütləq göstərəcək: “Bu, istər-istəməz cəmiyyətdə qarşıdurmanı, qütbləşməni dərinləşdirəcək. Nəzərə almaq lazımdır ki, Türkiyədə sonuncu bələdiyyə seçkilərində CHP böyük üstünlük qazanıb. Bu, o demək deyildi ki, o zaman hamı CHP tərəfdarı olduğu üçün partiya bələdiyyə seçkilərini uddu. Təbii ki, yox. İqtisadi və sosial çətinliklər narazı kütlənin səslərinin CHP namizədlərinə getməsində vacib rol oynayıb. Sonrakı dövrdə korrupsiya ilə bağlı aparılan araşdırmalar CHP-nin nüfuzunun aşağı düşməsinə öz təsirini göstərdi. Kılıçdaroğlu 2023-cü ildə keçirilən CHP qurultayında seçilmədiyi üçün narazı idi. Onun narazılığı hakimiyyətin işinə yaradı və belə bir nəticə ortaya çıxdı. Əvvəl Əkrəm İmamoğlu İstanbul Bələdiyyəsində pozuntulara görə həbs edildi. Daha sonra digər proseslərin getməsinə səbəb oldu. Məhkəmə tərəfindən Özgür Özelin vəzifədən uzaqlaşdırılması CHP-yə zərbədir. Bu, CHP-də parçalamanı dərinləşdirəcək və nəticədə ana müxalifətin mövqeləri zəifləyəcək. Fikrimcə, bu cür hallar perspektivdə Türkiyənin nüfuzuna mənfi təsir edə bilər. O cümlədən, cəmiyyətdə qütbləşməyə rəvac verə bilər”.
Vidadi ORDAHALLI
