Sahil Kərimli: “Rusiyanın və Belarus ilə birgə Avropanı, Qərbi hədələməsi anlamına gəlir”
Rusiya və Belarus təxminən 64 min hərbçinin, 7800-ə yaxın texnikanın, həmçinin 200-dən çox raket qurğusunun iştirakı ilə üç günlük genişmiqyaslı nüvə qüvvələri təlimləri keçirib. Təlimlər çərçivəsində qoşunlar taktiki nüvə başlıqlarının "İsgəndər-M" sistemlərinin buraxılış qurğularına yerləşdirilməsini məşq edib.
Təlimlər Rusiya Prezidenti Vladimir Putin və Belarus Prezidenti Aleksandr Lukaşenkonun birbaşa rəhbərliyi altında keçirilib. Məşqlərə quru qoşunları ilə yanaşı Rusiyanın Şimal və Sakit Okean donanmaları, strateji aviasiya və raket qüvvələri də cəlb edilib. Rusiya qüvvələri nüvə başlıqlarını Belarus ərazisindəki səhra anbarlarına çatdırıb və Belarus raket briqadaları bu sursatların tətbiqə hazırlanması prosesini icra ediblər.
Ukrayna Xarici İşlər Nazirliyi təlimləri kəskin şəkildə pisləyib və bəyan edib ki, bu hərəkətlər qlobal təhlükəsizlik üçün misilsiz çağırışdır. Kiyev həmçinin sərhədlərdə təhlükəsizlik tədbirlərini gücləndirib.
Bu nədir? Rusiya Avropanı nüvə ilə hədələyir? Nüvə müharibəsi yetişdimi?
Politoloq Sahil Kərimli baki-xeber.com-a bildirdi ki, son dövrlərdə Rusiya və Ukrayna arasında gedən müharibə daha da şiddətlənib və tərəflər bir-birlərini ən ağır formada hərbi təhdidlərlə hədələyirlər. “Biz xüsusi vurğulamalıyıq ki, bir neçə gün bundan əvvəl Rusiya rəsmi dairələri Ukraynanın Latviya ərazisindəki hərbi bazalara gizli şəkildə dronlar yerləşdirilməsi ilə bağlı məlumatlar verirlər. Rusiya tərəfi iddia edir ki, Ukrayna Latviyadan Rusiya ərazisinə hücuma hazırlaşır. Eyni zamanda da qarşı tərəf, yəni Avropa və Ukrayna belə bir iddia səsləndirib ki, Rusiya Belarus ərazisindən Ukraynaya hərbi müdaxiləyə hazırlaşır. Görünən odur ki, vəziyyət olduqca ciddidir və vəziyyəti gərginləşdirmək istiqamətində tərəflər bir-birlərinə qarşı bu cür bəyanatlar səsləndirirlər. Bu arada Belarus və Rusiyanın nüvə silahı təlimləri keçirməsi də çox ciddi və təhlükəli məqamlardan xəbər verir və xüsusilə də bu təlimlərdə on minlərlə hərbçinin iştirak etməsi də çox maraq doğuran məsələlərdən biridir. Nüvə başlıqlı raketlərin və qurğularının yerləşdirilməsi məşqinin həyata keçirilməsi də Rusiyanın və Belarus ilə birgə Avropanı, Qərbi hədələməsi anlamına gəlir. Təbiidir ki, tərəflər bir-birlərinə qarşı artıq nüvə təhdidi həyata keçirirlər. Amma bu o demək deyil ki, qarşıdakı dövrlərdə tərəflər nüvə müharibəsinə başlayacaq. Çünki biz tarixən son illərdə dəfələrlə şahid olmuşuq ki, həm Amerika Birləşmiş Ştatları, həm Avropa, həm Rusiya bir-birlərinə qarşı nüvə təhdidi irəli sürür və bir-birlərini nüvə silahı ilə hədələyirlər”.
S.Kərimli vurğuladı ki, amma biz ən kritik məqamlarda belə tərəflərin nüvə silahından konkret faktiki istifadəsinin şahidi olmamışıq. Ekspert hesab edir ki, bu təhdidlər sadəcə bir təhdiddir: “Güc, əzələ nümayişidir və yaxın günlərdə ola bilsin ki, Avropa ölkələri də nüvə təlimləri keçirməklə Rusiyaya qarşı hərbi güc təhdidi ilə hərəkət etməyi planlayacaqdır. Amma görünən odur ki, vəziyyət olduqca ciddi və kritikdir. Çünki Rusiya heç də məsələlərlə bağlı geri çəkilmək fikrində deyil və danışıqlar da artıq dalana dirənib. Amma danışıqlar prosesinin növbəti raundunda bilirsiniz ki, həm Amerika, həm də digər ölkələr belə deyək ki, Rusiya-Ukrayna müharibəsinin sonlandırılması ilə bağlı müəyyən vasitəçilik missiyası həyata keçirirlər. Danışıqlar həyata keçirilir və bu danışıqların gedişatında tərəflər bir-birlərinə qarşı hərbi təhdid irəli sürərək masada, yəni danışıqlar masasında müəyyən psixoloji üstünlük əldə etmək niyyətindədirlər”.
İradə SARIYEVA
