Akif Nağı: “Bu ziddiyyətli məlumatlardan hansısa bir nəticə çıxartmaq hələ ki, çətindir”
İranın ali dini lideri Müctəba Xamenei ölkədəki yüksək zənginləşdirilmiş uran ehtiyatlarının xaricə çıxarılmasını qadağan edən dekret imzalayıb. Bu qərarın nüvə danışıqları zamanı İranın təhlükəsizliyini təmin etmək və ABŞ ilə İsrailin tələblərinə qarşı müqavimət məqsədi daşıdığı bildirilir. Amerikanın əsas tələblərin biri zənginləşdirilmiş uranın İrandan çıxarılması idi, İran da buna bu cür yanaşma sərgilədi və bəyan etdi ki, zəngiləşdirilmiş uranı heç kimə verməyəcəyik.
Bu dekretin imzalanması ABŞ-İran danışıqlarının artıq heç bir nəticə verməyəcəyi qənaətinə gəlməyə əsas verirmi?
Azad Vətən Patiyasının sədri Akif Nağı baki-xeber.com-a bildirdi ki, Amerika ilə İran arasında münasibətlər gərgin olaraq qalır. “Dünən də məlumatlar gəldi ki, artıq hansısa razılaşma sənədinin layihəsi var, razılaşdırıblar. Müəyyən maddələrin də adı çəkildi. Amma ya təsdiq olunmadı, ya təklif də olunmadı ki, belə bir sənəd ortada var. Amerikanın son təklifi artıq sənəd layihəsidir. Yəni, bu vaxta qədər onların arasında danışıqlar başlamaq üçün şərtlərdən ibarət təkliflər verilirdi ki, hansı şərtlər daxilində danışıqlara başlaya bilərlər. Amma indi Amerika ilə atəşkəs müqaviləsi, yaxud sülh sənədi olacaqdır, o da bilinmir. Hər halda razılaşma sənədinin layihəsini təqdim etdiyi bildirilir. Ən önəmli mövqedən çıxış edirlər. Yəni, Hörmüz boğazı ilə bağlı Amerikanın mövqeyi yerində qalır. Belə görünür ki, məlumata görə, İran razılaşır ki, Hörmüz əvvəlki statusu ilə fəaliyyət göstərsin. Yəni, İran mövqeyindən geri çəkilir. Hərbi əməliyyatların dayandırılması ilə bağlı ortaq məxrəcə gəlinir. Mətbuatda gedən məlumatların nə dərəcədə doğru olduğunu demək çətindir.
İranın istədiklərindən biri də onun Qərb banklarında olan aktivlərinin fəallaşdırılması, qadağalar, məhdudiyyətin götürülməsi ilə bağlıdır. Onunla da bağlı məlumatlar var. Deməli, uranla, nüvə tədqiqatlarının dayandırılması ilə bağlı da məlumatlar oldu ki, İranla Amerika razılaşma əldə olunubdur. Amma o razılaşma nədən ibarətdir, deyilmədi. Digər tərəfdən də bu informasiyalarla bərabər Müctəba Xameneinin adından məlumat yayıldı ki, o, qəti şəkildə uranın İrandan çıxarılmasının əleyhinədir, ona imkan verilməyəcək. İran hakimiyyəti, rəsmilər o mövqedən çıxış edir ki, yəni ali dini lider belə deyirsə, deməli, biz onun iradəsinin əleyhinə gedə bilmərik. Belə bir təsəvvür yaratmağa, ən azından çalışırlar. Amma indi, belə alınır ki, Amerika və İran öz mövqelərində qalır. Yəni, Amerika bu hərbi qarşıdurmanı başladanda əsas hədəfi İranın nüvəsiz, nüvə silahı olmayan bir ölkəyə çevrilməsi idi. Amma indi İran o mövqedən geri çəkilmirsə, başqa məsələlərdə də razılaşdırmanın əldə olunması mümkün deyil. Ona görə də ola bilər ki, bir müddətdən sonra onlar arasında hərbi əməliyyatlar yenidən başlasın. Yəni, bu təhlükə qalır. Çünki başqa cür mümkün deyil. Yaxud ola bilər ki, bu yanlış məlumat olsun və uranla bağlı da hansısa bir razılaşmaya gəlsinlər. O da mümkündür. Əsas da oldu ki, danışıqlar ciddi bir nəticə verməyib, ortada razılaşma yoxdur. Amma digər tərəfdən də məlumatlar da yayılır ki, hansısa razılaşma var. Bu ziddiyyətli məlumatlardan hansısa bir nəticə çıxartmaq hələ ki, çətindir”-deyə A.Nağı qeyd etdi.
İradə SARIYEVA
