Züriyə Ruslanqızı: “...Həm də Zəngəzur xətti ətrafında ABŞ-ın prosesdən kənarda qalmayacağını göstərir”
ABŞ Sülh Korpusu könüllüləri altı illik fasilədən sonra Ermənistanın Sünik (Zəngəzur) bölgəsində fəaliyyətə başlayır. Bununla bağlı rəsmi elan may ayının sonunda İrəvanda keçirilən andiçmə mərasimində verilib. Yeni qrup üzrə ölkə üzrə təxminən 70 könüllü müxtəlif regionlarda xidmət edəcək. Könüllülər növbəti iki il ərzində yerli icmalarda, məktəblərdə və qeyri-hökumət təşkilatlarında ingilis dilinin tədrisi, habelə gənclərin inkişafı istiqamətlərində fəaliyyət göstərəcəklər.
Rəsmi məlumatlarda yerləşdirilmənin birbaşa hər hansı yeni infrastruktur layihəsi ilə bağlı olmadığı, ABŞ-nin Ermənistan-Azərbaycan sülh səylərinə və inkişafına verdiyi dəstəyin göstəricisi olduğu vurğulanır.
ABŞ Sülh Korpusu könüllülərinin Zəngəzur vilayətinə göndərilməsi TRIPP layihəsi ilə birbaşa əlaqəli deyil, lakin bu, Amerika tərəfinin sülh prosesinə olan etimadını göstərir. Bunu “Armenpress”in “Qərbi Zəngəzurda könüllülərin yerləşdirilməsinin TRIPP layihəsi çərçivəsində görüləcək işlərlə bağlı olub-olmaması” barədə sualını cavablandırarkən ABŞ-nn Ermənistandakı müvəqqəti işlər vəkili Devid Allen bildirib.
“Düşünürəm ki, könüllülərin yerləşdirilməsi birbaşa TRIPP layihəsi ilə bağlı deyil. Lakin ötən ilin 8 avqustunda Vaşinqtonda əldə olunan razılaşmalardan və çərçivə sazişinin formalaşmasından sonra Sünik (Qərbi Zəngəzur-İ.S) vilayətində könüllülərimizi inamla yerləşdirmək üçün əlverişli şərait yarandı”,- amerikalı diplomat qeyd edib.
ABŞ Sülh korpusunun Könüllülərinin Zəngəzur dəhlizində yerləşdirilməsi faktını siyasi olaraq necə oxumaq olar?
Politoloq Züriyə Ruslanqızı (Qarayeva) baki-xeber.com-a “bu faktı birbaşa hərbi yerləşmə kimi yox, ABŞ-ın Zəngəzur bölgəsində yumşaq güc və siyasi mövcudluq xəttini gücləndirməsi kimi oxumaq lazımdır”-deyə bildirdi.
Z.Ruslanqızı qeyd etdi ki, rəsmi açıqlamada könüllülərin TRIPP layihəsi ilə birbaşa bağlı olmadığı deyilsə də, ABŞ diplomatı David Allen bunu Vaşinqton razılaşmalarından sonra sülh prosesinə artan etimadla əlaqələndirib. “Yəni mesaj budur: ABŞ artıq bu bölgəni risk zonası kimi deyil, işlənə bilən, nəzarət edilən və gələcək regional kommunikasiyaların açılması baxımından önəmli məkan kimi görür.
Siyasi mənada bu addım həm Ermənistana dəstək siqnalıdır, həm də Zəngəzur xətti ətrafında ABŞ-ın prosesdən kənarda qalmayacağını göstərir. Könüllülər formal olaraq təhsil, gənclər və icma proqramları ilə məşğul olsalar da, belə humanitar iştirak bölgədə Amerikanın sosial legitimliyini artırır. Bu, Rusiyanın ənənəvi təsir dairəsinin daraldığı, İranın isə Zəngəzur məsələsinə həssas yanaşdığı bir mərhələdə Vaşinqtonun “sərt güc” deyil, “sahədə görünən yumşaq güc” vasitəsilə mövqe tutmasıdır”-deyə Z.Ruslanqızı bildirdi.
İradə SARIYEVA
