Məhərrəm Zülfüqarlı: “Aİİ-nin mayın 29-da keçiriləcək tədbiri məhz seçkiqabağı Ermənistana təzyiq məqsədi güdür”
Avrasiya İqtisadi İttifaqının (Aİİ) dövlət başçıları mayın 29-da Astanada keçiriləcək Ali Avrasiya İqtisadi Şurasının iclasında Ermənistanın statusunu müzakirə edəcəklər. Bunu Rusiya baş nazirinin müavini Aleksey Overçuk TASS-a müsahibəsində bildirib.
“Ermənistanın Avrasiya İqtisadi İttifaqındakı statusu ilə bağlı müzakirələr aparılacaq. Bu, çox mürəkkəb məsələdir. Biz Ermənistanın Aİİ-dən çıxmasını istəmirik; biz Ermənistanın çiçəklənməyə davam etməsini istəyirik, lakin biz Avropa İttifaqına üzvlük və ya AB ilə sıx əlaqələr zamanı yarana biləcək problemləri görürük. Əslində, onlar artıq ortaya çıxır”, - o deyib.
Rusiya niyə məhz Ermənistanda seçkiyə 8 gün qalmış sözügedən məsələnin müzakirəyə çıxarılmasına belə təkid edir?
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Ermənistanda seçkilər çox aktualdır: “Ermənistanda keçiriləcək seçkilər ərəfəsində hər iki tərəfin - Rusiyapərəst qüvvələrin və Qərbpərəsst qüvvələrin səyləri gündən günə artır. O üzdən, müxtəlif bəyanatlar eşidirik. Qərbə inteqrasiya tərəfdarı olan Paşinyan seçki kampaniyasında belə bir fikir irəli sürür ki, Rusiya ilə əməkdaşlığın tərəfdarıyam. Bu, təbii ki, seçki ilə bağlı təşviqat kampaniyasında seçicilərə təsir etmək üçün deyilən sözlərdir. Əslində isə belə demək mümkündürsə, 7 iyun ərəfəsi Ermənistanda xeyirlə şərin mübarizəsi gedir. Bir tərəfdən Ermənistanı uzun müddət oyuncağa çevirən, girov saxlayan, qonşulara düşmən edən, öz məqsədləri üçün müxtəlif üsullardan istifadə edən Rusiyadan ayırmaq istəyən Qərbyönümlü qüvvələr. Digər tərəfdən isə Ermənistanı yenidən boyunduruq altına salmaq, asılı vəziyyətə qoymaq və ermənilərdən Azərbaycana qarşı istifadə etmək istəyən Rusiya. O üzdən, Ermənistanda necə deyərlər, kim-kimi məsələsi həll olunur. Necə ki SSRİ dövründə 30-cu illərdə kolxoz quruluşu dövründə kim-kimi məsələsi ortaya çıxmışdı, indi həmin məsələ bilavasitə Ermənistanda ortaya çıxıb. Aİİ-nin mayın 29-da keçiriləcək tədbiri də məhz seçkiqabağı Ermənistana təzyiq məqsədi güdür. Bu, bilavasitə Ermənistanda seçicilərin mövqeyinə təsir etmək, onları revanşistlərə səs verməyə təhrik etmək məqsədi güdür. Guya bunlar Rusiyadan ayrılsa faciə ilə üzləşəcəklər. Təhlükə qarşısında insanları qoymaq istəyirlər ki, Ermənistanı Aİİ-dən çıxara bilərik. Guya Rusiya digər üzvlərə “xoşbəxtlik” gətirir və Ermənistan bundan məhrum ola bilər. Ancaq bu, heç də belə deyil. Ən azından ona görə ki, Ermənistanın əhalisi azdır. Ermənistan 4 qonşu ölkəsi ilə normal münasibət qursa, Rusiyasız yaşaya bilər. Ermənistanın əhalisi heç 3 milyon nəfər deyil”.
Vidadi ORDAHALLI
