Ramil Məmmədli: “Zərbələr davamlı olarsa, bu, Rusiyanı müharibəni dayandırmağa vadar edə bilər”
“Reuters” agentliyinin yaydığı məlumata görə, Rusiya Federasiyasının mərkəzi hissəsində neft emalı demək olar ki, dayanıb. Bütün iri neft emalı zavodları son günlər Ukraynanın pilotsuz uçuş aparatları ilə həyata keçirdiyi hücumlardan sonra yanacaq istehsalını dayandırmağa və ya azaltmağa məcbur olub.
Moskva artıq aprel ayından iyulun sonuna qədər benzinin ixracına qadağa qoyub. İşini tam və ya qismən dayandıran neft emalı zavodlarının ümumi gücü ildə 83 milyon tondan, yaxud gündəlik təxminən 238 min tondan çoxdur. Bu, Rusiyanın bütün neft emalı güclərinin təxminən dörddə birini təşkil edir. Həmin zavodların payına Rusiyada istehsal olunan benzinin 30 faizindən, dizel yanacağının isə təxminən 25 faizindən çoxu düşür.
Maraqlıdır, iri neft emalı zavodlarına endirilən zərbələr Rusiya-Ukrayna müharibəsinə necə təsir edəcək? Bu, Rusiyanı sülhə vadar edə bilər?
Sözügedən məsələyə aydınlıq gətirən hərbi ekspert Ramil Məmmədli baki-xeber.com-a açıqlamasında bildirdi ki, neft emalı müəssisələrinə endirilən zərbələr davamlı olarsa, bu, Rusiyanı müharibəni dayandırmağa vadar edə bilər: “Çünki bunu şərtləndirən bir sıra faktorlar var. Nəzərə almaq lazımdır ki, Rusiyanın əsas ixrac gəlirləri neft hesabına formalaşır. Rusiya böyük neft ixracatçısıdır. ABŞ-ın İrana qarşı başladığı müharibədən sonra neftin dünya bazarındakı qiyməti kəskin artıb. Nəticədə Rusiya milyardlarla əlavə gəlir əldə edərək, büdcə kəsirini az da olsa azalda bilib. Ancaq məsələ ondadır ki, neftin qiymətinin kəskin bahalaşdığı dövrdə, Ukraynanın Rusiyanın neft emalı zavodlarına zərbələri intensivləşib. Ukrayna Rusiyanın ən böyük neft emalı zavodlarına zərbə endirir. Hansı ki, həmin zavodlarda il ərzində 10-20 milyon ton neft emal edilir. Təkcə Qara dəniz sahilində yerləşən Tuapse şəhərindəki neft emalı zavoduna Ukrayna bir ay ərzində 3 dəfə güclü zərbə endirib. Ukrayna Rusiyanın nəinki yaxın məsafədə yerləşən zavodlarını, min kilometrlərlə dərinliklərdə yerləşən zavodlarını belə vurur və eşalonlaşmış hava hücumundan müdafiə səddini aşa bilir. Vurulan həmin zavodların bərpası asan olmayacaq. Əgər belə davam edərsə, Rusiya ölkə xaricinə yanacaq ixrac edə bilməyəcək. Nəinki ölkə xaricinə, heç ölkənin daxilində yanacağa olan tələbatı ödəyə bilməyəcək. Nəzərə almaq lazımdır ki, ötən il Rusiyanın bir sıra regionları benzin qıtlığı ilə üzləşdilər. Rusiyanın yanacaq ixracının azalması, gəlirlərin azalması deməkdir. Gəlirlərin azalması isə müharibə üçün tələb edilən hərbi təchizatın təmin edilməsində problemlər yaradacaq. Bu, eyni zamanda sosial xərclərin ödənilməsində ciddi problemlər deməkdir. O üzdən, bütün bunlar Rusiyanı müharibəni dayandırmağa məcbur edə bilər”.
Vidadi ORDAHALLI
