Hüseyn İbrahimov: “Ukraynada gedən qanlı müharibədə böyük itki verən Rusiya indiki halda buna getməz”
Baltikyanı ölkələrdən PUA buraxılacağı təqdirdə Rusiyanın cavabı qaçılmaz olacaq. Bunu Rusiyanın BMT-dəkı daimi nümayəndəsi Vasili Nebenziya deyib.
Qeyd edək ki, dünən Estoniyada ilk dəfə olaraq öz ərazisində Rusiya istiqamətinə uçan Ukrayna PUA-sını vurub.
Bu arada Avropa Şurasının prezidenti Antonio Kosta Rusiyanın təhdid və təxribatlarının hibrid müharibə taktikasının bir hissəsi olduğunu bildirib və qeyd edib ki, bunlar bütün Aİ üçün təhlükə yaradır. NATO-nun baş katibi Mark Rutte də NATO-nun qərargahında keçirilən mətbuat konfransında Rusiyanın ittihamlarının "absurd" olduğunu bildirib. Rutte bildirib ki, əgər dronlar Ukraynadan gəlirsə, bunun səbəbi Ukraynanın Latviya, Litva və ya Estoniyaya dron göndərmək istəyi ilə bağlı deyil, bu, Rusiyanın ehtiyatsız və qanunsuz tammiqyaslı təcavüzündən irəli gəlir.
Bütün bu deyilənlərin fonunda Baltikyanı ölkələrin Rusiya tərəfindən yenidən işğalı təhlükəsi varmı?
Sözügedən məsələni baki-xeber.com-a şərh edən İdarəçilik Akademiyasının müəllimi, sosioloq Hüseyn İbrahimovun fikrincə, bu, indi o qədər də real deyil: “Əvvəla, bu gün hərbi sənaye və PUA texnologiyaları elə sürətlə inkişaf edir ki, bu vasitələr bir sıra dövlətlərin müdafiə konsepsiyasının ayrılmaz tərkib hissəsinə çevrilib. Xüsusən də PUA-ların idarə edilməsində süni intelektdən istifadə genişlənir. Rusiyanın Ukraynaya təcavüzündən sonra bu sahədə ciddi inkişaf gedir. Xüsusən də Ukraynanın dronlarla mübarizədə və PUA hücumlarında təcrübəsi böyükdür. Rusiya müharibə tərəfi olduğu üçün, bu ölkə də PUA və radioelektron vasitələrin inkişafına xüsusi önəm verir. Bir sıra hallarda Rusiya ordusu radio-elektron mübarizə vasitələri ilə Ukraynadan atılan PUA-ları Pribaltika ölkələrinə yönəldir. Müxtəlif səbəblərdən həmin ölkələr belə hücumlara hazır deyil. Ona görə də bir neçə aydır bu ölkələrin hava məkanının qorunmasında NATO bloku fəal iştirak edir. Rusiya indi o vəziyyətdə deyil ki, Pribaltikaya hücum etsin. Belə olacağı təqdirdə Rusiya NATO ilə üz-üzə gələcək. Ukraynada gedən qanlı müharibədə böyük itki verən Rusiya indiki halda buna getməz. Çünki müharibəni genişləndirmək üçün Rusiyanın resursları çatışmır. Rusiya Ukrayna müharibəsində ciddi uğur qazanacağı təqdirdə, Pribaltika üçün ciddi təhdid mənbəyinə çevrilə bilər. Hazırda Rusiyanın Pribaltikaya yönəlik təhdidləri daha çox hibrid müharibənin göstəricisidir. Bununla Rusiya NATO-nu daxildən parçalamaq istəyir. Ancaq tam əksinə olaraq, Avropa dövlətləri Rusiyaya qarşı qüvvələrini səfərbər edirlər. Yəni Rusiyanın təhdidlərin onları birləşdirir”.
Vidadi ORDAHALLI
