Mətləb Salahov: “İyun seçkiləri həm də Ermənistan siyasətinin özündə yeni bir dövrün başlanğıcı olacaq”
“Artıq tam əminliklə demək olar ki, İrəvanda seçki gərginliyi pik həddə çatıb. Seçki marafonundakı proseslər və erməni ictimai rəyi göstərir ki, hazırkı baş nazir öz rəqiblərini – keçmiş separatçıları, “Qarabağ kartı” üçün yenidən ortaya atılan siyasi faşistləri birdəfəlik siyasət səhnəsindən süpürüb atmaq üçün gün sayır. Nikol Paşinyanın bölgələrdə təşkil etdiyi seçki marafonları, cəmiyyətin ona münasibəti və hazırkı baş nazirin keçmiş separatçılara qarşı açıq hücum taktikası, onları sadə ermənilərin gözündən salan həqiqətləri uca səslə dilə gətirməsi iyun seçkilərinin revanşist müxalifət üçün son seçki olacağına tam əminlik yaraddır”.
Bu barədə Bakı-Xəbər-ə açıqlamasında jurnalist-ekspert Mətləb Salahov bildirib. O qeyd edib ki, Rusiyanın İrəvandakı revanşistləri hərəkətə gətirmək üçün bütün cəhdləri açıq şəkildə fiaskoya uğrayıb. “Əslində Moskva bu seçkilərdə bəribaşdan uduzmuşdu. Çünki Robert Koçaryan və Serj Sarkisyan kimi ermənilərin nifrətlə yanaşdığı revanşist faşistlərə yenidən “stavka” etməklə Moskva çarəsiz duruma düşüb. Rusiya N.Paşinyanla mübarizəyə ona sadiq və erməni siyasətində yenilikçi olacaq yeni siyasi qüvvələr çıxara bilmədi. Rusiya vətəndaşı olan milyarder Karapetyanı siyasətə sürükləmək cəhdləri elə ilk gündən uğursuz oldu. Bir həqiqət odur ki, Kreml Ermənistanda Rusiyameylli yeni nəsil siyasi qüvvələr formalaşdıra bilmədi. N.Paşinyan seçki marafonundakı son insidentdə keçmiş Qarabağ klanına və tör-töküntülərinə qarşı ucadan səsləndirdiyi həqiqət dolu təhqir və hədələr həm də erməni cəmiyyəti üçün “Qarabağ kartının” bitdiyini açıqca ortaya qoydu. Məncə iyun seçkiləri həm də Ermənistan siyasətinin özündə yeni bir dövrün başlanğıcı olacaq”.
Namiq Quliyev
