Rəşad Bayramov: “Paşinyanı daha cəsarətli edən Ermənistan cəmiyyətində prioritetlərin müəyyən qədər dəyişməsidir”
İrəvanda seçkiqabağı təşviqat kampaniyası zamanı məzuniyyətdə olan və hazırda ölkədə hakim partiya olan “Mülki Müqavilə”nin deputatlığa namizədlərinin proporsional siyahısına rəhbərlik edən Ermənistan Baş naziri Nikol Paşinyanla Qarabağdan olan Artur Osipyan arasında mübahisə yaşanıb.
Osipyan Nikolu Qarabağın verilməsində və digər məsələlərdə ittiham etsə də, Paşinyanın buna cavabı maraqlı olub: “Rədd ol burdan! Bu Qarabağın qondarma elitası rədd olsun burdan. Siz, qaçıb gələnlər… Sənin burada nə işin var ümumiyyətlə? Kimdir onlar? Bu Qarabağın qondarma elitası hələ bir barmaq da silkələyir. Rədd olun ümumiyyətlə, siz kimsiniz? Artur Osipyan, get başını divara vur! Gedib bizim uşaqlarımızın yerinə öləydin də. Oğrular, heyvanlar. Siz Qarabağ xalqını girov götürmüşdünüz. Sən niyə ümumiyyətlə sağ qalmısan ki, hələ bir 5000 qurbandan da danışırsan? Ay alçaq! Şahramanyan niyə sağdır? Digərləri niyə sağdır? Sizin parlamentin deputatları adlandırdığınız şəxslər niyə sağdırlar? Niyə ölməyiblər? Ermənistanda Qarabağın parlamenti, hökuməti var?! Hamısının kökünü kəsəcəm”.
Göründüyü kimi, Paşinyan özünə inamlı şəkildə separatçıların mövqeyindən çıxış edənləri aşağılayaraq pis günə qoyub. Maraqlıdır, Paşinyanı separatçı “Qarabağ elitası”na qarşı bu qədər cəsarətli edən nədir?
Sözügedən məsələni baki-xeber.com-a şərh edən AMİP Ali Məclisinin sədri Rəşad Bayramov bunu bir sıra amillərlə əlaqələndirdi: “Paşinyanın “Qarabağ elitası” adlandırdığı separatçı dairələrə qarşı bu qədər sərt və emosional çıxış etməsi təsadüfi deyil. Bu davranışın arxasında həm Ermənistanın daxili siyasi reallıqları, həm də 44 günlük müharibədən sonra regionda yaranmış yeni geosiyasi vəziyyət dayanır. Əslində Paşinyan artıq uzun müddətdir Ermənistan daxilində keçmiş “Qarabağ klanı”nın siyasi təsirini tamamilə zəiflətməyə çalışır və son çıxışı da bu xəttin davamı kimi qiymətləndirilə bilər. Məlumdur ki, Ermənistan siyasətində illərlə Robert Köçəryan və Serj Sarkisyan kimi Qarabağ mənşəli siyasətçilərin dominantlığı mövcud olub. Bu qrup həm təhlükəsizlik strukturlarında, həm iqtisadi sistemdə, həm də siyasi idarəetmədə ciddi təsirə malik idi. Paşinyan isə 2018-ci ildə hakimiyyətə gələndən sonra özünü məhz həmin köhnə sistemə qarşı mübarizə aparan siyasətçi kimi təqdim etdi. 2020-ci il müharibəsində Ermənistanın məğlubiyyətindən sonra isə Qarabağ məsələsi əvvəlki ideoloji yükünü xeyli itirdi və Ermənistan cəmiyyətində “Qarabağ uğrunda sonsuz mübarizə” xəttinə dəstək zəifləməyə başladı. Bu gün Paşinyanı daha cəsarətli edən əsas amillərdən biri də məhz Ermənistan cəmiyyətində prioritetlərin müəyyən qədər də olsa dəyişməsidir. Artıq erməni cəmiyyətinin mühüm hissəsi müharibədən dərs çıxarıb və yeni müharibənin Ermənistan üçün nələrə başa gələ biləcəyini anladığı üçün yeni müharibə istəmir və ölkənin iqtisadi, sosial problemlərinin həllini daha vacib hesab edir. Paşinyan da bunu anlayaraq Qarabağ separatizmini Ermənistan dövlətçiliyi üçün yük kimi təqdim etməyə çalışır. Onun “siz Qarabağ xalqını girov götürmüşdünüz” fikri də əslində daxili auditoriyaya hesablanmış siyasi mesajdır. O demək istəyir ki, əvvəlki elita illərlə Qarabağ məsələsindən istifadə edərək həm Ermənistanı, həm də Qarabağ ermənilərini fəlakətə aparıb”.
R.Bayramov bu məsələdə digər mühüm məqamı onunla əlaqələndirdi ki, Paşinyan artıq beynəlxalq reallıqları qəbul etmək məcburiyyəti ilə üzləşib: “Ölkəmiz 2023-cü ilin antiterror tədbirlərindən sonra Qarabağ üzərində tam suverenliyini bərpa etdi və beynəlxalq ictimaiyyət də bunu faktiki olaraq qəbul etdi. Bu şəraitdə Ermənistan daxilində separatçı idarəçilik strukturlarının saxlanılması İrəvan üçün əlavə risklər yaradır. Paşinyan da məhz buna görə artıq həmin strukturları siyasi təhlükə hesab edir və onların legitimlik iddialarını açıq şəkildə rədd edir. Paşinyanın sərt ritorikasının digər səbəbi isə təbii ki, qarşıdan gələn seçki kampaniyası ilə bağlıdır. O, öz seçicilərinə göstərmək istəyir ki, köhnə revanşist qüvvələrə qarşı geri çəkilməyəcək. Bu çıxış həm də onun siyasi rəqiblərinə xəbərdarlıq xarakteri daşıyır. Çünki Qarabağ mövzusu uzun müddət Ermənistanda hakimiyyət uğrunda əsas manipulyasiya alətlərindən biri olub. Odur ki, Paşinyanın “Qarabağ elitası” adlandırdığı separatçılara qarşı sərt davranışı onun artıq yeni regional reallıqlara uyğun siyasi xətt qurmağa çalışdığını göstərir. O anlayır ki, əvvəlki separatçı ideologiya ilə Ermənistanın nə təhlükəsizliyini, nə iqtisadi inkişafını təmin etmək, nə də beynəlxalq münasibətləri normallaşdırmaq mümkün olmayacaq. Buna görə də Paşinyan həm daxili siyasi rəqiblərini zəiflətmək, həm də Qərbə və region ölkələrinə yeni mesaj vermək məqsədilə daha sərt mövqe nümayiş etdirir”.
Vidadi ORDAHALLI
