Məhəmməd Əsədullazadə: “İran tərəfi çevik diplomatik manevrlər edərək ABŞ-ın mümkün hücumlarını önləyə bilir”
İran 14 maddədən ibarət yeni təkliflərini Pakistan vasitəsilə ABŞ-a təqdim edib. Bu barədə “Tasnim” agentliyi məlumat yayıb.
Məlumata görə, ABŞ son vaxtlar İranın əvvəlki 14 maddəlik mətninə cavab olaraq öz sənədini göndərib. İran da öz növbəsində aparılan mesaj mübadiləsi çərçivəsində öz təkliflərini yenidən redaktə edərək Pakistan vasitəsilə ABŞ-a təqdim edib. Bildirilib ki, İranın yeni 14 maddəlik təkliflər paketi müharibənin dayandırılması üzrə danışıqlar və ABŞ-ın etimad tədbirləri üzərində cəmlənib. Bu arada İran XİN sözçüsü İsmayıl Bəqai keçirdiyi mətbuat konfransında Tehran və Vaşinqton arasında danışıqların Pakistan vasitəçisi ilə davam etdiyini təsdiqləyib.
Burada diqqəti çəkən məqam odur ki, ABŞ Konqresinə keçiriləcək aralıq seçkilər yaxınlaşdıqca, İran ustalıqla və məqsədyönlü şəkildə danışıqları uzadır. Üstəlik, buna hələ ki, nail də ola bilir.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, ABŞ və İran arasında davam edən və bir biri ilə təkliflər paketi mübadiləsi müəyyən siyasi reveransları özündə ehtiva edir: “Görünən odur ki, rəsmi Tehran danışıqlar prosesini uzadaraq manipulyasiya edir və çevik şəkildə ABŞ-ın təkliflərindən yayınır və öz təkliflərini verir. Bu, ənənəvi fars diplomatiyasıdır və məqsəd də ondan ibarətdir ki, Konqresə keçiriləcək aralıq seçkilərinə qədər ABŞ-ı müharibədən yayındırmaq. Konqresin Aşağı Palatasına keçirilən seçkilərdə Demokratlar Partiyası qələbə çalarsa, onlar ABŞ-İran müharibəsinə imkan verməyəcəklər. Tramp Körfəz ölkələrinin xahişini nəzərə alaraq İrana zərbələrin endirilməsini təxirə salıb. Təxminimə görə, İran tərəfi son anda Birləşmiş Ştatlarla razılığa gələcək, amma Tehran çalışır ki, öz raket proqramında, Hörmüz boğazı məsələsində, uranın zənginləşdirilməsində prinsipial mövqeyi qalsın. Hazırda Çinin dəstəyi ilə İran silahlanır. O cümlədən, öz hərbi potensialını, raket proqramını bərpa edir. Ancaq İranın iqtisadiyyatı çox çətin vəziyyətdədir və sosial durum gərgindir. SEPAH faktiki olaraq hakimiyyəti tam ələ almaqla vəziyyəti daha da dramatikləşdirir. Bütün bunların fonunda, əhalinin hakimiyyətdən narazılığı artır. Çünki ABŞ fevralın 28-də İrana qarşı müharibəyə başladıqdan sonra əhalinin sosial vəziyyəti daha da pisləşib. Bu, o deməkdir ki, İran hakimiyyəti uzun müddət belə davam edə bilməz. Ortaq məxrəc tapılmasa İranda sosial partlayışlar qaçılmazdır. Xalq növbəti dəfə kütləvi etirazlara qalxacaq. Ancaq hələ ki, İran tərəfi çevik diplomatik manevrlər edərək ABŞ-ın mümkün hücumlarını önləyə bilir”.
Vidadi ORDAHALLI
