Fuad İbrahimov: “Azərbaycan sıfırdan başlayaraq bərpa prosesini öz imkanları hesabına həyata keçirir”
Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı Böyük Qayıdış Proqramı çərçivəsində 5 il ərzində görülən işlərdən bəhs edərək bir sıra önəmli məqamlara toxunub:
“Artıq 5 il ərzində çəkdiyimiz tunellərin uzunluğu 70 kilometrdir. Digər beşi də tikiləcək. 500 körpüdən 435-i inşa olunub. Bununla yanaşı, elektrik stansiyaları, su təchizatı kəmərləri, su anbarları, evlər, məktəblər, xəstəxanalar, üç beynəlxalq hava limanı tikilib, dəmir yolları çəkilib. Bütün bunlar cəmi beş il ərzində inşa olunub. Yalnız dağıtmaq, məhv etmək və əziyyətlər vermək üçün gələnlərdən fərqli olaraq, məhz torpağın yiyələri bu cür davranırlar. Bu gün 85 mindən artıq azərbaycanlı keçmişdə işğal altında olmuş ərazilərdə yaşayır. Onlar işləyir, yaşayır, təhsil alır və onların məşğulluğu hökumətimizin ən mühüm hədəflərindən biridir”.
Sözügedən məsələni baki-xeber.com-a şərh edən iqtisadçı-ekspert Fuad İbrahimovun fikrincə, Prezidentin məlum tədbirdə çıxışı zamanı qeyd etdiyi statistik rəqəmlər Böyük Qayıdış Proqramının bir hissəsidir: “Proseslər böyük sürətlə davam edir. Əlbəttə, sözügedən işləri görmək üçün ilk növbədə müəyyən bir iqtisadi güc lazımdır. Əgər iqtisadi güc olmasa, bu miqyasda bərpa quruculuq işlərini həyata keçirmək mümkün olmayacaq. Bir sıra hallarda bərpa prosesinə necə gəldi yanaşılır. Hesab edilir ki, neft gəlirləri var olduqca bərpa-quruculuq işləri aparılacaq. Düzdür, neftin özünün iqtisadi dövriyyəyə cəlb edilməsinin özü də bir bacarıqdır. Şimal qonşumuzun da nefti var, cənub qonşumuzun da. Kifayət qədər də qüdrətli dövlətlərdilər. Gəlin görək ondan normal şəkildə istifadə edə bilirlərmi? Bütün bunlar özü-özlüyündə bir göstəricidir. Azərbaycan çox uğurla neftdən əldə edilən gəlirləri infrastrukturun qurulmasına, bir sıra layihələrin həyata keçirilməsinə yönəldə bildi. O cümlədən, işğaldan azad edilən rayonların bərpasına yönəldir. Ərazilərimiz işğal edilməsəydi, neft gəlirləri digər məqsədlər üçün istifadə ediləcəkdi. Bu gün heç bir beynəlxalq təşkilat, maliyyə qurumları bərpa prosesinə bir dollar belə yardım etmirlər. Halbuki, işğaldan azad edilən ərazilərdə dağıntıların miqyası çox böyükdür. Ancaq yardım etmək heç bir beynəlxalq qurumun yadına düşmür. Azərbaycan sıfırdan başlayaraq bərpa prosesini öz imkanları hesabına həyata keçirir. Azərbaycan öz imkanları hesabına yeni mühit formalaşdırır. Yeni mühitin də tərkib hissəsi cənab Prezident tərəfindən sadalanan göstəricilərdir. 70 kilometrədək tunellərin inşa edilməsi və yaxud 500 körpüdən 435-nin inşa edilməsi. Bir sözlə, Azərbaycan öz imkanları hesabına çox böyük işlər həyata keçirir”.
Vidadi ORDAHALLI
