Bəhruz Quliyev: “Qarabağ və Şərqi Zəngəzur müharibə və xarabalıq simvolundan inkişaf, dirçəliş məkanına çevrilir”
Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı deyib ki, indi hökumətimizin qarşısında duran əsas vəzifələrdən biri Qarabağın və Şərqi Zəngəzurun yenidən qurulmasıdır:
“Bu ərazi 30 il müddətində erməni işğalı altında idi və tamamilə dağıdılaraq məhv edilmişdir. Beynəlxalq müşahidəçilər və ziyarətçilər Ağdamı Xirosima ilə müqayisə edirdilər, onlar Ağdamı “Qafqazın Xirosiması” adlandırırdılar. Çünki şəhər, sadəcə, mövcud deyildi. Şəhər tamamilə yerlə-yeksan edilmişdir və o, Xirosimadan fərqli olaraq, atom bombasının atılması nəticəsində bir günə bu vəziyyətə düşməmişdir. Bu, 30 illik işğal ərzində edilmişdir və bu zaman binalar, tarixi binalar və ictimai binalar, evlər tamamilə sökülərək dağıdılmışdır”.
Sözügedən məsələni baki-xeber.com-a şərh edən “SƏS” qəzetinin baş redaktoru, politoloq Bəhruz Quliyev hesab edir ki, Prezidentin Ağdamı “Qafqazın Xirosiması” adlandırması təsadüfi deyil: “Prezident İlham Əliyevin Ümumdünya Şəhərsalma Forumunun 13-cü Sessiyasında səsləndirdiyi fikirlər bir daha göstərdi ki, Qarabağ və Şərqi Zəngəzurda aparılan bərpa-quruculuq prosesi təkcə Azərbaycanın daxili inkişaf layihəsi deyil, həm də beynəlxalq miqyasda ədalətin və tarixi həqiqətlərin nümayişidir. Dövlət başçısının Ağdamı “Qafqazın Xirosiması” adlandırması təsadüfi deyil. Çünki işğal dövründə həmin ərazilərdə həyata keçirilən vandalizm, şəhərlərin sistemli şəkildə dağıdılması və mədəni irsin məhv edilməsi dünya tarixində nadir görünən barbarlıq nümunələrindən biridir. Əgər Xirosima bir gün ərzində atom bombasının nəticəsində dağılıbsa, Ağdam və digər şəhərlər 30 il ərzində planlı şəkildə viran qoyulub. Bu, sadəcə hərbi münaqişənin nəticəsi deyil, bütöv bir regionun iqtisadi, sosial və mədəni həyatının məhv edilməsinə yönəlmiş məqsədli siyasət idi. Ermənistan işğalı dövründə yaşayış məntəqələrinin yerlə-yeksan edilməsi, məscidlərin təhqir olunması, tarixi abidələrin dağıdılması beynəlxalq hüququn və humanitar dəyərlərin kobud şəkildə pozulması idi”.
Politoloqun fikrincə, bu gün Azərbaycan həmin torpaqlarda yeni inkişaf modelini həyata keçirir: “Bu baxımdan “ağıllı şəhər”, “ağıllı kənd” layihələri, müasir infrastrukturun qurulması, hava limanlarının, yolların, enerji xətlərinin tikilməsi göstərir ki, Azərbaycan dağıdılmış bölgəni qısa müddətdə regionun ən müasir inkişaf məkanlarından birinə çevirmək niyyətindədir. Qarabağ və Şərqi Zəngəzur artıq müharibə və xarabalıq simvolundan inkişaf, sabitlik və dirçəliş məkanına çevrilir. Düşünürəm ki, WUF13 kimi nüfuzlu beynəlxalq platformada bu məsələlərin gündəmə gətirilməsi xüsusi əhəmiyyət daşıyır. Bu forum vasitəsilə dünya ictimaiyyəti işğalın real nəticələrini daha aydın görür və Azərbaycanın həyata keçirdiyi genişmiqyaslı bərpa siyasətinin miqyasını dərk edir. Eyni zamanda, bu çıxış beynəlxalq təşkilatlara və qlobal ictimaiyyətə mühüm mesajdır ki, Azərbaycan yalnız öz ərazi bütövlüyünü bərpa etməklə kifayətlənmir, həm də dağıdılmış torpaqlarda yeni həyat quraraq bölgədə davamlı sülh və inkişafın əsasını yaradır. Bu gün Qarabağda görülən işlər dövlətin siyasi iradəsinin, iqtisadi gücünün və milli həmrəyliyinin bariz nümunəsidir. Azərbaycanın həyata keçirdiyi yenidənqurma prosesi yaxın illərdə postmünaqişə dövrü üçün dünya miqyasında ən uğurlu bərpa modellərindən biri kimi qiymətləndiriləcək”.
Vidadi ORDAHALLI
