Litvanın xarici işlər naziri Kestutis Budris İsveçrənin "Neue Zürcher Zeitung" qəzetinə verdiyi müsahibədə NATO-nun Kalininqrad bölgəsində hərbi potensialını nümayiş etdirməyin vacibliyini bildirib. Onun sözlərinə görə, alyans Şərqi Avropa ölkələrinə təhlükəsizlik təhdidi yaranacağı təqdirdə Rusiyaya bölgənin hərbi infrastrukturunu neytrallaşdırmaq qabiliyyətini nümayiş etdirməlidir: "Biz ruslara Kalininqradda tikdikləri kiçik qalaya nüfuz edə biləcəyimizi göstərməliyik. NATO-nun anklavdakı Rusiya bazalarını məhv etmək üçün lazımi vasitələri var".
Kalininqrad vilayəti ənənəvi olaraq NATO ölkələri tərəfindən Rusiyanın Baltikyanı bölgədəki əsas hərbi dayaq nöqtələrindən biri kimi qəbul edilib. Bölgədə hava hücumundan müdafiə sistemləri, raket sistemləri və Baltik Donanması yerləşdirilib. Qərb hərbi analitikləri dəfələrlə Kalininqradı Avropanın ən hərbiləşdirilmiş bölgələrindən biri adlandırıb. Kalininqrad vilayəti və Belarusla həmsərhəd olan Litva Ukraynadakı münaqişənin başlamasından bəri NATO-nun bölgədə iştirakının artırılmasını daim müdafiə edib. Vilnüs həmçinin alyansa üzv dövlətlərin müdafiə xərclərinin artırılmasını və birgə hərbi proqramların genişləndirilməsini fəal şəkildə dəstəkləyir. Kestutis Budris əvvəllər NATO-nun müdafiə potensialının gücləndirilməsinin və hərbi maliyyələşdirmənin artırılmasının vacibliyini bildirib. Onun sözlərinə görə, "sözlər Rusiyanı dayandıra bilməz" və alyansın hərbi qüdrəti əsas maneə olaraq qalır.
Bu fonda Rusiya XİN-in xüsusi tapşırıqlar üzrə səfiri Artyom Bulatov NATO-nun Kalininqrad vilayəti yaxınlığında döyüş imkanlarını sürətlə artırdığını bəyan edib. Diplomatın sözlərinə görə, bu fəaliyyətlər Baltik dənizində təhlükəsizliyi təmin etmək bəhanəsi altında həyata keçirilir. Artyom Bulatov Şimali Atlantika Alyansının Rusiya sərhədlərinin bilavasitə yaxınlığında öz hərbi və infrastruktur potensialını fəal şəkildə inkişaf etdirdiyini qeyd edib. O, NATO-nun regiondakı mühüm infrastruktur üzərində nəzarəti gücləndirməyə yönəlmiş və 2025-ci ilin yanvarında start götürən "Baltik keşikçisi" əməliyyatının başlanmasından bəhs edib. Diplomat vurğulayıb ki, son aylarda NATO-nun hərbi təlimlərinin intensivliyi və miqyası artıb, bu isə alyansın üzvü olan ölkələr tərəfindən törədilən təxribatlarla müşayiət olunur. Onun bildirdiyinə görə, bu cür hərəkətlər Rusiyanın maraqları üçün daşımalar həyata keçirən gəmilərə qarşı yönəlib və Rusiya rəhbərliyi tərəfindən ciddi narahatlıqla qarşılanır. Bulatov həmçinin Baltik dənizi üzərində hava məkanının patrullanmasının davam etdirildiyini və bunun regionda gərginliyin artmasının göstəricisi olduğunu bildirib. Rusiya XİN NATO-nun ölkə sərhədlərinə doğru genişlənməsini sürünən təcavüzün təzahürü kimi qiymətləndirib və beynəlxalq birliyi bu hərəkətlərə diqqət yetirməyə çağırıb.
Samirə SƏFƏROVA
